Itaba Bible bua tshidiye menemene

“Tudi kabidi tuela Nzambi tuasakidila dîba dionso, bualu panuakapeta dîyi dia Nzambi, dinuakatelejila kutudi, nuakaditaba ki mbu dîyi dia bantu, kadi, anu bu mudidi menemene, bu dîyi dia Nzambi, didi kabidi mu ditumika munudi nuenu bena kuitabuja.”​—1 TESALONIKE 2:13, NW.

1. Mmamanyisha a mushindu kayi adi mu Bible adi avuija mukanda eu wa mpatshi?

BIBLE Munsantu mmukanda udi mutamba kukudimunyibua ne mutambe kuabanyibua pa buloba bujima. Mmumanyike bu umue wa ku mikanda ya mpatshi mifunda. Kadi, kupita apu, Bible udi upetesha buludiki budi bantu ba makoba wonso ne matunga wonso bakengela ne diluijakana, nansha buobo benza mudimu anyi bikale ne muanzu kayi mu nsombelu. (Buakabuluibua 14:6, 7) Mu mushindu udi ulenga tshieledi tshia lungenyi ne mutshima, Bible udi wandamuna nkonko bu mudi: Muoyo udi ne tshipatshila kayi? (Genese 1:28; Buakabuluibua 4:11) Bua tshinyi mbulamatadi ya bantu ki mmifike ku dibueja ditalala ne dikubibua bia kashidi? (Yelemiya 10:23; Buakabuluibua 13:1, 2) Bua tshinyi bantu batu bafua? (Genese 2:15-17; 3:1-6; Lomo 5:12) Mu bulongolodi ebu busaluke, mmunyi mutudi mua kutshimuna ntatu ya mu nsombelu? (Musambu wa 119:105; Nsumuinu 3:5, 6) Matuku atshilualua mmatulamine tshinyi?​—Danyele 2:44; Buakabuluibua 21:3-5.

2. Bua tshinyi Bible udi ufila tshishiki mandamuna a kueyemena ku nkonko yetu?

² Bua tshinyi Bible udi wandamuna ku nkonko ya mushindu’eu ne dishindika dionso? Bualu udi Dîyi dia Nzambi. Wakatumika ne bantu bua kufunda, kadi anu mudibi bilejibue patoke mu 2 Timote 3:16 (NW), “Mufundu wonso mmuenzeja kudi Nzambi.” Ki ntshipeta tshia diumvuija patupu dia bantu dia mianda idi yenzeka to. “Milayi [mamanyisha a malu aalua, mêyi-matuma a Nzambi, mêyi-makulu a bibidilu bilenga a mu Bible] kayakafidibua ku disua dia muntu, kadi bantu bakakula malu a kudi Nzambi bu muvuabo benzeja kudi spiritu munsantu.”​—2 Petelo 1:21, NW.

3. (a) Fila bilejilu bidi bileja mushindu uvua Bible muangatshibue ne mushinga muvule kudi bantu mu matunga kabukabu. (b) Bua tshinyi bantu bakasua ku budisuile bua kubueja mioyo yabo mu njiwu bua kubala Mifundu?

³ Pa kuanyisha mushinga wa Bible, bantu bavule bavua mu njiwu ya kuedibua mu buloko, ne nansha kushipibua bualu bavua ne Bible ne bavua bamubala. Ke muakenzekabi bidimu bishale ebi mu ditunga dia Espagne mudi Ekleziya Katolike muase miji, muvua bamfumu ba ekleziya batshina bua se: buenzeji buabo buvua mua kujimina bu bantu mua kudibadila Bible mu miakulu yabo bine; ke muvuabi kabidi mu Albanie, muakangatshibua mapangadika makole kudi mbulamatadi uvua ulombodibua kudi bantu batu kabayi bitaba dikalaku dia Nzambi bua kujikija buenzeji buonso bua malu a Nzambi. Kadi, bantu batshinyi ba Nzambi bakalama kopi ya Mifundu bu tshiuma, kuyibala, kuabanyangana bivuabo babala ne bakuabo. Mu Mvita Mibidi ya Buloba Bujima, mu kamponyi ka disubisha bantu ka Sachsenhausen, bavua basambulujangana ne budimu buonso Bible mu bibambalu bia buloko (nansha muvuabi bikandikibue), ne yonso uvua umubala uvua ukuata tshitupa kampanda ku muoyo bua kutshiabanyangana ne bakuabo pashishe. Mu bidimu bia 1950, mu Allemagne wa ku Est uvua ulonda tshididi tshia ba-koministe, Bantemu ba Yehowa bakedibua mu buloko bua ditabuja diabo bavua mu njiwu ya kuedibua mu miaba ya pa nkayabo bualu bakasambulujangana tutupa tukese tua Bible mu bena buloko bua kutubala butuku. Bua tshinyi bakenza nanku? Bualu bavua bajadike se: Bible udi Dîyi dia Nzambi, ne bavua bamanye se: “ki ng’anu ku diampa nkayadi” kadi ku “dîyi dionso dia mukana mua Yehowa ke kudi muntu ne muoyo.” (Dutelonome 8:3, NW) Mêyi aa adi mu Bible akambuluisha Bantemu aba bua kushala ne muoyo mu nyuma nansha muvuabo ku bukokeshi bua tshikisu tshiudi kuyi mua kuitaba nansha kakese.

