Ngondo muinayi: Tshikondo tshia ‘Kuditshinta bua kuenza mudimu mukole’

¹ Bua basadidi ba Yehowa, matuku adi kumpala kua Tshivulukilu mmatuku atubu bela meji bikole. Etshi ke tshikondo tshia kudiebeja bua kumanya tshivua lufu lua Kristo lukumbaje ne kuvuluka ditekemena didi Nzambi mutupeshe ku diambuluisha dia mashi a Yezu. Dituku dia 19 dia ngondo muinayi wa tshidimu tshishale didi dikuvuluija tshinyi? Udi mua kuvuluka mpala ya bantu bauvua mumone dilolo adi anyi? Udi mua kuvuluka muvua tshikondo tshia Tshivulukilu atshi tshikale tshia mushinga mukole anyi? Udi muvuluke muyiki mulenga mushindamene pa Bible ne masambila a muoyo umue avuabu benze dituku adi anyi? Pamu’apa uvua mupangadije bua kuleja menemene dianyisha bua dinanga didi Yehowa ne Yezu bakuleje. Mmunyi mudi dielangana meji dia mushindu eu mua kukuambuluisha?

² Bantu ba Yehowa batu baleja dianyisha ki ng’anu ku mêyi patupu to, kadi ku malu adibu benza. (Kolos. 3:15, 17) Mu ngondo muinayi wa tshidimu tshishale tuvua badifile bikole mu mudimu wa buambi bua kuleja dianyisha bua malu adi Yehowa mulongolole bua lupandu luetu. Bantu binunu bivule bakenza bumpanda-njila buambuluishi mu teritware wetu, kupitshisha too ne pa bungi buvuabu musangu mushale ne bantu 83 pa 100. Didifila diabu pamue ne dia bamanyishi bakuabu ba Bukalenge, diakatufikisha ku dienza mêba, diabanya bibejibeji ne kupinganyina bantu mushindu utuvua katuyi banji kuenza katshia. Disanka dietu diakavula patuakamona bantu binunu bivule batuadije kulonga Bible ne bakuabu ba bungi kupita kumpala babuele mu Tshivulukilu!

³ Bushuwa, ditekemena dietu dilelela didi ditusaka ku dienza mudimu. Bidi bu muakafunda mupostolo Paulo ne: ‘Bua bualu ebu tudi tuenza mudimu mukole ne tudi tuditshinta, bua tuakutekemena Nzambi udi ne muoyo, udi Musungidi wa bantu bonso, kadi mutambe kuikala Musungidi wa badi bamuitabuja.’​—1 Tim. 4:10.

⁴ Mmunyi muwaleja mu tshikondo tshia Tshivulukilu etshi ne: udi witabuja malu adi Yehowa mulongolole bua kupesha bantu muoyo? Mu ngondo muinayi wa tshidimu tshishale tuakapeta bamanyishi ba Bukalenge bungi butuvua katuyi banji kupeta. Tudiku mua kupitshisha pa bungi abu mu ngondo muinayi wa tshidimu etshi anyi? Eyowa. Kadi bua tuetu kukumbaja tshipatshila etshi, mumanyishi yonso ukadi mutambule anyi udi kayi muanji kutambula udi ne bua kudifila mu mudimu eu. Bapiabapia ba bungi badi pabu mua kukumbaja malu malomba bua kushisha kuenza mudimu eu. Bua nunku, paudi uditshinta anyi uluangana bua kuyisha bikole mu ngondo muinayi eu, keba mishindu iudi mua kukoka bakuebe, bapiabapia ne badi kabayi banji kutamba kumanya mua kuenza mudimu eu bimpe, bua bikale baya nebe mu buambi.

⁵ Tuambuluishayi bakuetu bua bapinganyine mudimu wa buambi: Biwikala mumanye bamue bamanyishi badi benze ngondo mujima peshi ibidi kabayi bayisha, udi mua kubakankamija ne kubabikila bua nuikale nupatuka nabu mu buambi. Bikala mu tshisumbu tshienu bamue bamanyishi bakadi kabatshiyi bapatuka mu buambi, bakulu nebenze muabu muonso bua kuya kubatangila ne kubakankamija bua bapinganyine mudimu wabu wa buambi mu ngondo muinayi.

