Babidilayi dibala Bible dituku dionso

“Muena disanka mmuntu . . . [udi] usankila mu mikenji ya Yehowa, ne udi ubala mu mikenji yende ne dîyi dia panshipanshi munya ne butuku.”​—MUSAMBU WA 1:1, 2, NW.

1. (a) Ntshimanyinu kayi tshinene tshidi tshimueneka ku luseke lua nzubu wa tshilombuelu tshia Watch Tower Society? (b) Mbipeta kayi biapeteka bitualama mubelu eu ku muoyo?

“BALA DÎYI DIA NZAMBI BIBLE MUNSANTU DITUKU DIONSO.” Mu maleta madiundisha, miaku eyi idi imueneka pa lumue luseke lua nzubu wa tshiapu tshia dipatula Bible ne mikanda idi imumvuija wa Société Watchtower Bible and Tract Society ku Brooklyn, New York. Mubelu eu ki mmufila anu bua bena mu bulongolodi ebu badi bamona tshimanyinu atshi to. Bantemu ba Yehowa mbajingulule se: buobo pabo badi ne bua kuulama ku muoyo. Aba batu babala Bible pa tshibidilu ne bamutumikila buobo bine, badi bababidila malongesha, mibelu, didimuija ne dikeela mu buakane budiye ufila.​—2 Timote 3:16, 17.

2. Mmunyi muakazangika muanetu Russell mushinga wa dibala Bible?

² Bantemu ba Yehowa badi batamba kuanyisha biamu biabo bia mudimu bidi bibambuluisha bua kulonga Bible, kusangisha ne Tshibumba tshia Nsentedi, ne badi batumika nabi pa tshibidilu. Kadi mbamanye se: nansha tshimue tshia ku biambuluishi ebi katshiena tshipingana pa muaba wa Bible to. Mu 1909, Charles Taze Russell, mulombodi wa kumpala wa Watch Tower Bible and Tract Society, wakafundila babadi ba tshibejibeji tshia Tshibumba tshia Nsentedi ne: “Kanupu muoyo se: Bible ke Nshindamenu wetu ne se: nansha mudi biambuluishi bietu ebi bikale bitupetesha kudi Nzambi, bidi ‘biambuluishi’ ne kabiena bipinganyi bia Bible.”

3. (a) Mbuenzeji kayi budi nabo “dîyi dia Nzambi” kudi aba badiakidila? (b) Bena Beroya bavua babala ne balonga Mifundu misangu bungi munyi?

³ Mifundu mienzeja ku spiritu idi ne buondoke ne bukole bidi mukanda mukuabo nansha umue kawuyi nabi. “Dîyi dia Nzambi didi ne muoyo ne bukole, nditue kupita muele wonso wa nseke ibidi ne didi dibuela, difika too ne ku dipandulula dia anyima ne nyuma, ne manungu ne buongo buawo, ne didi difika ku dijingulula meji ne majinga a mutshima.” (Ebelu 4:12, NW) Mulongi Luka, ne musangelu wonso wakela bena Beroya ka-lumbandi, kubabikila bena “mmuenenu muakane.” Kabakazukila anu dipeta mêyi patupu bu muvuawu alongeshibua kudi mupostolo Paulo ne mulunda wende Silase, kadi kabidi ‘ne ntema yonso, bavua bakonkonona Mifundu ku dituku ku dituku’ bua kujingulula bivuabo babalongesha né bivua bishindamena pa Mifundu.​—Bienzedi 17:11, NW.