4. Mmuaba kayi udi Bible ne bua kuikala nawu mu mioyo yetu?

⁴ Bible ki mmukanda wa kuteka patupu mu tshilaminu tshia mikanda bua kutapamu dîsu mu mpukapuka, peshi kumuangata bu tshintu tshia ditumika natshi anu padi bena kuitabuja netu basangila bua ditendelela. Dituku dionso tudi ne bua kutumika nawu bua kupeta butoke pa malu atudi tuakama ne kutuleja njila muakane wa kuendela.​—Musambu wa 25:4, 5.

Mufundisha bua kubadibua ne kujinguludibua

5. (a) Pikalaku mushindu, ntshinyi tshidi yonso wa kutudi ne bua kuikala natshi? (b) Mu Izalele wa kale, mmunyi muvua bantu bafika ku dimanya malu avua mu Mifundu? (c) Mmunyi mudi Musambu wa 19:7-11 ne buenzeji pa mmuenenu uudi nende pa bidi bitangila dibala Bible?

⁵ Mu matuku etu aa, kopi ya Bible idiku mu matunga mavule, ne tudi tulomba mubadi yonso wa Tshibumba tshia Nsentedi bua kupeta wende kopi. Mu tshikondo tshivua Bible ufundibua, kakuvua biamu bia kupatula nabi mikanda. Pa tshibidilu bantu kabavua ne kopi ya pa nkayabo to. Kadi, Yehowa wakalongolola bua bamusadidi bende bateleje bivua bifundibue. Nenku, Ekesode 24:7 (NW) udi umanyisha ne: kunyima kua Mozese mumane kufunda bivua Yehowa mumutumine dîyi, “wakangata mukanda wa tshiovo ne kuubala ku matshio a tshisamba.” Bu muvuabo badimuene malu a dikatshila akenzeka ku Mukuna wa Sinayi, bavua bajadika se: bivua Mozese ubabadila bivua bifumine kudi Nzambi, ne bua bualu ebu, bavua bakengela bua kumanya dimanyisha edi. (Ekesode 19:9, 16-19; 20:22) Tuetu petu tudi tukengela bua kumanya bidi bifundibua mu Dîyi dia Nzambi.​—Musambu wa 19:7-11.

6. (a) Bangabanga ne tshisamba tshia Izalele kubuela mu Buloba Bulaya, ntshinyi tshiakenza Mozese? (b) Mmunyi mutudi mua kuidikija tshilejilu tshia Mozese?

⁶ Pakavua tshisamba tshia Izalele tshidilongolola bua kusabuka Musulu wa Yordane bua kubuela mu Buloba Bulaya, nenku kushiya nsombelu wabo wa buena-tshimuangi mu tshipela, bivua biakanyine bua buobo kukonkonona Mikenji ya Yehowa ne malanda abo nende. Muenzeja kudi spiritu wa Nzambi, Mozese wakakonkononona Mikenji pamue nabo. Wakabavuluija tunungu tuonso tua Mikenji, ne kuzangika mêyi-maludiki manene ne mmuenenu ivua ne bua kuikala ne buenzeji pa malanda abo ne Yehowa. (Dutelonome 4:9, 35; 7:7, 8; 8:10-14; 10:12, 13) Padibo batomekela petu lelu’eu majitu mapiamapia anyi patudi tupetangana ne malu mapiamapia mu nsombelu wetu, nebikale ne dikuatshisha bua kukonkononona mushindu udi mibelu ya mu Mifundu ne bua kuikala ne buenzeji pa bitudi tuenza.

7. Katupa kîpi kunyima kua bena Izalele bamane kusabuka Yordane, ntshinyi tshiakenjibua bua kushindika Mikenji ya Yehowa mu bieledi biabo bia lungenyi ne mu mitshima?

⁷ Katupa kîpi kunyima kua Izalele mumane kusabuka Musulu wa Yordane, bantu bakasangila tshiakabidi bua kukonkonona bivua Yehowa mubambile ku butuangaji bua Mozese. Tshisamba tshiakadisangisha ku mutantshi wa kilometre 50 ku nord kua Yeruzaleme. Tshia bibidi tshimue tshia bisa tshivua buludiludi ne Mukuna wa Ebale, ne tshia bibidi tshikuabo tshivua buludiludi ne Mukuna wa Guérizim. Muaba awu Yoshua “wakabala ne dîyi dikole mêyi wonso a Mikenji, dibenesha ne mulawu.” Nenku, balume, bakaji ne bana pamue ne benyi, bakateleja mu tshikondo tshiakanyine diumvuijiludibua dia mikenji ivua ibalombola, divua mua kushikila ne dibenga kuanyishibua kudi Yehowa ne dia mabenesha avuabo mua kupeta bu buobo mua kutumikila Yehowa. (Yoshua 8:34, 35, NW) Bavua ne bua kuikala batokeshibue mu lungenyi bua kujingulula tshimpe ne tshibi mu diumvuangana ne mmuenenu wa Yehowa. Kupita apu, bavua ne bua kujamija mu mitshima yabo dinanga bua tshimpe ne lukinu bua tshibi, bu mutu yonso wa kutudi wenza lelu’eu.​—Musambu wa 97:10; 119:103, 104; Amosa 5:15.