⁶ Tutungunukayi ne kulomba Yehowa bua nyuma wende atukoleshe tuenze mudimu wende. (Luka 11:13) Ntshinyi tshitudi mua kuenza bua kupeta nyuma wa Nzambi? Tubalayi Dîyi dia Nzambi difundisha ku nyuma wende. (2 Tim. 3:16, 17) Tudi kabidi ne bua kubuela mu bisangilu bionso bitanu bia ku lumingu bua kuleja ne: tudi ‘tumvua budi nyuma wambila ekeleziya.’ (Buak. 3:6) Tshikondo etshi ntshiakanyine bua kuambuluisha bana betu batu kabayi bayisha imue ngondo ne bakuabu badi kabatshiyi bayisha mene bua bamanye mua kudilongela ne kuikala babuela mu bisangilu bionso. (Mus. 50:23) Tudi tuenza nunku eku tuetu bine tutshiunga etu makanda a mu nyuma. Kadi kudi bualu bukuabu.

⁷ Mupostolo Petelo wakumvuija ne: Nzambi udi upesha ‘badi batumikila mêyi ende’ nyuma wende munsantu. (Bien. 5:32) Ditumikila dia nunku didi diumvuija kuangata ne mushinga dîyi didiye mutume dia “kuambila bantu bualu buende ne kumanyisha.” (Bien. 1:8; 10:42, MML) Nunku, nansha mudibi ne: tudi dijinga ne nyuma wa Nzambi bua atukoleshe tuyishe, tudi ne bua kumanya kabidi ne: patudi tutuadija kuenza malu adi asankisha Yehowa, udi utuambuluisha upitshisha ne pinapu. Katulenguludi mushinga wa kuenza malu aa bua kuleja ditumikila to.

⁸ Tuambuluishayi bana: Baledi, nudiku bamone bualu budi buleja ne: bana benu mbasue kuambila bakuabu bulelela anyi? Batuku bapatuka nenu mu buambi anyi? Badi ne ngikadilu ya tshitembu anyi? Bikalabi nanku, bua tshinyi nudi nuelakana bua kubambuluisha? Uyikile ne mukulu umue wa mu Komite wa Mudimu wa Tshisumbu bua kujadikabu bikala muanebe mmukumbane bua kutuadijabu kumubala mu mulongo wa bamanyishi mu ngondo muinayi. (Tangila mukanda wa Mudimu wetu, dib. 99-100.) Umanye ne: bana bebe badi pabu mua kusakidila diabu dîyi mu lubila elu ludi bantu bela bua kusamuna Yehowa tshikondo etshi tshia Tshivulukilu.​—Mat. 21:15, 16.

⁹ Mamu mukuabu muena Kristo uvua ne tshibidilu tshia kuambila muanende wa bakaji bua ikale uyikila ne bakuende malu adi atangila Yehowa. Tshidimu tshishale pavua muana eu ne mamuende mu buambi, wakapesha tatu mukuabu broshire wa Utulomba ne kumumvuijaye mu mêyi makese malu a mu tshikebelu. Tatu au kumukonkaye ne: “Udi ne bidimu binga?” Muana kuandamuna ne: “Muanda-mutekete.” Tatu au wakakema pa kumona muana umvuija malu bimpe mushindu’eu. Bakalua kumanya ne: tatu au uvua mukole ne Bantemu kadi dîba adi kavuaku munange bulelela to. Pashishe dilonga dia Bible ne tatu muine au diakatuadija, kabidi ne mukajende ne muanende wa bakaji.

¹⁰ Kudi bana ba bungi bakadi bamanyishi, ne bitu bituenza disanka pa kubamona netu mu buambi. Bana aba badi mua kukankamija ne kusaka bena mulongo nabu. Ngondo muinayi ntshikondo kabidi tshidi bena mu mêku mua kukolesha malanda abu ne makanda abu a mu nyuma pa kuenza pamue mudimu wa tshijila. Bamfumu ba mêku baleje ka-bukulumpe mu muanda eu.​—Nsu. 24:27.

¹¹ Tuambuluishayi bapiabapia: Tuambe tshinyi bua bapiabapia baudi ulonga nabu Bible? Badiku pabu mua kuleja bukole bua pa buabu mu ngondo muinayi eu anyi? Pamu’apa bakapeta dijinga dia kuambila bakuabu malu avuabu balonga panuakajikija nshapita 2 tshikoso tshia 22, anyi nshapita wa 11 tshikoso tshia 14, mu mukanda wa Dimanya. Binuikala nukadi pa kujikija mukanda, longolola bua nuyikile bimpe malu aa panudi nufika mu nshapita wa 18, tshikoso tshia 8 tshidi tshiamba ne: “Pamu’apa udi ujinga kuambila balela bebe, balunda ne bakuabu bantu biudi ulonga. Bushuwa, udi mua kuikala ukadi wenza nunku, anu bu muakamanyisha Yezu lumu luimpe kudi bakuabu mu mpukapuka. (Luka 10:38, 39; Yone 4:6-15) Mpindieu udi mua kuikala musue kuenza bipitshidile.” Baudi ulonga nabu badi ne dijinga edi anyi?

