‘Tuenzele bantu bonso bimpe’

¹ “Manyisha Dîyi dia Nzambi menemene” ne “Nuikala ‘babanji mu midimu mimpe’” bivua biena-bualu bivua bipatuke mu tshisakidila tshia Mudimu wetu wa Bukalenge wa Luishi ne wa Luabanya 2002. (Kolos. 1:25, MML; 1 Tim. 6:18, MML) Mu nimero eyi bavua batukoleshe bua kuenza muetu muonso bua kuambuluisha bantu badi banyisha bulelela bua kubuelabu mu Tshivulukilu, kutukoleshabu kabidi bua kuambuluisha bakadi balekele kuyisha bua kutuadijilulabu mudimu mu tshisumbu ne kuambuluisha bana ne balongi ba Bible bakadi baye kule ne dilonga bua kuluabu bamanyishi ba lumu luimpe. Kakuyi mpata, imue misangu tuvua bapete bipeta bilenga bua mudimu wetu mukole. Mpindieu, ‘patudi bamanye mua kuenza, tuenzelayi bantu bonso bimpe, kadi tutambe kuenzela bena dîku dia bena kuitabusha bimpe.’​—Gal. 6:10.

² Babikila kabidi mu bisangilu: Mu Congo yetu yonso ibidi, teritware idi biro bietu bia filiale bitangila, bantu bapite pa 450 000 badi kabayi bambi ba lumu luimpe batu babuela mu Tshivulukilu tshidimu tshionso. Bu mudi dibuela diabu dileja mudibu basankidila bulelela, mmunyi mutudi mua kusaka aba ‘bonso bavua badiakaje bimpe bua muoyo wa kashidi’ bua kuluabu “bena kuitabuja”? (Bien. 13:48, NW) Ubakoleshe bua kuluabu kabidi mu bisangilu bialonda.

³ Bua tshinyi kubenga kubikila muntu udi wanyisha bulelela bua kuluaye kubuela mu Dilonga dia Mukanda dia Tshisumbu bua kuteleja diyukidilangana dilenga pa mukanda wa Muntu mutambe bunene? Bikala muntu au mmulela webe peshi nudi bamanyangane nende ne wewe muikale ne mudimu wa kuenza mu Kalasa ka Mudimu wa Teokrasi mu matuku adi kumpala, udi mua kumubikila bua alue kuteleja muyuki webe. Udi mua kumuambila biena-bualu bia miyuki ya patoke yenzabu mbingu idi kumpala. (Programe mupiamupia udi ne bua kuikala mulamika ku tshibasa tshia mamanyisha.) Keba mushindu wa kujula mu mutshima wa muntu dijinga dia kutendelela Yehowa. Bikalaye kayi ulonga Bible ne muntu kampanda mu tshisumbu, udi mua kumulomba bua kulonga nende.

⁴ Tungunuka ne kukolesha badi batekete: Bantu ba bungi bavua babuele mu Tshivulukilu mbakadi bamane kudilambula kudi Yehowa. Kadi bua malu kampanda, buobu kuanji kulekela kuyisha lumu luimpe. Kadi Paulo wakatukankamija bua ‘kuenza bimpe, kadi kutamba kuenzela bena dîku dia bena kuitabuja bimpe.’ (Gal. 6:10) Nunku, bantu bakadi balekele kuyisha ke badi ne bua kuikala ba kumpala ba kuambuluisha.

⁵ Bamue bakadi pamu’apa banyishe dibakankamija dia bakulu anyi bantu bakuabu ne bakadi batuadijilule buambi. Bikala bakulu bakupeshe muntu udi mutuadijilule kuenza mudimu wa buambi bua upatuke nende, manya ne: dinanga diebe wewe muine bua Yehowa ne bua mudimu wa buambi nebiambuluishe muntu eu bua kuikalaye ne dieyemena. Muleje mushindu wa kudifila mu bitupa bionso bia buambi bua apete pende disanka dia kudifilamu, neatungunuke ne mudimu wa buambi ne neapete mabenesha a kudi Yehowa.

⁶ Ambuluishayi bamanyishi bapiabapia bua kutuadijabu bimpe: Pavua muntu mukaji kampanda utshivua umanyinaku bulelela mufike ku dijingulula ne: mmupete bulongolodi bua Nzambi mulelela, wakajinga diakamue bua kutuadija kuyisha. Kunyima kua yeye mumane kumanya tshivuaye ne bua kuenza, wakamba ne: “Ndi musue kutuadija mpindieu.” Bikalabu banyishile muntu uudi ulonga nende Bible bua kubanga kupatuka mu buambi, muambuluishe bua amone mudibi bikengela “kutuadija diakamue,” nunku mumanyishi mupiamupia neikale mua kutuadija bimpe. Umuambuluishe bua apete tshibidilu tshia kudilongolola ne kupatuka mu buambi lumingu luonso.

⁷ Bikala muanebe ke udi mulue muambi wa lumu luimpe udi kayi muanji kutambula, enza nende mudimu pamue bua yeye kuya kumpala bilondeshile bukole budiye ne mamanya ende. Wewe mumuambuluishe kakese, udi mua kukukemesha pawamumona ukadi uyikila ne bantu bimpe, ubabadila Bible ne ufila mikanda. Bikalaye mupete muntu udi umuteleja bilenga, umulongeshe bua kupinganyina muntu eu uvua muleje dijinga dia kumanya bia bungi.

⁸ Vudija mudimu webe: Nsombelu webe udiku ukupesha mushindu wa wewe kuvudija mudimu webe too ne panyima pa matuku a Tshivulukilu anyi? Udiku mua kusakidila dîba dimue anyi abidi ku bungi bua mêba awutu wenza pa tshibidilu mu buambi anyi? Udiku mua kutangila kalandriye kebe ne kumona ngondo uudi kabidi mua kuenza bumpanda-njila buambuluishi anyi? Peshi udiku mua kuakaja malu ebe bua kuenza mudimu wa ku dîba ne ku dîba anyi? Makanda etu onso atudi tufila bua buambi adi mua kuambuluisha muntu bua kuitaba bulelela! (Bien. 8:26-39) Ne mêsu etu matangila ku matuku atshilualua, ‘tuipatshilayi mua kuenzelangana bimpe dîba dionso munkatshi muetu ne kudi bantu bonso.’​—1 Tes. 5:15, Mukanda wa Mvidi Mukulu [Katolike, MMM].

[Kazubu mu dibeji 3]

Tungunuka ne kuambuluisha:

□✔ Badi babuela mu Tshivulukilu

□✔ Bamanyishi badi batuadijilule buambi

□✔ Bamanyishi bapiabapia badi kabayi banji kutambula