Tufile bumanyishi bupite bulenga

¹ Katshia, mudimu wa buambi kauvua muanji kukengela mitalu bu lelu. Bantu nebatungunuke kuikala ne muoyo anyi kufua bilondeshile ngandamuinu wabo ku lumu luimpe. (1 Pet. 4:5, 6, 17; Buak. 14:6, 7) Ke bualu kayi tudi tukeba amu kukeba mua kufila bumanyishi bupite bulenga. Tudi mua kuenza tshinyi bua kutumika nunku?

² Tudilongolole bimpe: Tusungule mu Mudimu wetu wa Bukalenge wa ngondo eu dileja dikala, buetu tuetu, mua kujula dijinga dia kumanya bivule dia bantu ba mu teritware wetu, ne tuakule pa malu adi atangila nsombelu wabo. Bumue netusungule bua kutumika ne mushindu wetu nkayetu mulongela pa imue ngenyi ne imue mvese itudi bamanye se: mmikumbanyine menemene. Apu, tutabalele bua mbuelelu wetu ajule dijinga dia kumanya bia bungi. (Tangila mu mukanda wa Comment raisonner, mabeji 9-15.) Netusue pamu’apa kuela mutuyukidishi lukonko lua mushinga anyi kumukonka tshidiye wela meji pa bualu kampanda bupiabupia budi basombi ba mu tshitupa atshi bamanye. Bamane kuakaja dileja dietu mu mutu, tudiambulule ne muena mu dîku dietu umue anyi ne mumanyishi udi mua kutupesha mibelu mimpe bua kulubuluka.

³ Tuyukile ne bantu: Tshipatshila tshietu ntshia kumuangalaja mukenji wa mushinga. Tudi mua kuenza nunku pa kutuadija mayukidilangana masheme. Pikala mutuyukidishi mujule milandu kampanda, anyi mutuleje mmuenenu wende pa bualu kansanga, tumuteleje ne ntema. Bidiye wamba bidi mua kutuambuluisha bua kujingulula mvese ya mu Bible ya kutumika nayi bua kumuandamuna ne kuabanyangana nende ditekemena ditudi nadi. (1 Pet. 3:15) Pikala mmuenenu wende kayi mu diumvuangana ne dilongesha dia mu Bible, tudi mua kumuambila ne bukalanga ne: “Bantu ba bungi badi ne mmuenenu wa muomumue ne webe. Kadi anji kumona mushindu mukuabo wa kukonkonona bualu ebu.” Tumubadile mvese umue mukumbanyine ne tumuebeje mudiye umona.

⁴ Tuikale ne programe muakanyine: Bituadilongolola bimpe, kadi kupanga kupetangana ne muntu, kabiakuikala ne dikuatshisha. Lelu’eu, bitu bienzeka misangu ne misangu bua kupeta bantu amu bakese ku mbelu kuabo patudi mu buambi. Pikalabi nanku mu teritware wetu, bua tshinyi kubenga kushintulula programe wetu bua kuya ku nzubu ne ku nzubu padi bantu ba bungi bikale ku mabu? Netumone pamu’apa ne: ndekelu ya mbingu idi bikondo biakanyine bua kukumbula bantu. Imue misangu, bidi mua kuikala munkatshi mua lumingu, nangananga ku mêba a dilolo, kutudi mua kubasangana. Mu bitupa bikuabo, bamanyishi batu bamona bimpe bua kufila bumanyishi mu matuku a dikisha, bualu apu badi mua kumanyisha lumu luimpe kudi bantu bavule. Mu matuku’awu, bantu basombele baleja mpala musanguluke ne batambe kuikala basulakane bua kuyukila. Mbikumbanyine bua kuakula mu mbuelelu yetu pa bidi bibalengelele ne kusuikakaja bitudi tuamba ku tshiena-bualu kampanda tshia mu Bible.

⁵ Tutangile bikala maleja etu malenga: Bamane kushiya muntu, tudiebeje ne: “Ndi mulenge mutshima wende anyi? Ndi mumusake bua kuamba bivuaye wela meji ne ndi mumuteleje anyi? Ndi mumuandamune ne bukalanga anyi? Bilondeshile nsombelu wende, ngenzelu wanyi mmutambe bulenga anyi? ” Bidi mua kuikala ne dikuatshisha bua kupatuka mu buambi ku musangu ku musangu ne mumanyishi mupiluke anyi mpanda-njila ne kulonda ne ntema mivule maleja ende, bionso ebi, ne tshipatshila tshia kufila tuetu nkayetu bumanyishi bupite bulenga.

⁶ Bituikala bazanzamuke mu mudimu wetu, netuikale mua kumanyisha malelela pa bidi bitangila Bukalenge atupetesha mua ‘kupanduka, tuetu ne badi batuteleja.’—1 Tim. 4:16; Nsum. 22:29.