¹² Mulongi webe udi witaba Dîyi dia Nzambi anyi? Udi utumikila mêyi a mu Bible anyi? Mmushintulule nsombelu wende mulue mumvuangane ne mikenji ya Nzambi anyi? Utuku ubuela mu bisangilu anyi? Mmusue bua kukuatshila Yehowa Nzambi mudimu anyi? Nunku bua tshinyi kubenga kumuambila bua kuyikilaye ne bakulu bua pamu’apa alue mumanyishi udi kayi muanji kutambula bua atuadije kupatuka nebe mu buambi mu ngondo muinayi? (Tangila mukanda wa Mudimu wetu, dib. 98-99.) Nunku udi mua kufika ku didimuenena mudi bulongolodi bua Yehowa mua kumukuatshisha mu bionso bidiye wenza bua kukuatshila Yehowa mudimu.

¹³ Bushuwa, bamue balongi batu batanta lukasa mu nyuma kupita bakuabu. Nunku, bilondeshile mibelu mifila mu Mudimu wetu wa Bukalenge wa Kabalashipu 2000, mu dibeji 4 tshikoso 5-6, bamanyishi ba bungi mbatuadije kulonga mukanda muibidi ne bantu bavua baleje kumpala dijinga dia kumanya kadi bavua bimueneka bijinga kuanji kubambuluisha bua bapete muoyo wa kuenza mudimu. Tudi anu batekemene se: bantu ba muoyo muimpe aba nebalue bayidi balelela ba Kristo, “nansha bua katupa kipi nansha bua katupa kale.” (Bien. 26:29, Mukanda wa Mvidi Mukulu) Kadi, bikala ngondo yonso iudi mulonge ne muntu mimueneke ne: idi bu “katupa kale,” tshikondo tshia Tshivulukilu etshi katshienaku mua kuikala tshiakanyine bua mulongi webe kulejaye dianyisha bua tshia-bupikudi tshia Kristo anyi?

¹⁴ Mua kubambuluisha bua kudituabu mu mudimu: Dikonkonona mushindu uvua Yezu mulongeshe bakuabu didi ditulongesha malu a bungi pa mushindu utudi mua kuambuluisha bantu badi bakumbane bua batuadije mudimu wa buambi. Kavua anu uya ne bapostolo bende muaba uvua bantu ne pashishe ubambila ne: tuadijayi kubayisha to. Tshia kumpala uvua utuadija kubaleja mushinga wa mudimu wa diyisha, kubambila bua bikale badifila ne muoyo mujima, ne pashishe kubapeshaye bintu bisatu bia mushinga: muntu wa kupatuka nende, muaba wa kuyishila ne mukenji wa kutuadila bantu. (Mat. 9:35-38; 10:5-7; Mâko 6:7; Luka 9:2, 6) Ke tshiudi pebe mua kuenza. Nansha biwikala wambuluisha muanebe, mulongi mupiamupia peshi mumanyishi udi kayi mufile luapolo lua mudimu kukadi matuku, uditatshishe bua kukumbaja malu abidi adi alonda aa.

¹⁵ Leja mushinga wa kuyisha: Ambuluisha muntu bua afike ku diangata mudimu wa buambi ne mushinga. Leja mudi mudimu eu muikale muimpe. Mulondele malu malelela adi aleja mudimu udi bena mu tshisumbu benza mu buambi. Ikala ne lungenyi lua buena luvua Yezu muleje mu Matayo 9:36-38. Ambila muntu udi ujinga kulua mumanyishi anyi eu udi katshiyi wenza mudimu bua alombe Nzambi amukuatshishe mu mudimu wende, kabidi ne bua mudimu wa buambi pa buloba bujima kuyawu kumpala.