Dibala Bible dituku dionso

4. Ntshinyi tshidi Mifundu ileja bua misangu idi Bible mua kubadibua?

⁴ Bible ki mmuambe bungi bua misangu itudi ne bua kumubala to. Kadi, udi umanyisha mubelu wa Yehowa kudi Yoshua bua ‘kubala mu mukanda wa Mikenji ne dîyi dia panshipanshi munya ne butuku’ bua kumona mua kuenza malu ne meji wonso ne kulubuluka mu dikumbaja mudimu mumupa kudi Nzambi. (Yoshua 1:8) Udi utumanyisha se: muntu yonso uvua ukokesha bu mukalenge pa Izalele wa kale uvua ne bua kubala Mifundu “matuku wonso a muoyo wende.” (Dutelonome 17:19, NW) Udi usakidila ne: “Muena disanka mmuntu udi kayi muende mu mubelu wa bantu babi . . . Kadi udi usankila mu mikenji ya Yehowa, ne udi ubala mu mikenji Yende ne dîyi dia panshipanshi munya ne butuku.” (Musambu wa 1:1, 2, NW) Kabidi, Evanjeliyo mufunda kudi Matayi udi utumanyisha se: pakabenga Yezu Kristo madikolela avua Satana wenza bua kumubueja mu ditetshibua, Yezu wakatela Mifundu ya tshiena-Ebelu mienzeja ku spiritu, wamba se: “Mbafunde ne: ‘Muntu kêna ne muoyo anu bua diampa nkayadi, kadi bua dîyi dionso dia mukana mua Yehowa.’” (Matayi 4:4, NW) Mmisangu bungi munyi itutu tukengela biakudia bia ku mubidi? Dituku dionso! Kudia biakudia bia mu nyuma dituku dionso nkutamba mushinga bualu kudi ne buenzeji pa matekemena etu bua muoyo wa kashidi.​—Dutelonome 8:3; Yone 17:3.

5. Mmunyi mudi dibala Bible dituku dionso mua kutuambuluisha bua “kuenda mushindu udi muakanyine Yehowa” padi matetshibua akuata ditabuja dietu?

⁵ Yonso wa kutudi utu ukengela kukankamijibua dituku dionso kudi Dîyi dia Nzambi. Dituku dionso​—ku nzubu, ku mudimu, mu tulasa, mu misesu, patudi tuya mu bisalu, mu mudimu wetu wa buambi—​malu a kutantamena adi máláminé ditabuja dietu. Netupite nawu munyi? Netuvuluke ne lukasa luonso mêyi-matuma ne mêyi-maludiki a Bible anyi? Pamutu pa kukankamija didieyemena, Bible udi utudimuija ne: “Nunku, eu udi wela meji ne: mmuimane kuulu, adimuke bua kavu kupona pende.” (1 Kolinto 10:12, NW) Dibala Bible dituku dionso nedituambuluishe bua “kuenda mushindu udi muakanyine Yehowa bua kumulengelela tshishiki” pamutu pa kulekela bulongolodi ebu bututshintshimika mu mushete wabo.​—Kolosai 1:9, 10, NW; Lomo 12:2.

Dikengedibua dia dibalulula Bible

6. Bua tshinyi bidi biakane bua kubalulula Bible?

⁶ Kubala Bible nkushilangane bikole ne kubala mukanda kampanda wa malu mafuanyikija. Malu mavule mafuanyikija adi mamanyike kudi bavule mmalongolola bua kubala musangu umuepele; diakamue padi muntu umanya muyuki udimu ne ndekelu wawu, nanku kakuena kabidi kabingila ka kuubalula. Bishilangane, nansha tuetu bamane kubala Bible misangu mivule, netubabidile bivule pa kumubalulula. (Nsumuinu 9:9) Kudi muntu muena bujinguludi, Mifundu idi misangu yonso anu isakidila diumvuija kampanda dipiadipia. Milayi ya matuku a ku nshikidilu idi yenda imukemesha ku diambuluisha dia bidiye umona, umvua ne malu akamuenzekela ngondo idi panshi eyi. (Danyele 12:4) Bu mudi dimonamona malu mu nsombelu diende dienda dialabala ne wakama ntatu, mubadi wa Bible muena bujinguludi udi wanyisha tshishiki mubelu uvuaye bangabanga mubale pa mutu pa mutu. (Nsumuinu 4:18) Bikalaye ne bubedi bukole, malaya a Bible adi akula bua diumbusha bisama ne dipingajilula makanda a mubidi adi apeta diumvuija diondoke menemene kudiye kupita bangabanga. Padi balunda ba pa muoyo ne bena dîku bangula lufu, dilaya dia dibiishibua ku lufu didi dilua ne mushinga mukole mutambe.

7. Ntshinyi tshidi mua kutuambuluisha patudi tuambula bujitu bupiabupia mu nsombelu, ne mbua tshinyi?

⁷ Udi mua kuikala pa nkayebe mubale Bible ne mutumikile mibelu idimu munkatshi mua bidimu bungi kampanda. Kadi, pamu’apa udi mpindieu wambula majitu mapiamapia mu nsombelu. Udiku upangadija bua kubuela mu dibaka anyi? Udiku mutekemena diledibua dia muana anyi? Mbakomekele bujitu mu tshisumbu bu mukulu anyi musadidi wa mudimu anyi? Udiku mulue mumanyishi wa ku dîba ne ku dîba wa evanjeliyo, ne bikondo bia pa mutu bua buambi ne kulongesha anyi? Mmushindu kayipu wikalabi bimpe bua kubalulula Bible mujima ne majitu mapiamapia aa mu lungenyi!​—Efeso 5:24, 25; 6:4; 2 Timote 4:1, 2.

