Tukunayi dijinga dia kumanya bia bungi mu makumbulula
1 Mudimu wetu mmufuanyikija menemene ne budimi, ne makumbulula mmafuanyikija ne dimiamina mâyi. (Mat. 13:23; Luka 10:2; 2 Kol. 9:10) Tuetu badi “benzejanganyi ba mudimu ne Nzambi,” tudi ne bujitu bua kuambuluisha mamiinu onso adibu bafuma ku dimiamina bua kukolawu too ne ku dipia ne ku dikuama mamuma. (1 Kol. 3:6, 9) Mmunyi mutudi mua kuenza bimpe mudimu eu?
2 Tuikale badiakaje bua kukumbula tshiakabidi bonso badi baleja dijinga dia kumanya bia bungi. Tutangululayi tshiakabidi note ya ku nzubu ne ku nzubu, ne tupangadike pa tshia kuenza bua batuikala mua kumonangana nabu tshiakabidi ne tshiena-bualu tshituikala mua kuyukidilangana. Misangu mivule tshiena-bualu tshia diyukidilangana netshikale mu diumvuangana ne bituvua bayukile musangu wa kumpala. Tuikale ne luya pamue ne ngenyi mikuabu ya mu Bible ku muoyo ituikala mua kubueja. Bitu bimpe misangu yonso kukuata mudimu ne Bible, bualu udi ne bukokeshi bua kulenga mutshima.—Eb. 4:12.
3 Biwikala mushiye broshire wa “Dieu se soucie-t-il vraiment de nous?,” udi mua kuamba ne:
◼ “Bantu bavule badi bitaba ne muoyo umue se: Nzambi nealue kubutula buloba, eku bakuabu batshina ne: bantu nebabubutule. Udi wela meji kayi? [Lekela muntu andamune.] Bible udi utuambila ne: pamutu pa kubutula buloba, Nzambi neumbushepu dipanga buakane ne neabukudimune bua kuluabu muaba wa ditalala kawuyi ne njiwu.” Koka ntema pa dibeji dia 22 ne bala Nsumuinu 2:21, 22 udibo batele. Pikala muntu uleja dijinga dia kumanya bia bungi, umumvuije mushindu udi dilonga dia Bible dienzeka, anyi umuleje bibejibeji bipiabipia ne nupunge tshikondo bua dikumbulula dikuabu bua kuakula pa bulongolodi bupiabupia bulaya kudi Nzambi.
4 Biwikala mushiye broshire wa “Monayi,” udi mua kuamba ne:
◼ “Mu dikumbula dianyi musangu mushale, tuvua babale mu Bible dilaya dia Nzambi dia kukudimuna buloba Mparadizu mufuanangane ne eu udi muleja mu tshimfuanyi pa tshizubu tshia broshire umvua mukushile. Tudi mua kulabula masanka aa pa kulonga tshidi disua dia Nzambi ne kumanya buenzeji budi nabu disua edi pa nsombelu wetu.” Bala Yone 17:3, pashishe ubulule broshire mu dibeji dia 27, bikoso 52 ne 53. Umvuija mu tshikoso bua tshinyi bidi bikengela kuikala ne dimanya dijalame dia Dîyi dia Nzambi.
5 Mumana kushiya broshire wa “But de la vie” kudi muntu udi munange malu a Nzambi, pamu’apa nebikale bimpe bua kuamba ne:
◼ “Kabiyi mpata, ukadi mutele misangu mivule disambila dia Tatu wetu. Utu wela meji ku tshinyi pautu ulomba Nzambi bua Bukalenge buende bulue?” Panyima pa diandamuna dia mukuyukidishi, utangile bikoso 8 ne 9 mu dibeji dia 26, pashishe ubale Danyele 2:44. Imue misangu udi mua kutungunuka ne diyukidilangana pa kumvuija ne: dilua dia Bukalenge bua Nzambi nediumvuije ndekelu wa bubi ne wa makenga. Ushindamene pa se: bituikala bakane ku mêsu kua Nzambi, netuikale mua kusanka ne muoyo wa kashidi mu Mparadizu pa buloba.
6 Tuvulukayi ne: tudi mua kukumbula tshiakabidi muntu yonso uvua mututeleje, nansha bituikala bamushile mukanda anyi katuyi bamushilewu. Tuenze madikolela bua kulongolola mu lumingu luonso dîba dia kuenza makumbulula. Yehowa neabeneshe madikolela etu a dikolesha dijinga dia kumanya bia bungi ditudi bapete. Madikolela aa akuamishe mamuma bua butumbi buende!—Yone 15:8.