¹⁶ Fikisha muntu ku diela meji bua bikondo bivule bidiku bia kuyisha: Mumvuije ne: kudi mushindu wa kuyisha ku nzubu ne ku nzubu ne bena mu kasumbu kenu ka dilonga dia mukanda. Umuambile bua ikale uyikila ne bena mu dîku diende, bamanyangana nabu, bena mudimu nende anyi balongi nende dîba dia diikisha. Padiye mu mashinyi ne bantu, dibaleja disanka patupu didi mua kumuambuluisha bua kutuadija nabu muyiki. Patudi tuenza malu nunku, tudi tupeta mushindu wa kuyisha bantu bimpe. Bushuwa, tudi ne bikondo bivule bitudi mua kumanyisha bakuabu ditekemena dietu “ku dituku ku dituku.”​—Mus. 96:2, 3.

¹⁷ Ku ntuadijilu, mbimpe bua wewe ne mumanyishi mupiamupia nuanji kuikala nuya pamue mu mudimu wa ku nzubu ne ku nzubu. Biwikala ujinga kuvudija mudimu webe mu ngondo muinayi, lomba muanetu musadidi utu ulongolola teritware bua akupeshe pikalaku mushindu teritware uudi ujinga. Wewe mumupete, newenze mudimu bikole. Tshilejilu, paudi ujikija mudimu wa buambi anyi dîba diudi uya mu bisangilu peshi mikuabu miaba, udi mua kutangila miaba iuvua kuyi musangane bantu anyi miaba ivua bantu banyishe bulelela bua kumanya ni badiku. Bikalaku mushindu, udi mua kubuela ne kuanji kubakumbula bua katupa kîpi paudi mumone ne: bidi mua kutamba kubambuluisha. Ke wewe kukumbaja mudimu webe bimpe ne kupeta disanka dia kuwenza.

¹⁸ Longolola malu a kuyisha adi alenga bantu ku muoyo: Kujinga bua kuyisha mukenji wa Bukalenge mbualu bumue, kadi bukuabu mbua kuikala mutuishibue bua mushindu uudi uyisha malu au, nangananga padi muntu au muikale mumanyishi mupiamupia anyi mumanyishi udi muenze matuku a bungi kayi muyishe kabidi. Kuleja bamanyishi bapiabapia ne badi kabatshiyi benza mudimu bua bamanye mua kudilongolola ki nkujimija dîba nansha. Badi mua kupeta ngenyi mimpe mu Tshisangilu tshia Mudimu ne mu bisangilu bia mudimu wa buambi, kadi kakuena tshintu tshidi mua kuangata muaba wa didilongolola dia muntu nkayende nansha.

¹⁹ Mmunyi muudi mua kuleja bamanyishi bapiabapia mushindu wa kudilongolola bua mudimu wa buambi? Tuadija ne difila dia bibejibeji, wambe mêyi mapepele mu tshikoso. Balombe bua bele meji ku ngumu mipiamipia idi mua kukoka ntema ya bantu ba mu muaba udibu, ne pashishe bakebe mu nimero ya bibejibeji mipiamipia bua kupeta bualu budi buenze bu budi bupetangana ne ngumu ayi. Ambululayi pamue malu anudi balongolole aa, ne pashishe nukuate nawu mudimu mu buambi diakamue.

²⁰ Tubambuluishayi bua tulue ba bungi mu matuku adi kumpala: Tshidimu tshishale bantu bungi bupite pa miliyo 14,8 bavua babuele mu Tshivulukilu pa buloba bujima. Bungi busanga bua bamanyishi buvua miliyo isambombo ne bia pa mutu. Bidi bimueneka ne: bantu batue ku miliyo 8,8 bavua banyishe bua kulua mu tshisangilu tshia pa buatshi etshi muakatelejabu dimue dia ku malongesha manene a mu Bible. Bakafika ku dimanyangana ne bamue ba kutudi, pamu’apa biakabasankisha bikole. Ba bungi ba kudibu badi batuanyisha bikole, bambuluisha bua mudimu wetu kuendawu bimpe pa buloba bujima, ne kabidi batuakuila. Tshisumbu tshia bantu bonso aba ntshimanyinu tshia se: mu matuku adi kumpala eku, netulue ba bungi menemene. Ntshinyi tshitudi mua kuenza bua bakole mu nyuma?

²¹ Bantu bapiabapia ba bungi bavua balue mu Tshivulukilu mbatuvua babikile. Pa tshibidilu kutu muntu nansha umue udibu bamanyangana nende mu bantu badimu. Padi muntu ulua mu tshisangilu etshi bualu tuvua bamubikile, tudi ne bua kumuakidila bilenga ne kumuambuluisha bua alonde bimpe malu adibu balongesha. Bu muikalaku bantu ba bungi dituku adi, umukebele muaba wa kusombaye. Musombeshe Bible webe, imbayi nende misambu pamue. Andamuna nkonko yonso idiye wela. Paudi umuleja disanka dia nunku, bidi mua kumufikisha ku dijinga bua kumanya malu makuabu. Bushuwa, tuetu bonso tudi ne bujitu ebu: patudi tumona mpala muenyi, tumuakidile ne disanka ne tumuyikidishe kakese bua kumanyangana nende.