8. Mmunyi mudi nsombelu itu ishintuluka ileja dikengedibua dia kulonga bivule pa malu atudi tuela meji bu tukavua bamane kuamanya?

⁸ Kale, uvua pamu’apa wenza bimpe mu dileja mamuma a spiritu. (Galatia 5:22, 23) Kadi nsombelu idi ishintuluka idi mua kukutekela kumpala dikengedibua dia kulonga bivule pa ngikadilu eyi ya Nzambi. (Fuanyikija ne Ebelu 5:8.) Kampanda uvua kale mutangidi muena-ngendu wakamona muvuabi bikengedibua bua kulekela mudimu wende wa pa buawu bua kukuba baledi bende bakulakaja wakamba ne: “Mvua ngel’anu meji se: mvua ngenza bimpe mu dileja mamuma a spiritu. Mpindieu ndi ndiumvu’anu bu ntshidi ntuadijilula malu wonso.” Bia muomumue, balume ne bakaji badi bena dibaka nabo ne bubedi bukole bua ku mubidi anyi bua mu mpampakenu badi mua kujingulula se: mu dikuba diabo, kanyinganyinga katu pamu’apa kabatekeshisha mu mikolo. Dibala Bible pa tshibidilu didi mpokolo wa dikankamija ne diambuluisha.

Dîba didi dibala Bible mua kuenjibua

9. (a) Ntshinyi tshidi mua kuambuluisha muntu udi ne bivule bia kuenza bua kupeta dîba dia kubala Bible dituku dionso? (b) Bua tshinyi dibala Dîyi dia Nzambi didi nangananga ne mushinga bua bakulu?

⁹ Bushuwa, bua bantu badi ne bivule bia kuenza, kupeta dîba dia kuenza bualu bukuabo bua pa mutu pa tshibidilu mmuanda mukole. Kadi, tudi mua kubabidila tshilejilu tshia Yehowa. Bible udi usokolola se: utu wenza bintu mu ‘tshikondo tshijadika.’ (Genese 21:2; Ekesode 9:5; Luka 21:24; Galatia 4:4) Dileja dianyisha bua mushinga wa dibala Dîyi dia Nzambi pa tshibidilu didi mua kutuambuluisha bua kusungula tshikondo bua dibala adi mu programe wetu wa ku dituku dionso. (Efeso 5:15-17) Nangananga bakulu badi ne bua kuteka ku luseke dîba bua kubala Bible pa tshibidilu, bua mibelu idibo bafila ikale mu bululame buonso mishindamena pa mêyi-maludiki a mu Bible ne bua mmuenenu walejabo afunkune “meji a kuulu.”​—Yakobo 3:17; Tite 1:9.

10. Ndîba kayi didi aba badi babadi ba Bible dituku dionso bapeta tshikondo tshia kubala?

¹⁰ Bavule badi balubuluka mu dikumbaja programe wa dilonga dia Bible dia muntu pa nkayende batu babala kumpala kua dîba mu dinda bangabanga ne kutuadijabo midimu yabo ya buatshia-buila. Bakuabo badi bamona se: bidi biakane bua kuenza nunku pa tshibidilu mu tshikondo tshikuabo. Bible mukuate pa tusete (miaba idiye mua kupetshibua) udi wambuluisha benji ba ngendu bua kubabidila biakane tshikondo tshia ngendu, ne bamue Bantemu batu batuteleja patubu benza midimu yabo ya buatshia-buila ku nzubu. Programe ivua mipatule bipeta bimpe kudi Bantemu bashilashilangane ku Mputu, mu Afrika, ku Amerike wa ku Nord, Amerike wa ku Sud, ne ku Orient mmilejibue mu mabeji a 20 ne 21, mu tshiena-bualu “Dîba ditubo badienza ne mutubo badibabidila.”

