Tumanyishayi Lumu Luimpe Katuyi Tulekela

¹ Bena nkristo ba kumpala bavua bangata mudimu wabu ne mushinga mukole. Luka udi wamba ne: “Ne dituku dionso mu ntempelo ne ku nzubu ne ku nzubu, bakatungunuka kabayi balekela kulongesha ne kumanyisha lumu luimpe pa Kristo, Yezu.” (Bienz. 5:42, NW) Tshintu nansha tshimue katshivua mua kubakanda, nansha dikengeshibua! (Bienz. 8:4) Bavua bamanyisha bulelela matuku onso.

² Netuambe tshinyi buetu tuetu? Tudikonkayi ne: ‘Ndiku mujadike se: bikondo mbifimpakane anyi? Ndiku mudiakaje bua kutungunuka ne kumanyisha lumu luimpe tshiyi ndekela anyi?’

³ Badi bayisha kabayi balekela: Muanetu wa bakaji kampanda uvua mukuatshike disama dia tuneka uvua mulamina mu tshiamu tshidi tshienza mudimu wa bisulusulu. Kavua mua kufika ku Nzubu wa Bukalenge peshi kubuela mu mpuilu. Kadi uvua muditua mu kumanyisha kua lumu luimpe. Mu mukungulu wa bidimu 37 bivuaye muenze mu tshiamu etshi, uvua muambuluishe bantu 17 bua kumanya bulelela! Mmunyi muakafikaye ku bipeta ebi? Nansha muvuaye kayi mua kuya ku nzubu ne ku nzubu, wakapeta mushindu wa kufila bumanyishi bua mu mpukapuka kudi aba bavuaye upetangana nabu.

⁴ Bana betu ba mu Bosnie bavua bakamangane ne mvita ne makenga. Pabi badi batungunuka ne kuyisha. Ku Sarajevo, bamanyishi badi bapitshisha muayene wa mêba 20 ku ngondo bua kuamba lumu luimpe, ne muntu yonso udi ulombola ku muayene malonga a Bible abidi. Nansha mudi nsombelu wabu mukole, badi bayisha ne balongesha kabayi balekela.

⁵ Bansonga badi pabu ne lukunukunu mu mudimu. Mu Rwanda, bena dîku kampanda dia Bantemu bavua bafidibue mu nzubu kansanga muvua basalayi badiakaja bua kubashipa. Dîku edi diakalomba dianyisha bua kuenza diambedi disambila. Bakabitabila, ne muana mutekete wa bakaji, Deborah, wakenza disambila edi ne dîyi dikole: “Yehowa, lumingu elu, Tatu ne meme tuvua bafile bibejibeji bitanu. Mmunyi mutuapinganyina bantu aba bua kubalongesha bulelela ne kubambuluisha bua kupeta muoyo?” Bua ditabuja diende dikole ne bua dinanga diende bua mudimu, dîku dijima diakasungidibua.

⁶ Mu matuku etu aa, bidi bia mushinga bua kuikala ne lubatshi ku mishindu yonso ya difila bumanyishi ne kukeba aba badi “badiakaje bua muoyo wa kashidi.” (Bienz. 13:48, NW) Kabayi bapua muoyo nsombelu wa muaba udibu, bakulu ba mu tshisumbu badi balongolola bisangilu bia mudimu wa buambi mu bikondo biakane bua bonso, nansha bikala mu dinda, ku mapingaja, anyi ku dilolo. Biena-bualu bia mu Mudimu wetu wa Bukalenge pamue ne miyuki mienza mu Tshisangilu tshia mudimu, mu mpuilu ya tshijengu ne ya distrike mbikondo bitudi tupeta mibelu ne makankamija bidi bitangila mishindu mishilangane ya buambi. Ku lukuabu luseke, batangidi ba tshijengu ne ba distrike badi balongesha bamanyishi buambi bua mu misesu, babaleja mushindu wa kuyisha mu tshijengu tshia bungenda ne badi bakoka ntema pa mishindu mikuabu ya kufila bumanyishi muaba udibu basangana bantu. Bionso ebi bidi bituvuluija ne: tudi ne bua kumanyisha lumu luimpe katuyi tulekela.

⁷ Bapostolo ba Yezu bakamba ne dikima dionso ne: “Katuena mua kulekela bua kuakula pa malu atuakamona ne atuakumvua.” Mmunyi muakafikabu ku dinanukila nansha muvuaku bipumbishi bivule? Bakakeba diambuluisha dia Yehowa, ne wakabatuadiladi, kufikabi ku ne: “bakuujibua bonso ne spiritu munsantu, ne bavua bamba dîyi dia Nzambi ne dikima.” (Bienz. 4:20, 29, 31, NW) Bantu bonso kabena ne diakalenga dia kupeta malu mamonamona adi asankisha mu mudimu to, kadi patuikala tujinga bushuwa bua kumanyisha lumu luimpe katuyi tulekela ne patuikala tudienzeja bua kulumanyisha dituku dionso, Yehowa neatuambuluishe.