²² Dibuela mu Tshivulukilu didi mua kushintuluisha muntu lungenyi. Bu mudiye mulue mu tshisangilu etshi, bidi mua kuikala bileja ne: miaba yonso idiye muende ki mmupete tshidiye ukeba to; bileja kabidi ne: tudi tupeshangana tshintu tshidi muntu umvuila muoyo wa kukonkonona bimpe menemene. Diumvuija dia tshintu tshidi Yehowa mulongolole anyi mulambu wa tshia-bupikudi didi mua kuikala bu bualu bunene butudi tusokoluela muntu udi kayi ne tshidiye mumanye pa bidi bitangila dinanga dia Yehowa ditu kadiyi ne mikalu. Muntu udi mua kumona diakamue ne: katuena bu bakuabu to; tudi tuamba bulelela, tudi ne muoyo wa bulunda, ne dinanga ne kanemu. Nzubu wa Bukalenge wetu kêna ne bintu bia buena bivuaye mua kuikala mumone mu nzubu ya nzambi idi ne mpingu ne bilele bia tshianana to. Bantu bapiabapia batu bamona bimpe ne lukasa ne: bantu ba mishindu ne mishindu batu babuela mu bisangilu bietu, ne kakuena tshilele tshia kuendesha tubondo bua bantu kuelelabu makuta to. Bionso ebi bidi mua kukoka bikole ntema yabu ne kubapesha muoyo wa kuluabu musangu walonda.

²³ Kunyima kua Tshivulukilu, nusungule bana betu badi mua kuya kuambuluisha benyi aba. Biwikala mubikile bantu, udi ne bujitu bukuambika. Kumpala kua kupinganabu ku mabu, ujadike se: mbamanye dituku dienzeka bisangilu bikuabu ku Nzubu wa Bukalenge. Ubambile tshiena-bualu tshia muyuki wa patoke wa musangu udi ulonda. Ubaludike muaba utubu benzela Dilonga dia Mukanda dia Tshisumbu mu kartié kabu ne dîba ditudi dituadija. Pashishe, ubakebele mukanda wa Dimanya ne ubaleje tshitupa tshia dilonga lumingu lua dia 30 Tshisanga. Umvuija bua tshinyi tshisumbu tshijima tshidi tshidilongolola bua kubuela mu mpungilu wa distrike ukadi pabuipi.

²⁴ Dilongolola bua kuya kubasombesha kumbelu. Ukebe bua kumanya ni badi ne broshire wa Utulomba ne mukanda wa Dimanya bua bafike ku dimanya malongesha a nshindamenu a mu Bible. Bikalabu kabayi banji kutuadija kulonga Bible, ubalombe bua nutuadije kulonga nabu. Bambila bua babale broshire wa Bantemu ba Yehowa bualu udi umvuija bimpe mushindu udi bulongolodi buetu buenda. Balomba bua batangile filme yetu mikuabu bu mudi wa Toute la communauté de nos frères. Enza bua bamanyangane ne bakuabu bena mu tshisumbu tshienu. Utungunuke ne dimonangana ne bapiabapia abu nansha mu ngondo yalonda; ubabikile bua balue mu bisangilu padi mutangidi wa tshijengu ukumbula tshisumbu tshienu anyi panudi ne mpuilu wa tshijengu anyi wa pa buende. Bapesha mushindu wa kudilejabu mudibu “badiakaje bimpe bua muoyo wa kashidi”!​—Bien. 13:48, NW.

²⁵ Tshidi bakulu mua kuenza: Bua mudimu kuenzekawu wa bungi mu ngondo muinayi wa tshidimu etshi, bakulu ke badi ne bua kuanji kuleja ka-bukulumpe. Biwikala mulombodi wa dilonga dia mukanda, funda malu onso audi mua kuenza bua kuambuluisha muntu yonso mu kasumbu kenu bua kudifila mu mudimu wa pa buawu eu. Mu kasumbu kenu mudiku bamanyishi bansonga, bapiabapia, batu bayisha batumpika imue ngondo peshi badi kabatshiyi bayisha anyi? Keba bua kumanya bikala baledi, bampanda-njila anyi bamanyishi bakuabu badilongolole bua kubambuluisha. Ambuluisha pebe muebe muonso. Muanetu wa bakaji mukuabu uvua muenze bidimu bibidi kayi uyisha imue ngondo wakalua kuenza mêba mapite pa 50 mu ngondo muinayi wa tshidimu tshishale. Ntshinyi tshiakamuambuluisha nunku? Wakamba ne: dimukumbula dia bakulu ke diakamukolesha.

