Bukokeshi bua Dîyi dia Nzambi
1 Bible utu ne buenzeji bukole mu nsombelu wa miliyo ya bantu. Bidi bifundamu bidi bisaka bikole ku dienza tshidi tshikengela kupita mukanda kayi wonso mufunda kudi bantu. (Eb. 4:12) Tuanji kutangila tshidiye mutuenzele nkayetu. Bulelela, mushinga wende kawena kufuanyikija.
2 Bantemu ba Yehowa mbalongi banene ba Bible ne bamubingishi. Tudi ne bua kuangata dibala dia Bible bu tshitupa tshia mushinga tshia programe wetu wa teokrasi wa pa tshibidilu, ne kuditeka pa muaba wa kumpala pamutu pa televizio anyi mudimu kayi wonso wa didiolola.
3 Tshibidilu: Tshisamba tshia Yehowa ntshimanye ne: dibala Bible pa tshibidilu didi ne buenzeji bukole. Kukadi bidimu bivule, maleta manene mafunda pa umue wa ku nzubu ya dituta mikanda ya Société ku Brooklyn adi alomba bapitshi se: “Bala Dîyi dia Nzambi, Bible munsantu, ku dituku ne ku dituku.” Bena dîku dia Betele bapiabapia buonso badi ne bua kubala Bible mu kabujima kende tshidimu tshiabo tshia kumpala ku Betele.
4 Nansha bituikala ne midimu ya bungi, tusombele tulonda programe wa ku lumingu wa dibala dia Bible mulongolola bua Kalasa ka mudimu wa teokrasi anyi? Bituikala bamane kupetangana ne ntatu pa bualu ebu, bua tshinyi kubenga kulengeja programe wetu mu Lumungulu emu? Dibala dia Bible dilongolola bua ngondo mujima didi dituadija ne Nsumuinu 21 too ne ku Nsumuinu 31, ke bidi bitufikisha ku dibala mabeji asatu anyi anayi ku lumingu. Bamue badi bapangadika bua kubala katupa kabale ku dituku dionso, pamu’apa mu dindadinda mene anyi dilolo kumpala kua kulala. Nansha bia munyi, budiku mbua wewe kunowa bipeta bia lupandu bidi bifumina ku dibala pa tshibidilu Dîyi dia Nzambi.
5 Tufilayi Bible mu Lumungulu: Bantu ba bungi batshidi baleja kanemu bua Bible ne bikale badiakaje bua kuteleja patudi tubabadilamu amue malu. Mu Lumungulu, netufile Traduction du monde nouveau pamue ne mukanda wa La Bible: Parole de Dieu ou des hommes? Eu mmushindu muimpe wa kuleja bantu ba muoyo mulenga mushinga wa Dîyi dia Nzambi! Tudileje ne musangelu.
6 Tulongolole bijadikilu bia meji bua kuleja bisakidila bidi bisunguluja Traduction du monde nouveau bidi mua kupesha bantu dijinga dia kuikala nende. Tuzangike dikuatshisha diende. Tudi mua kuzangika tshimue tshia ku biena-bualu bidi mu tshitupa tshia “Sujets de conversation bibliques” ne kutshisuikakaja ku mukanda wa La Bible: Parole de Dieu ou des hommes? Tudi kabidi mua kuakula pa mushinga wa index wa mabeji 102 wa miaku ya mu Bible pa kuleja mushindu udiye mua kuambuluisha mubadi bua kupeta mvese idiye mumanye. Bamue bamanyishi nebapangadije pamu’apa bua kuakula pa “Appendice” anyi “Table des livres de la Bible” pa kumvuija mushinga wa bitupa ebi mu dilonga dia Dîyi dia Nzambi.
7 Katupu muoyo bua kuamba ne: Traduction du monde nouveau mmufunda mu Fransé wa buena lelu, ke tshidi tshipepeja ngumvuilu wende. Difuanyikija dia nsongo didi mua kuenjibua ne mivule ya ku nkudimuinu idiku lelu mu Matayi 5:3 ne 1 Kolinto 16:22. Bible wa Traduction du monde nouveau udi utumika ne dîna dia Yehowa misangu 7 210.
8 Bushuwa, Bible udi Dîyi dia Nzambi. Bituamubala, kuitabuja mukenji wende ne kutumikila mibelu yende mu nsombelu wetu, netunowe masanka a bungi. Uvua mufundibue bua kutupesha dimanya ne ditekemena. (Lomo 15:4) Bidi bikengela bua tuetu kumubala dituku dionso ne kuikala badiakaje bua kutumika nende bua kulongesha binetu.