Disanka dia kuenza mudimu wa ku dîba ne ku dîba

¹ Muudi nsonga, kakuyi mpata utu wela meji bua matuku ebe atshilualua. Nsumuinu 21:5 udi utuambila ne: ‘Meji adi muena mutshima wa mudimu upangadija adi amuvudijila lupetu luvule.’ Wewe wela meji bikole ku malu audi udifundila mu nsombelu, nebikale bua diakalenga diebe. Paudi upangadija malu ebe a mu matuku atshilualua, uvuluke mudimu wa ku dîba ne ku dîba. Bua tshinyi?

² Ebeja bamue bantu bakulumpe bavua bampanda-njila patshivuabu bansonga bua bakuambile mudibu bamona mudimu eu, nebakuambile bualu bua muomumue ne: “Bidimu abi ke bivua bidimu bimpe bitambe buanyi meme!” Muanetu wa balume mukuabu wakamona disanka dia kuikala mu mudimu wa ku dîba ne ku dîba bituadijile ku bunsongalume buende wakalua kuamba ku bukulakaje buende ne: “Bualu ebu budi bunsankisha bikole pandi ngela meji ku tshikondo tshia bunsonga buanyi ne mpeta mushindu wa kuamba mumvua muteleje mubelu wa meji wa ne: ‘Uvuluke [mpindieu] Mufuki webe mu matuku ebe a bunsongalume buebe.’ (Muam. 12:1) Bidi bikengela nutuadije kudiakaja mpindieu, wewe ne baledi bebe, bua kukeba mushindu wa kupeta disanka dia nunku mu bunsonga buebe.

³ Baledi, kankamijayi bana bua mudimu wa ku dîba ne ku dîba: Yehowa udi Tatu udi mumanye kulama bantu, udi ukuleja menemene kua wewe kuya. (Yesh. 30:21) Mu difila buludiki bua dinanga bua nunku, mmufile tshilejilu tshimpe tshidi baledi bena Kristo ne bua kulonda. Pamutu pa kulekela bana badisunguila njila udibu bamone muimpe bua kulonda, ne meji onso nubalongeshe njila udibu ne bua kulonda bua Yehowa kubabeneshaye. Nenku, padibu bakulumpa, dibalongesha dienu nedibambuluishe bua ‘kusungula tshidi tshimpe ne tshidi tshibi.’ (Eb. 5:14) Bantu bakulumpe mbamanyine ku malu akadibu bamone ne: kabena mua kueyemena busunguluji buabu bua malu nkayabu to; badi ne bua kueyemena Yehowa bua alulamije njila yabu. (Nsu. 3:5, 6) Bualu ebu budi ne mushinga bua bansonga kabidi, bualu kabena banji kumonamona mianda mu nsombelu wabu to.

⁴ Baledi, padi bana benu benda basemena ku bidimu bia bunsonga, nansha kumpala kua bidimu ebi, nubambilayi ne lungenyi luimpe malu adi atangila midimu idibu bajinga bua kuenza. Bafidi ba mibelu ba mu tulasa, balongeshi ne balongi nabu nebakebe bumue bua kubasaka bua kusungulabu mudimu kampanda wa panu ne tshipatshila tshia kupeta bubanji. Ambuluisha bana bebe bua basungule tulasa tudi mua kubafikisha bua kumanya mudimu kampanda wa bianza, tudi mua kubambuluisha bua kupeta bintu bia kudikuatshisha nabi kabayi balengulula malu a Bukalenge. (1 Tim. 6:6-11) Misangu ya bungi, tulasa tua bikadilu ne dilonga dia midimu ya bianza bidi mua kuikala bionso bidi bikengedibua bua muntu kumonaye mua kupeta bia kudikuatshisha nabi padiye utuadija mudimu wa bumpanda-njila bua pa tshibidilu.

⁵ Kankamijayi bansonga bua banji kushalaku bajika matuku ndambu. Pikalabu ne bua kulua kuela meji a kusela pashishe, apu nebibambuluishe bua kuambula majitu manene a mu dibaka. (Tangila tshikoso tshia 19 mu tshisakidila tshia Mudimu wetu wa Bukalenge wa Kabalashipu 2001, “Udiku mua kudifila pebe anyi?”) Kuakula ne musangelu bua bumpanda-njila, kuya kuenza mudimu muaba udi dijinga dinene, kuenza mudimu ku Betele ne mudimu wa bu-misionere kudi kupesha bansonga nansha buobu batshikale bapuekele dijinga dia kufila matuku abu a muoyo mu mudimu udi usankisha Yehowa, wambuluisha bakuabu ne ubapetesha ne buobu bine masanka.

⁶ Bansonga, tekayi mudimu wa bumpanda-njila pa muaba wa kumpala: Bansonga, kanuena anu ne bua kudiela nkonko bua kumanya mutu mudimu wa bumpanda-njila to. Nudi mua kuuteta wa mêba makese pa kuenza bumpanda-njila buambuluishi padiku mushindu mu tshikondo tshia tulasa anyi mu matuku a dikisha. Apu neushishe kumanya mudi mudimu wa bumpanda-njila muikale usankisha! Udiku mua kuangata dipangadika dia kuenza bumpanda-njila buambuluishi pankatshi pa ngondo utudi mpindieu ne mikuabu yalonda too ne ku ndekelu kua ngondo wa muanda-mukulu anyi?

⁷ Wewe muikale nsongalume mu bulongolodi bua Nzambi, enza kabidi muebe muonso bua kukumbaja malu malomba bua kulua musadidi wa mudimu. (1 Tim. 3:8-10, 12) Kabidi upangadije bua kumona ni udi mua kuuja dibeji dia dilomba nadi mudimu wa ku Betele anyi bua kubuela mu Kalasa ka Dilongesha Mudimu diakamue paudi ukumbaja bidimu bidi bilombibue. Mudimu webe wa bumpanda-njila neukulongeshe bia bungi, bu mudi mushindu wa kunemeka programe musunguluke, mushindu uudi mua kulengeja malu ebe audi udilongoluela, mushindu wa kusomba ne bakuabu ne wa kumanya mua kuambula majitu a malu kampanda. Bionso ebi nebikuambuluishe bua midimu minene iudi mua kuenza pashishe.

⁸ Bualu bunene budi mua kuambuluisha muntu bimpe mu mudimu wa ku dîba ne ku dîba nkuikala muenji wa mudimu wa menemene mu mudimu wa Nzambi. Mupostolo Paulo wakakankamija lungenyi elu, ne wakatela masanka adi afuminaku wamba ne: ‘Malu onso anudi nuenza, nuenze ne mitshima yenu bu nudi nuenzela Mukalenge, bualu bua nudi bamanye ne: netuangate difutu dia bumpianyi kudi Mukalenge.’ (Kolos. 3:23, 24) Yehowa akubeneshe ne malu malenga a bungi mu mudimu wa ku dîba ne ku dîba!