²⁶ Mbimpe bakulu ne basadidi ba mudimu benze mudimu tshiapamue bua kuikale teritware, bibejibeji, mikanda ne bikuabu bintu bia kuenza nabi mudimu mu ngondo muinayi. Kudiku mushindu wa kusakidila bimue bisangilu bia mudimu anyi? Bikalabi nanku, numanyishe mushindu unudi babilongolole. Kadi nangananga ikalayi nulomba Yehowa dîba dinudi nusambila pa nkayenu anyi mu tshisumbu bua kubeneshaye bionso binuenza mu ngondo muinayi mu buambi.​—Lomo 15:30, 31; 2 Tes. 3:1.

²⁷ Mu ngondo muinayi wa tshidimu tshishale mu tshisumbu tshikuabu, bakulu bakalomba bamanyishi bua bavudije mudimu wabu wa budimi. Lumingu luonso mu bisangilu, bavua bambila bamanyishi bua badikonkonone bamona ni kuvua mua kuikala mushindu wa buobu kuenza bumpanda-njila buambuluishi. Misangu yonso, bakulu ne basadidi ba mudimu bonso bavua bakula ne disanka bua tshilumbu tshia kuvuija ngondo muinayi, ngondo wa mudimu wa katshia ne katshia. Nunku ngondo au, bamanyishi 58 pa 100, kusangisha ne bakulu bonso ne basadidi ba mudimu bonso bakenza bumpanda-njila!

²⁸ Bidi bienza disanka patudi tudifila bikole mu mudimu: Mmasanka kayi adi muntu upeta padiye ‘uditshinta bua kuenza mudimu mukole’ mu mudimu wa budimi? (1 Tim. 4:10) Bakulu batudi batele kuulu eku badi balonda bua mudimu uvua bena mu tshisumbu tshiabu benze ne lukunukunu mu ngondo muinayi wa tshidimu tshishale bamba ne: “Bana betu batu anu bakula bua mushindu udibu balue kunangangana bikole ne kukolesha malanda munkatshi muabu katshia batuadija kuyisha bikole.”

²⁹ Muanetu mukuabu wa nsongalume uvua mulema uvua katshia kuonso eku ujinga bua kuenzaku mudimu wa pa buawu mu ngondo muinayi wa tshidimu tshishale. Bu muakadilongololaye bimpe ne kumuambuluishabu kudi mamuende ne bana betu bakuabu, wakalua mpanda-njila muambuluishi ngondo au e kuenzayi mudimu muimpe wa dikema. Wakumvua munyi bua mudimu uvuaye muenze eu? Udi wamba ne: “Bua musangu wa kumpala katshia bandela, mvua mudiumvue anu bu muntu mujima.”

³⁰ Kakuyi mpata, Yehowa udi ubenesha bantu badi bangata mudimu wa kumanyisha bumfumu buende ne mushinga mukole. (Mus. 145:11, 12) Patudi tuvuluka lufu lua Mukalenge wetu, tudi tujingulula ne: masanka adi muntu mua kupeta bua dilamata Nzambi neikale a bungi mavule kumpala kutuyaya eku. Mupostolo Paulo uvua ujinga bikole difutu dia muoyo wa tshiendelele. Kadi, uvua mumanye ne: kabuvua bualu bua ushala mushinge mikolo ne utekemena patupu bua kubupeta to. Wakafunda ne: ‘Bua bualu ebu kabidi ndi ngenza mudimu bikole, ndi nditshinta bikole bu mudi kuenzeja kuende kudi kuenza munda muanyi mu bukole.’ (Kolos. 1:29) Ku butuangaji bua Yezu, Yehowa wakapesha Paulo bukole bua kuenza mudimu udi upandisha bantu, ke tshidiye mua kutuenzela petu. Udi ukeba pebe bua akupeshe bukole mu ngondo muinayi eu anyi?

[Kazubu mu dibeji 3]

Nnganyi uudi mua kukankamija bua kutuadijaye kuyisha mu ngondo muinayi?

Muanebe?

Mulongi wa Bible?

Muntu udi katshiyi uyisha?