Dîba ditubo badienza ne mutubo badibabidila

Pa kabundubundu:

Bena dibaka kampanda babidi, bubidi buabo batu batumika kule ne nzubu wabo, bakapangadija bua kujuka mu bulalu minite dikumi kumpala dinda dionso ne kubabidila dîba adi bua kubala Bible pamue bangabanga ne kupatuka. Bitubo babala bitu bibapetesha nshindamenu bua diyukidilangana dimpe, kunyima kua diumbuka ku nzubu.

Mukulu kampanda ku Nigeria utu utumika ne programe mufila bua Kalasa ka Mudimu wa Teokrasi bu nshindamenu wa dibala Bible dia bena dîku mu nzubu wende. Batu babala tshitupa tshiende dituku dionso kunyima kua dikonkonona mvese wa dituku, pa tshibidilu mu dinda. Bana batu babala bashilangana bimue bia ku bitupa bia Bible bidibo babalomba bua kubala. Pashishe, badi babalomba bua kuela nkonko pa mvese mibala.

Mamu kampanda mu Japon mmubale Bible mujima musangu umue tshidimu tshionso katshia ku 1985. Programe wende utu wa kubala bua minite 20-30 bituadijile pa dîba itanu wa dinda dituku dionso. Bua bipeta, udi wamba ne: “Ditabuja dianyi ndikoleshibue. Bidi bingambuluisha bua kupua muoyo bubedi buanyi ne kushindika lungenyi pa ditekemena dia Mparadizu.”

Muanetu kampanda wa bakaji udi bayende kayi Ntemu ukadi mupitshishe bidimu 30 bu mpanda-njila, utu ujuka pa dîba 5 wa dinda dionso bua kubala Bible. Programe wende utu ulomba dibala mabeji bu anayi mu Mifundu ya tshiena-Ebelu, nshapita mujima mu Mifundu ya tshiena-Greke ya bena nkristo, ne mvese umue mu Nsumuinu. Tshidimu tshionso mmubale Bible mujima bituadijile mu 1959. Udi wamba ne: “Bu tshipeta tshia dibala dianyi, ndi ndiumvua munangibue kudi Yehowa . . . Ndi mpeta dikankamijibua, disambibua, ne mibelu.” Udi usakidila ne: “Kubala Bible kudi’anu bu kupetulula makanda a kudi Yehowa dituku dionso mu nsombelu wanyi.”

Muanetu kampanda wa bakaji udi mulongele bulelela mu ditunga didibo bakandike mudimu wa Bantemu ba Yehowa udi kabidi ne mulume utu uluisha mitabuja ende. Utu ufika ku dibala Bible bituadijile mu Dimue too ne mu Ditanu, pankatshi pa dîba 6 ne 7 wa dinda. Kuenza nunku nkumupeteshe bukole munda muende. Bua kuleja buenzeji budi dibala diende nadi kudiye, udi wamba ne: “Tudi tulonga mua kunanga Yehowa ne Yezu ne kuikala ne disanka mu nsombelu, nansha mudiku malu ne ntatu mivule, bamanye se: malaya a Yehowa kaatu apangila.”

Muanetu kampanda wa bakaji wakabuela mu Kalasa ka Mudimu wa Bumpanda-njila uvua mupangadije bua kuenza malu mu diumvuangana ne mibelu mifidibue bua kuvuija dibala dia Bible muanda wa kutumikila dituku dionso. Ku ntuadijilu, wakafika ku dienza dibala diende pankatshi pa dîba 5 ne 6 wa dinda. Padi dîba dia mudimu didibuejakajamu, udi udienza pankatshi pa dîba 9 ne 10 wa butuku. Padi nsombelu mikuabo mikole ijuka, udi wamba ne: “Ntu ngakaja programe wanyi bilondeshile nsombelu ayi.”

Munkatshi mua dituku:

Bana ba muntu babidi ba bakaji badi bena dîku dia Betele ku Brésil batu ne tshibidilu tshia kubala Bible pamue dituku dionso minite 20 kunyima kua didia dia midi. Mbabale Bible mujima misangu bu 25 mijima; nanku badi bamba ne: “Tutu pa tshibidilu tusangana tshintu kampanda tshipiatshipia, nunku, dibala diabo dia Bible kaditu ditondesha to.”

Muanetu kampanda wa bakaji mujike mu Japon wakajingulula se: nansha muvuaye mukolesha bu Ntemu, kavua mumanye bimpe Mifundu; pakaluaye mpanda-njila, wakangata dipangadika dia kubala Bible pa tshibidilu. Lelu’eu utu wenza dibala diende bua Kalasa ka Mudimu wa Teokrasi patuye uya mu lupitadi bua kudiondapisha dituku dimue ku lumingu luonso. Pashishe, ku nzubu, utu ubilondakaja ne makebulula. Ku ndekelu kua lumingu, utu wenza dikuabo dibala dia Bible, usungula mikanda bilondeshile mutuyi milondangane.