11. Mmunyi mudi dibala dia Bible dituku dionso mua kuenjibua nansha pikalaku anu dîba dikese?

¹¹ Tshidi ne mushinga ki mmushiki wa mêba awudi upitshisha mu dibala diebe dia Bible mu tshikondo kayi tshionso to, kadi ndienzekanzeka diadi pa tshibidilu. Neubimone bifuta bua kubala munkatshi mua dîba dimue anyi mavule pawudi musombe, wenza makebulula a pa mutu ne udina ne kasuki mu biudi ubala. Kadi programe webe udiku ukupetesha mushindu wa kuikala ubala pa tshibidilu anyi? Pamutu pa kupitshisha dituku dijima kuyi ubala Bible, ki mbimpaku nansha bua kubala bua minute 15 peshi 5 anyi? Bivuija dipangadika diebe bua kubala dituku dionso Bible. Pashishe sakidila ku dibala adi dikebulula diondoke padiku mushindu.

Ngenyi kabukabu bua mbadilu wa Bible

12. Mprograme kayi wa dibala Bible udi nende bapiabapia bena mu dîku dia Betele ne balongi ba Galaad?

¹² Izalele mu Sinai udi uditshipa kudi Yehowa Kudi mishindu mivule idi Bible mua kubadibua. Bidi bimpe bua kumubala bituadijile ku Genese too ne ku Buakabuluibua. Bena dîku buonso ba Betele badi basadila ku tshilombuelu tshia bukua-matunga peshi ku umue wa ku filiale ya Société mbalombibue bua kubala Bible mujima mu tshidimu tshiabo tshia kumpala mu mudimu wabo ku Betele. (Abi bitu pa tshibidilu bilomba dibala nshapita isatu too ne ku itanu, bilondeshile bule buayi, anyi mabeji anayi peshi atanu ku dituku dionso.) Balongi ba Kalasa ka Bible ka Galaad ka Watchtower batu pabo ne bua kubala Bible mujima bangabanga ne kupeta mapolome abo. Bidi bitekemenyibua se: ebi nebibambuluishe bua kuvuija dibala dia Bible dituku dionso tshitupa tshia mu nsombelu yabo.

13. Ntshipatshila kayi tshidi tshilombibue bua Bantemu bapiabapia batambule?

¹³ Bidi bimpe bua Bantemu batambule bapiabapia bua badifundile tshipatshila tshia kubala Bible mujima. Mu 1975, mu tshikondo tshivuaye udilongolola bua batismo, nsongalume kampanda mu France wakebejibua kudi mukulu kansanga né uvua ne programe musunguluke wa dibala Bible. Bituadijile apu utu ubala tshidimu tshionso Bible mujima, ubienza pa tshibidilu mu dinda kumpala kua kuya ku mudimu. Bu tshipeta, udi wamba ne: “Ndi mufike ku dimanya Yehowa bilenga bitambe. Ndi mua kujingulula mushindu udi bintu bionso bidiye wenza bikale mu diumvuangana ne dilongolola diende ne mushindu utuye wandamuna patu ntatu ijuka. Ngajinguludi mudi Yehowa muakane ne muimpe mu bienzedi biende bionso.”

14. (a) Bua kumona mua kutuadija programe wa pa tshibidilu wa dilonga Bible wa muntu pa nkayende, ntshinyi tshidi tshikengedibua? (b) Ntshinyi tshidi mua kutuambuluisha bua kuvuluka ka-bujima ka mukanda wonso wa mu Bible patudi tuubala?

¹⁴ Ukadiku mubale Bible mujima anyi? Bikalabi kabiyi nanku, etshi ntshikondo tshimpe tshia kutuadija. Enza programe musunguluke, pashishe umunemeka. Shindika bungi bua mabeji anyi bungi bua nshapita biwabala dituku dionso, anyi shindika bungi bua mêba buwapitshisha ne dîba diwabienza. Muntu yonso kakufika ku dibala Bible mujima mu tshidimu tshijima, kadi bualu bua mushinga mbua kubala Dîyi dia Nzambi pa tshibidilu, kuenza nunku dituku dionso pikalaku mushindu. Pawudi ubala Bible, udi mua kujingulula mushinga wa imue mikanda ya bikebelu idi yambuluisha bua kujamija mu lungenyi luebe, ka-bujima ka bidi bifundibua. Bikala mukanda wa Insight on the Scriptures muikala mu muakulu wenu, nenku bangabanga ne kutuadija dibala mukanda kampanda musunguluke wa mu Bible, anji konkonona tshikepeshilu tshia biena-bualu biawu binene bidi mukanda wa Insighta mufile. Bambisha nangananga biena-bualu bidi bifunda ne maleta mafikisha. Peshi tumika mushindu wa muomumue ne bikepeshilu bialabale bidi mu mukanda wa “Toute Ecriture est inspirée de Dieu et utile.”b

15. (a) Nngenyi kayi idi mifidibue mu mabeji a 16 ne 17 idi mua kuambuluisha bua kulengeja dibala dietu dia Bible? (b) Pamutu pa kudingidija kubala anu mabeji bungi kampanda, nku bualu kayi bunene kutudi ne bua kutamba kukoka ntema?

