Broshire: biamu bia mushinga bia mudimu
1 Nsenda mupiluke utu wangata pa tshibidilu biamu bia mudimu kabukabu, tshiamu tshionso tshifundila mudimu musunguluke. Tuetu badi bamanyishi ba Bukalenge, tudi ne broshire mivule idi ituambuluisha bua kukumbaja ne meji onso majinga a mu nyuma a bantu batudi tulongesha Dîyi dia Nzambi. (Nsum. 22:29) Pamu’apa tudi mua kupeta muntu udi mubungame. Anyi kabidi muntu udi ukeba mbulamatadi muakane, anyi udi udikonka bikala muoyo eu ne tshipatshila kampanda. Mmunyi mutudi mua kutumika ne broshire yetu bua kubambuluisha?
2 Pa kuleja broshire wa “Dieu se soucie-t-il vraiment de nous?,” udi mua kuamba ne:
◼ “Pa kumona makenga ne dipanga buakane bidi pa buloba bamue bantu badi bela Nzambi tshilumbu pambidi. Badi bamba ne: bu mudi Nzambi muikale wa bukole-buonso, bu yeye bushuwa uditatshisha bua bualu buetu, uvua kujikija makenga etu onso. Udi wela meji kayi? [Lekela muntu andamune.] Musambu wa 72:12-14 udi uleja bushuwa mudi Nzambi uditatshisha bua bualu buetu. Ki nyeye udi mukebi wa makenga ne dipanga-buakane nansha. Udi ulaya ne: benji ba malu mabi nebabutudibue mu katupa kîpi emu. Broshire eu wa Dieu se soucie-t-il vraiment de nous?, udi umvuija tshialuaye kuenza ne mushindu utudi mua kupetelaku masanka.” Pamu’apa udi mua kutungunuka ne diyukidilangana pa kumvuija tshikoso tshia 22 mu dibeji dia 27.
3 Biwatumika ne broshire wa “But de la vie,” udi mua kutuadija diyukidilangana nunku:
◼ “Nansha ku shòò, bantu bonso peshi pabuipi ne bonso badi badiela nkonko pa tshipatshila tshia muoyo. Tudi amu ne bua kulala panu bidimu 70 peshi 80 ne pashishe kufua anyi? Peshi muoyo udi ne tshipatshila? Udi wela meji kayi? [Lekela muntu andamune.] Mu Musambu wa 37:29, tudi tumona dijinga dilenga dia Nzambi bua muntu ne bua buloba.” Mumana kubala mvese, leja tshimfuanyi tshia mu dibeji dia 31, ne umvuija nsombelu utuikala nende mu Mparadizu.
4 Udi mua kutuadija diyuki ne broshire wa “Monayi” pa kuleja tshimfuanyi tshionso tshia pa tshizubu ne kuebeja ne:
◼ “Buebe wewe, bidi bikengela tshinyi bua kukudimuna buloba mushindu’eu? [Lekela muntu umvuije.] Pa tshimfuanyi etshi, muntu yonso udi ne nzubu ne mudimu mulengele. Ditalala didiku, biakudia mbivule ne buloba ki mbunyanga. Nansha mudi mbulamatadi ya bantu iditatshisha ne tshisumi, mmifike ku dijingulula se: kayena mua kuasa bulongolodi bua nunku. Kadi, Bible udi utupesha dishindika dia se: Nzambi ‘neavuije bintu bionso bipiabipia.’ [Bulula broshire mu dibeji dia 30, ne bala Buakabuluibua 21:3, 4.] broshire eu neakuleje tshiudi ne bua kuenza bua kuikala ne muoyo mu bulongolodi bupiabupia ebu.” Pikala muntu uleja bushuwa dijinga dia kumanya bia bungi, ubulule broshire mu dibeji 3, ne umuleje mushindu utudi tulombola dilonga dia Bible.
5 Ne broshire wa “Ikalayi ne muoyo wa kashidi ne disanka pa buloba!,” udi mua kutumika ne ngenzelu eu:
◼ “Bantu ba bungi badi bela meji ne: nebikale ne bua kuya mu diulu bua kupetabu muoyo wa kashidi, kadi udi wela meji kayi bua dikala ne muoyo wa kashidi pa buloba? [Lekela muntu andamune.] Bible udi utushindikila ne: muoyo wa kashidi udi mua kupetshibua, ne udi utuambila mushindu wa kufika ku tshipatshila etshi.” Bala Yone 17:3. Pashishe uleje mukuyukidishi tshimfuanyi tshia 49, ne umuebeje ne: “Udi musue kuikala ne muoyo mu bulongolodi bu ebu anyi?” Leja broshire ne nupunge dîyi bua dikumbulula.
6 Broshire idi yakula pa mapiamapia, yandamuna ku nkonko idi bantu badiela ne ikolesha ku muoyo. Pa kuikala bazanzamuke mu ditumika ne biamu bia mudimu ebi, netuambuluishe bantu ba mmuenenu muakane bua ‘kufikabu ku dimanya dijalame dia bulelela.’—1 Tim. 2:4, NW.