Nsongalume kampanda wa bidimu 13 ukadi mumane kubala Bible mujima misangu isatu utu mpindieu ubala nshapita mujima dituku dionso kunyima kua kalasa patuye walukila ku nzubu. Kuenza nunku, ke mudiye wamba, nkumuambuluishe “bua kudiumvua ne dinanga divule bua Yehowa.”

Ntemu kampanda udi ne bivule bia kuenza mu programe wende bu muenji wa mudimu wa ku mubidi, mukulu, mulume musela, ne tatu wa bana utu uteleja Bible mukuate pa tusete patuye uya ku mudimu mu kawulu. Pashishe, ku nzubu, utu ubala Bible pa nkayende mushindamene pa nshapita imue imue ivuaye muteleja.

Kusakidila ku dibala diende dia muntu pa nkayende, mpanda-njila kampanda mu France utu uteleja Bible mukuate pa tusete patuye ulamba biakudia, patuye wendesha mashinyi, patuye ne ntatu, peshi pamu’apa anu bua disanka patupu.

Nsongalume kampanda wa bidimu 21 mpanda-njila mu Japon udi uvuluka se: bituadijile patshivuaye ne bidimu bisatu, mamuende uvua umulomba anu kumulomba bua ikale ubala tshintu kampanda tshia malu a mu nyuma dituku dionso, ne mmubale Bible dituku dionso, nansha mutubi kabiyi anu dîba dimue dimue. Kunyima kua mumane kubala bitupa bivuaye musungula bua dituku adi, udi wenza muende muonso bua kubalulula mvese ya nshindamenu, ne pashishe utu wangata minite mikese bua kuambulula ku muoyo malu adiye mubale.

Ntemu mukuabo, mpanda-njila, ukadi mubale Bible mujima misangu bu dikumi mu bidimu 12 bishale. Bu mudi bayende kayi muena kuitabuja, mmulongolole programe wende bua kuikala ubala Bible mu mapingaja.

Ku dilolo:

Mukulu kampanda udi mpanda-njila wa pa tshibidilu mu Japon utu ubala Bible wende butuku buonso kumpala kua kulala, mmuenze nunku bua bidimu muanda-mukulu bishale. Udi wamba ne: “Ndi munange bikole bitambe nangananga mvese itu ileja ngelelu wa meji wa Yehowa, mushindu utuye udiumvua pa bidi bitangila malu, ne mushindu utuye upita ne mianda. Pa kueleela meji pa mvese eyi, ndi muambuluishibue bua kuikala ngela meji anu bu mutu Yehowa wenza, ne kuambuluisha bana betu bena nkristo balume ne bakaji pamue ne bena dîku dianyi.”

Mukulu kampanda mu France utu ubala Bible dilolo dionso bua dîba dimue bituadijile mu 1979. Utu misangu mivule ne nkudimuinu itanu anyi isambombo miteka kumpala kuende bua kuikala uyifuanyikija. Udi wamba se: dibala diende dienza ne ntema ndimuambuluishe bua kujingulula “mua kutumika ne dimanya dia mu Bible mu nsombelu ya buatshia-buila.” Kuenza nunku kutu kabidi kumupetesha mushindu wa kupatula bipeta bimpe patuye ufila mibelu miangatshila mu Mifundu.

Bua bidimu 28 bishale, muanetu kampanda wa balume mu Nigeria uvua ne tshibidilu tshia kubala ku dilolo mvese idi mifidibue mu Tukonkononayi Mifundu dituku dionso bua dikonkonona mu dinda dia dituku dialonda. Kupit’apu, udi ubala nshapita mujima mudibo bayangatshile [mvese]. Kunyima kua disela diende, wakatungunuka ne tshibidilu etshi, ubala ne ushintakaja ngenyi ne mukajende.

Mushikankunde kampanda udi baledi bende kabayi Bantemu utu ne tshibidilu tshia kubala munkatshi mua minite itanu too ne dikumi bangabanga ne kuya kulala. Minite eyi nya mushinga mukole kudiye, ne utu usambila kumpala ne kunyima kua dibala. Tshipatshila tshiende ntshia kumanya mukenji uvua Yehowa mutumine yonso wa ku bafundi ba Bible bua kufunda.

Muanetu kampanda wa balume musela, udi mu mudimu ku Betele, udi wamba se: mmubale Bible mujima musangu umue tshidimu tshionso bua bidimu muanda-mukulu bishale. Utu ubala bua minite 20-30 bangabanga ne kuya kulala. Nansha patuye muzengele, utu umona se: bu yeye mua kuya kulala kayi muenze dibala, kena mua kupeta tulu. Udi ne bua kujuka ne kukumbaja dikengedibua edi dia mu nyuma.