¹⁵ Dibala dilondangane dia Bible ndiakane, kadi kulu patupu mubadi wa tshidingishilu wa pa tshibidilu. Kubadi amue mabeji bungi kampanda dituku dionso anu bua kuamba se: udi mubala Bible wonso nkong tshidimu tshionso. Anu bu mudibi bilejibue mu kazubu ka “Ngenyi bua kulengeja dibala diebe dia Bible” (mabeji a 16 ne 17), kudi mishindu mivule iudi mua kubala ne kuanyisha Bible. Nansha biwatumika ne ntumikidi kayi, ikala ne dishindika dia se: udi udiisha tshieledi tshia lungenyi ne mutshima biebe.

Peta lumvu lua biwudi ubala

16. Bua tshinyi bidi bia mushinga bua kuangata dîba dia kueleela meji pa bitudi tubala?

¹⁶ Pavuaye ulongesha balongi bende, Yezu wakazangika mushinga wa lumvu lua bivuaye wamba. Tshivua ne mushinga, katshivua anu lumvu lua pa mutu pa mutu to, kadi dipeta diabo dia “lumvu luabi ne mitshima yabo” bua kumonabo mua kubitumikila mu nsombelu yabo. (Matayo 13:14, 15, 19, 23) Tshidi ne mushinga kudi Nzambi ntshidi muntu menemene munda, ne etshi ke mutshima. (1 Samuele 16:7; Nsumuinu 4:23) Nenku, kusakidila ku dikala ne dishindika dia se: tudi tujingulula bidi mvese ya Bible yamba, tudi ne bua kueleelapu meji, kuangata ne mushinga tshidiyi itulomba mu nsombelu yetu nkayetu.​—Musambu wa 48:9; 1 Timote 4:15.

17. Ng’imue nseke kayi itudi mua kueleela meji pa bitudi tubala mu Mifundu?

¹⁷ Enza madikolela bua kusunguluja mêyi-maludiki manene adi mu miyuki ya Bible bua kumona mua kutumika nayi mu nsombelu iwudi wakama. (Fuanyikija ne Matayo 9:13; 19:3-6.) Paudi ubala ne weleela meji pa ngikadilu ya mpatshi ya Yehowa, babidila tshikondo atshi bua kushemeja malanda nende, kukolesha munda muebe nkayebe nyanji mikole ya dinemekela Nzambi. Paudi ubala mêyi adi atangila dilongolola dia Yehowa, konkonona tshiudi mua kuenza mu diumvuangana nawu. Pawudi ubala mubelu kampanda buludiludi, pamutu pa kudiambila nkayebe ne: ‘Ndi muumanye,’ udiebeje ne: ‘Ntuku ngenza tshidibo bamba etshi anyi?’ Pikalabi nanku, udiebeja ne: ‘Mmu mishindu kayi mundi mua kubienza “menemene tshishiki?”’ (1 Tesalonike 4:1, NW) Paudi ulonga malu adi Nzambi ulomba, bambisha kabidi bilejilu bidi mu Bible bia bantu bakenza malu mu diumvuangana ne malu malomba aa ne aba bavua kabayi benza nanku. Bambisha bua tshinyi bakalonda njila awu ne tshipeta tshiakapatuka. (Lomo 15:4; 1 Kolinto 10:11) Paudi ubala malu adi atangila muoyo wa Yezu Kristo, uvuluka se: Yezu ke udi Yehowa mupe bumfumu ku mutu kua buloba bujima; babidila tshikondo atshi bua kukolesha munda muebe dindila ne muoyo kulukulu dia bulongolodi bupiabupia bua Nzambi. Konkonona kabidi mishindu iwudi mua kuidikija tshishiki Muana wa Nzambi.​—1 Petelo 2:21.

