Kulekedi kuyisha
1 Misangu mikuabu tudi mua kumona bienza anu bu ne: bakadi benza mudimu mu teritware wetu bikole, kadi kakuyi kupatuka bipeta bia nsongo. Kadi, kudi malu a bungi adi atusaka bua tutungunuka ne kuyishamu.—Mat. 28:19, 20.
2 Luikale tshimanyishilu: Yezu wakamanyisha ne: diyisha dia lumu luimpe divua mua kuikala tshimue tshia ku tshimanyinu tshinene tshia ‘ku nshikidilu kua tshikondo etshi’ ne luvua ne bua ‘kuikala tshimanyishilu ku bisamba bionso.’ (Mat. 24:3, 14) Padi bantu batumona tuyisha lumu luimpe lua Bukalenge, ntshimanyishilu tshinene kudibu. Patudi tumbuka mu tshitupa nkampanda, bamue bantu badi mua kushala bayikila bua tshitutu tulua kuenza mu tshitupa tshiabu atshi mêba a bungi anyi matuku, nansha bikalabu bavua babenga kuteleja. Padi bantu banyisha mudimu wetu, tudi tumvua bukole bua kutungunuka nawu. Tudi tusankisha Yehowa patudi tukumbaja tshidi Bible wamba pa kuyisha ne kumanyisha didimuija dia kabutu kadi pabuipi apa.—2 Tes. 1:6-9.
3 Dinanukila didi ne mushinga: Bu mudi bantu ne bipumbishi bia bungi ne dîba dikese, dinanukila didi ne mushinga bua kumona mua kuambuluisha badi ne dijinga dia kuteleja. Mamu mukuabu uvuabu bakatangila lumingu luonso, wakalua kuitaba bua kuyikila malu a mu Bible panyima tshidimu tshijima. Wakanyisha malu avuaye mumvue bikole ne kuitabaye bua kulonga Bible, kutuadija kubuela mu bisangilu ne matuku makese pashisha kulejaye dijinga dia kutambula.
4 Malu a pa buloba adi ashintuluka bikole, ne mmuenenu wa bantu pende udi ushintuluka. Bantu ba bungi bavua babenge bua kututeleja musangu mushala badi mua kuitaba mpindieu bua kuteleja mukenji wa ditekemena utudi tuyisha. Bikala nansha muntu umue muitaba bua kuteleja mukenji wa Bukalenge, dinanukila dietu ndipatula bipeta bimpe.
5 Bantu ba bungi pa buloba bujima ‘badi bapumuna muoyo ne badi badila bualu bua malu a bundu adi bakuabu benza.’ (Yeh. 9:4) Bipeta bilenga bia mudimu wetu wa diyisha Bukalenge bidi bileja ne: bantu ba muoyo muimpe badi bitaba lumu luimpe lua Bukalenge. (Yesh. 2:2, 3) Nunku, tutungunukayi ne kuyisha katuyi tulekela kuambila bantu “lumu lua diakalengele.”—Yesh. 52:7; Bien. 5:42.