“Mpindieu ke dîba dikumbanyine menemene”
1 Kuenaku pebe muanji kumvua disanka didi difuma ku butoke bua dipatuka dilenga dia dîba anyi? Nunku, anjibi kuela meji: Pikala Yehowa, Mufuki wa butoke, mujadike dinda dionso dîba didi kabundubundu kadi kafuma ku dimueneka kandamuka butoke bumueneshi bua mekala malenga, ki mbia meji bua kujadikaye kabidi dîba didi banangi ba butoke bua mu nyuma ne bua kuvudija bukenke bua butoke bua bulelela anyi? Udi wambila yonso wa kutudi ne: “Tangila! Mpindieu ke dîba dikumbanyine menemene.”—2 Kol. 6:2, NW.
2 Eyowa, mpindieu ke dîba dia ‘kukenkesha butoke.’ Tudi tukenkesha butoke buetu ne dinkenka dinene bu mudibi bikengedibua anyi? Mu ngondo eyi ya kumpala kua Tshivulukilu, bavule ba kutudi kabiyi mpata nebikale mua kukumbaja mudimu muvule ne kusadila bu bampanda-njila bambuluishi. Tukadiku belangane meji ne muoyo umue pa muanda eu anyi? Tuangate dîba, mu masambila, bua kukonkonona lukonko elu: Ndîba kayi dimvua mpanda-njila muambuluishi bua musangu wa ndekelu? Tumanye bua se: mu ditunga dietu, Bantemu bapiabapia bapite pa 33 000 bavua batambuishibue. Udi pebe umue wa kudibo anyi? Pikalabi nanku, uvua mpokolo wa disanka bua aba bakakumanyisha bulelela ne bua Yehowa, Tatuebe wa mu diulu. Ukadiku mutumike bu mpanda-njila muambuluishi musangu nansha umuepele katshia wangata batismo anyi? Pa kuelangana meji bimpe, udiku mua kuvudija dîba diudi ukumbaja patoke mu difila kudi Yehowa mulambu wa dimutumbisha nawu anyi? Udiku mua kuipatshila bua kulabula disanka dia mudimu wa bumpanda-njila buambuluishi mu ngondo idi kumpala eku anyi? Bidi mene mua kuikala tshisabu tshia dikema bua kukumbaja malomba bua kusadila pashishe bu mpanda-njila wa pa tshibidilu mu ngondo itshivuavua.
3 Tudi tuela meji ne: bana betu ba balume ne ba bakaji bungi buvule nebalabule disanka dia mudimu wa bumpanda-njila buambuluishi, pamue ne bua pa tshibidilu mene. Ne musangelu tudi tulomba bansonga bena nkristo badi bafuma ku dijikija malonga abo, bena dibaka badi kabayi ne bana, bena pasió, pamue ne bamue ba-tatu ne ba-mamu ba mêku mene, bua kuelangana meji pa dibikila edi. Udiele lukonko ludi lulonda elu: “Nsombelu wanyi udi bushuwa umpangisha mua kulabula masanka a mudimu wa bumpanda-njila anyi?”
4 Kukadi siekele mivule, Yezu Kristo wakamba ne: “Nuenu bikale ne ditaba bunene bua lutete lua tshifuankafuanka, nuvua mua kuamba mukuna wawa ne: Umbuka apa, upite kuaka; wowo e kupitawo; bualu nansha bumue kabuvua mua kunupita to.” (Mat. 17:20, Mukenji mulenga) Kudiku tshipumbishi tshipite bunene tshidi mua kupumbisha spiritu munsantu bua kutuambuluisha mua kutshisambuka peshi kutshiumusha bua tuetu kulua bampanda-njila anyi? Kabidi, bu mukadi Armagedon pabuipi, mudimu wa buambi ng’eu udi ne bua kuenjibua ne lukasa luonso pa buloba.
5 Ngondo ya kumpala kua Tshivulukilu mmikumbanyine menemene bua kuenza mudimu muvule. Mu tshikondo etshi, Mukalenge yeye muine wakakumbaja mudimu muvule menemene ku yonso yakenzaye pa buloba. Neumuidikije pebe anyi? Eyowa, mbualu budi butangila yonso wa kutudi bua yeye kudikonkonona. Bushuwa, buonso kabena mua kuikala bampanda-njila; kadi tudi mua kudifundila tshipatshila tshia mpatshi, muntu yonso pa nkayende: etshi tshia kuakaja ngikadilu ne bungi bua mudimu utudi tuenzela Nzambi. Nunku, muntu yonso pa nkayende, tukuate mudimu bua kupeta lumu, mu tshisumbu tshietu, bu bena nkristo banyishi ne badifidi ba mu mudimu wa bumpanda-njila, badi basadila ne anyima wabu mujima. Nansha bikala mudimu wetu bua Nzambi, ku nkomenu wa bulongolodi ebu bua malu, utuangata dîba ne makanda mavule, madikolela atudi tuenza bua kuvudija mudimu wetu wa dienza balongi neutupeteshe mabenesha manenanenayi.—Kubala 1 Timote 4:10.
6 Eyowa, tuvuluke ne: anu bu mudi bukenke bukese menemene bubalakanyi bua pa kabundubundu buandamuka butoke buvulavulayi, bia muomumue Yehowa udi utuleja kakuyi ngelakanyi ne: “mpindieu ke dîba dikumbanyine menemene” bua kuvudija bukenke bua mudimu wetu.