18. Mmunyi mutudi mua kutshintshika dibala dia Bible ne ditumika dietu ne bintu bidi bituambuluisha bua kulonga bitudi tupetela ku butuangaji bua “mupika wa lulamatu ne wa budimu”?

¹⁸ Bushuwa, dibala diebe dia Bible kadiena ne bua kupingana pa muaba wa dilonga diebe dia bintu bitudi bapeta ku butuangaji bua “mupika wa lulamatu ne wa budimu.” Abi pabi bidi munkatshi mua bintu bia kudi Yehowa​—bia mushinga menemene. (Matayi 24:45-47, NW) Ikala ne dishindika dia se: dibala Dîyi dia Nzambi pa tshibidilu dikale nkayadi ne muaba munene mu muoyo webe. Pikalaku mushindu, “BALA DÎYI DIA NZAMBI BIBLE MUNSANTU DITUKU DIONSO.”

[Mêyi adi kuinshi]

Mmunyi muudi mua kuandamuna?

◻ Bua tshinyi bidi biakane bua kubala bimue bitupa bia Bible dituku dionso?

◻ Bua tshinyi tudi ne bua kubala ne kubalulula Bible?

◻ Mu programe webe, ntshikondo kayi tshidi tshimpe bua kubala Bible?

◻ Paudi ubala Bible ubalulula, ntshinyi tshiudi mua kusakidila ku programe webe wa dibala?

◻ Bua tshinyi bidi bia mushinga bua kueleela meji pa biudi ubala?

[Kazubu mu mabeji 16, 17]

Ngenyi bua kulengeja dibala diebe dia Bible

(1) Bantu bavule batu babala mikanda ya Bible bilondeshile dilondangana ditubu bayifunda pa tshibidilu, kumbukila ku Genese too ne ku Buakabuluibua. Udi kabidi mua kuyibala bilondeshile muvuayi ilondangana ku tshibangidilu pakayifundabo. Uvuluke se: Bible nsangilu wa mikanda 66 mifundisha kudi spiritu, tshilaminu tshia mikanda ya Nzambi. Bua mbadilu mushilangane, udi mua kusua kubala imue mikanda idi ileja malu a kale, pashishe imue idi nangananga ne milayi, bayitua mu nyima kudi imue idi mikanda mituma bua kufila mibelu, pamutu pa kulonda patupu dilondangana dia mabeji. Shala mumanye dilondangana dia biudi mubale, ne bala Bible mujima.

(2) Kunyima kua dibala tshitupa kampanda tshia Mifundu, udiebeje tshiditshi tshisokolola pa bidi bitangila Yehowa, dilongolola diende, ngenzelu wende wa malu; mushindu udibi ne bua kuikala ne buenzeji pa nsombelu webe; mushindu uudi mua kutumika nabi bua kuambuluisha bantu bakuabo.

(3) Bu kaludiki, tumika ne mabeji adi ne mamanyisha adi aleja “Mianda minene ya mu muoyo wa Yezu pa buloba” mipatula muinshi mua tshiena-bualu tshia “Jesus Christ” mu mukanda wa Insight on the Scriptures (kabidi ne mu wa “Toute Ecriture est inspirée de Dieu et utile”), bala miyuki idi yakula malu a muomumue ya tshitupa tshionso tshia Evanjeliyo, umue kunyima kua mukuabo. Sakidila ku dibala edi, pa kutangila bitupa bikumbanangane nadi mu mukanda wa Le plus grand homme de tout le temps.

(4) Paudi ubala mu Bienzedi bia bapostolo malu a muoyo wa Paulo ne mudimu wende wa buambi, ubale kabidi mikanda idi yakula malu a muomumue yakafundaye ku buenzeji bua spiritu. Nenku, padibo batela bimenga kabukabu anyi rejon muakenzela Paulo mudimu wa buambi, anji imana ne bala mikanda yakaluaye kufundila kunyima bena nkristo nende ba miaba ayi. Bidi kabidi ne dikuatshisha bua kulonda pa kalata ngendu yende, bu mudi aka kadi munyima mua dibeji dia ndekelu dia Bible wa Traduction du monde nouveau.

(5) Mu dibala diebe dituadijile ku Ekesode too ne ku Dutelonome, bala mukanda mutumina bena Ebelu bua kupeta diumvuija dia bitembelu bia bu-profete bivule. Muinshi mua “Law (Mikenji)” mu Insight on the Scriptures, tangila dibeji didi ne mamanyisha pa “Amue malu a mu Tshiovo tshia Mikenji.”

