Tufile bumanyishi ku nzubu ne ku nzubu kabiyi kuimana
1 Mu Izalele wa kale, bavua balambula milambu dituku dionso. (Ek. 29:38-42) Kapia ka pa tshilambuilu kavua kalaluka dîba dionso; muishi uvua ubanda uvua “dipembu ditukiji” divua dilengelela Yehowa. (Ek. 29:18, NW) Lelu’eu, tudi balombibue ne disuminyina bua ‘kulambula Nzambi mulambu wa butumbi, mbuena-kuamba ne: mamuma a mishiku idi yenza dimanyisha dia patoke bua dîna diende.’ (Eb. 13:15, NW) Pamutu pa kulambula milambu mimanyisha mu Mikenji, tudi tutendelela Yehowa pa kulonda butumbi buende kabiyi kuimana.—Yesh. 43:21; Bienz: 5:42.
2 Yezu Kristo, Ntemu munene wa katshia ne katshia pa buloba, mmutulongeshe mushindu wa kukumbaja ntendelelu mukezuke pa kulambula milambu ya butumbi. Wakalongesha balongi bende mushinga wa mukenji uvuabo bamanyisha. Uvua mumanye ne: mushindu mupite bulenga wa kumanyisha bantu lumu luimpe uvua kuya ku mabo bua kuakula nabo mpala ne mpala. (Mat. 10:7, 12) Nunku, bapostolo bakalonda mibelu yende mifila ku spiritu wa Nzambi pa kufila bumanyishi ku nzubu ne ku nzubu.—Bienz. 20:20.
3 Mbia muomumue kabidi lelu’eu. Bu mudibo balongi ba Yezu, bena nkristo balelela badi balonda tshilejilu tshiende pa kumanyisha lumu luimpe ku nzubu ne ku nzubu. Pamu’apa mudimu eu udi ubakebela bijanu ne dikengeshibua, kadi, tshidimu tshionso, balongi bapiabapia nkama ya binunu badi badisangisha ne musumba munene; ke tshidi tshileja ne: ke mushindu udi Yehowa musue bua disua diende dikumbajibue. Ke bua tshinyi tudi tunanukila mu mudimu wa buambi.
4 Bulenga bua difila bumanyishi ku nzubu ne ku nzubu: “Nzambi ki mmuena kansungasunga, . . . muntu udi umutshina ne wenza malu makane udi umulengelela.” (Bienz. 10:34, 35, NW) Pa kuya buludi mu dîku dionso dia mu teritware wetu, tudi tudileja bushuwa mutudi katuyi bena kansungasunga ne tupetesha muntu yonso mushindu wa kumvua mukenji wa Bukalenge pa tshibidilu. Aba badi badileja bawuteleji badi bapeshibua diambuluisha dikumbanyine didibo bakengela.
5 Bamanyishi pabuipi ne buonso, pamue ne bansonga, bakulakaje ne bapiabapia mene, badi mua kudifila mu bumanyishi bua ku nzubu ne ku nzubu. Ke mushindu udi buonso benza “dimanyisha dia patoke bua lupandu.” (Lomo 10:10, NW) Bumanyishi bua ku nzubu ne ku nzubu pamue ne bamanyishi bakuabu budi butusuikakaja ku bisuikidi bia dinanga. Ku muine mushindu’eu, budi butuambuluisha bua kuleja dinanukila dietu padiku mpungakanyi peshi buluishi. Pa kuleja patoke ditabuja dietu, tudi tuvua “bena dinaya ba kubandila,” ne nunku tudi tupetesha bantu ba mmuenenu mujalame bua kujingululabo ne: tudi badilongolole bua kulongesha Bible ne badi mua kupetela masanka ku dilongesha edi. (1 Kol. 4:9, NW) Bionso bidi bileja patoke ne: Yehowa udi ubenesha bumanyishi bua ku nzubu ne ku nzubu ne udi utumika nabu bua kusangisha musumba munene mu “nzubu” wende, ntendelelu mukezuke.—Yesh. 2:2-4.
6 Kupita bikondo bikuabu bionso, lelu’eu bantu netu badi bakengela kumvua mukenji wa Bukalenge. Tutungunukayi ne kufila bumanyishi ku nzubu ne ku nzubu katuyi tuimana, too ne pamanyisha Yehowa ne: biakumbanyi. (Yesh. 6:11) Bituenza nunku, netupete difutu: disanka didi difuma ku didifila mu bumanyishi bua ku nzubu ne ku nzubu, mudimu wa mushinga mukole ne muambuluishi mu tshikondo etshi tshia ku nshikidilu.—1 Kol. 15:58.