(6) Paudi ubala mikanda idi ne milayi, angata dîba bua kukonkonona malu a kale a mu Bible adi mu diumvuangana nayi. Tshilejilu, paudi ubala mukanda wa Yeshayi, konkonona tshidibo bamba muaba mukuabo pa bidi bitangila bakalenge Uziya, Yotame, Ahaza, ne Hezekiya, badibo batela mu Yeshayi 1:1. (2 Bakelenge, nshapita wa 15-20; 2 Kulondolola, nshapita wa 26-32) Peshi paudi ubala Hagai ne Zakariya, angata dîba bua kukonkonona bidi bisanganyibua mu mukanda wa Ezela.

(7) Sungula mukanda wa Bible, bala tshitupa tshiawu (pamu’apa nshapita mujima), pashishe enza makebulula, pa kutumika ne Index des Publications de la Watch Tower peshi ne Tshilaminu tshia mikanda tshia Watchtower tshilamina mu ordinatere pikalatshi mu muakulu wenu. Tumikila malu aa mu nsombelu webe nkayebe. Tumika nawu mu miyuki ne mu mudimu wa budimi. Pashishe uye ku tshikuabo tshitupa.

(8) Pikalaku mukanda kampanda mupatula kudi Watch Tower udi ufila mumvuija pa mukanda kansanga wa Bible anyi pa tshitupa tshiawu, ikala pa tshibidilu utapamu dîsu paudi ubala tshitupa atshi tshia Bible. (Tshilejilu: pa Musambu wa Solomo, Tshibumba tshia Nsentedi tshia mu dia 15 Lumungulu 1958, mabeji a 148-154 (mu fransé); pa Yehezekele, “Les nations sauront que je suis Jéhovah​—Comment?”; pa Danyele, “Que ta volonté soit faite sur la terre” anyi Le futur gouvernement universel​—le Royaume de Dieu; pa Hagai ne Zakariya, Le paradis rétabli parmi les hommes​—grâce à la Théocratie!; pa Buakabuluibua, La Révélation: le grand dénouement est proche!)

(9) Paudi ubala, keba imue ya ku mvese ya difuanyikija. Tabalela mvese 320 ya mu Mifundu ya tshiena-Ebelu idi mitedibue buludiludi mu Mifundu ya tshiena-Greke ya bena nkristo ne nkama mivule ya mvese mikuabo idi mifunkunyibue, bia muomumue ne mishindu ya kutumika nayi idi milejibue. Mvese ya difuanyikija idi ifunkuna dikumbana dia milayi idi mu Bible, tunungu ku tunungu tua malu a nsombelu ya bantu ne malu a miaba pamue ne ngenyi mifuanangane idi mua kutokesha diumvuija dia biambilu bidi pamu’apa bikukolela bua kujingulula.

(10) Tumika ne nkudimuinu wa New World Translation of the Holy Scriptures​—udi ne mumvuija kuinshi ku mabeji, pikalayiku mu muakulu wenu, konkonona note kuinshi kua mabeji ne biena-bualu bia pa mutu (appendice) bidi biumvuangana ne malu audi ubala. Ebi bidi bileja nshindamenu wa dikudimuna ditumika nadi ne mishindu mikuabo idi biambilu bia mushinga mukole mua kukudimunyibua. Mbimpe kabidi bua kufuanyikija mushindu udi imue mvese mikudimunyibue mu mikuabo nkudimuinu ya Bible.

(11) Paudi ujikija kubala nshapita wonso, funda mu tshikoso ngenyi minene ya mu nshapita awu. Tumika nayi bu nshindamenu wa diambulula ne dieleela meji biwavua kuenza pashishe.

(12) Paudi ubala Bible, enza tshimanyinu ku mvese iudi usungula iwudi nangananga musue bua kuvuluka, peshi uyifunde mu mabeji a karné ne uyiteke muaba uwikala ne bua kuyimona dituku dionso. Uyikuate ku muoyo; eleelapu meji; tumika nayi. Kutetshi bua kukuata ku muoyo mvese mivule musangu umue to, pamu’apa mvese umuepele peshi ibidi ku lumingu luonso; pashishe sungula mvese mivule musangu walonda pawabala Bible.

[Bimfuanyi mu dibeji 15]

Utuku ubala Bible peshi uteleja tusete tuende dituku dionso anyi?