8. Ntshinyi tshivua tshipeta tshimpe tshia ku dibala dia ku tshikondo ne ku tshikondo dia Dîyi dia Nzambi mu imue mpuilu ya ditunga dijima mu Izalele?

⁸ Kusakidila ku dibala dia Mikenji mu bikondo abi bikena kupua muoyo, dilongolola bua dibala dia pa tshibidilu dia Dîyi dia Nzambi ndilejibue mu Dutelonome 31:10-12. Tshidimu tshia muanda-mutekete tshionso, tshisamba tshijima tshivua ne bua kudisangisha bua kuteleja dibala dia Dîyi dia Nzambi. Kuenza nunku kuvua kubapetesha biakudia bia mu nyuma. Divua divuluija bieledi bia ngenyi ne mitshima yabo malaya adi atangila Dimiinu ne bua bualu ebu diakambuluisha bua kulombola bena lulamatu kudi Masiya. Ndongoluelu bua didiishibua dia mu nyuma ivua mibanjija pavua Izalele mu tshipela kayakalekedibua pakabuelabo mu Buloba Bulaya. (1 Kolinto 10:3, 4) Bishilangane, bakasakidila malu a baprofete masokolola ku Dîyi dia Nzambi.

9. (a) Bena Izalele bavua babala Mifundu anu pavuabo basangila mu musumba munene anyi? Umvuija. (b) Mmunyi muvua dishidimuna mu Mifundu difidibua munkatshi mua bena mêku, ne bivua bua tshipatshila kayi?

⁹ Dikonkononona mubelu wa Dîyi dia Nzambi kadivua ne bua kuikala anu bua bikondo abi pavua bantu badisangisha mu musumba mualabale. Bitupa bia Dîyi dia Nzambi ne mêyi-maludiki adi bavua ne bua kubiyukidilangana dituku dionso. (Dutelonome 6:4-9) Miaba mivule lelu’eu, kudi mushindu wa bansonga kupetabo wabo kopi wa Bible, ne bidi ne dikuatshisha divule kudibo bua kuenza nunku. Kadi kabivua nanku mu Izalele wa kale to. Mu tshikondo atshi, pavua baledi bafila dishidimunyibua diangatshila mu Dîyi dia Nzambi, bavua beyemena bivuabo bakuate ku muoyo ne beyemena malelela avuabo banange bikole mu mitshima yabo, pamue ne tunungu tukese tuvuabo badifundile nkayabo. Ku diambulula dia ku musangu ne ku musangu, bavua benza madikolela bua kuibaka munda mua bana babo dinanga bua Yehowa ne njila yende. Tshipatshila katshivu’anu tshia kuikala ne buongo buuja ne dimanya, kadi tshivua tshia kuambuluisha muena mu dîku yonso bua ikale ne nsombelu wa kumona mua kuleja dinanga bua Yehowa ne Dîyi diende.​—Dutelonome 11:18, 19, 22, 23.

Dibala Mifundu mu nsunagoge

10, 11. Mprograme kayi wa dibala Bible uvua wenzeka mu nsunagoge, ne mmunyi muvua Yezu wangata bikondo ebi?

¹⁰ Tshikondo kampanda kunyima kua diya ne bena Yuda mu bupika mu Babilone, nsunagoge yakangatshibua bu miaba ya kuenzela ntendelelu. Bua Dîyi dia Nzambi dibadibue ne dikonkononyibue miaba eyi ya bisangilu, kopi mivule ya Mifundu yakenjibua. Ke tshiakafikisha ku dipandisha kopi ya kale mifunde ku bianza mitue ku 6 000 mikale ne bitupa bia Mifundu ya tshiena-Ebelu.

¹¹ Tshitupa tshinene tshia bisangilu bua ntendelelu bienzela mu nsunagoge tshivua dibala dia Torah, anyi mikanda itanu ya ntuadijilu ya Bible idiku lelu’eu. Mvese wa Bienzedi 15:21 udi umanyisha se: mu siekele wa kumpala B.B., dibala dia mushindu’eu divua dienzeka dia Nsabatu dionso, ne Mishnah udi uleja se: bituadijile mu siekele muibidi, dibala dia Torah divua dienzeka mu dituku dibidi ne ditanu dia mu lumingu. Bantu bungi kampanda bavua babala bashilangana bitupa bivuabo babalomba [bua kubala]. Tshibidilu tshia bena Yuda bavua mu Babilone tshivua tshia kubala Torah mujima tshidimu tshionso; tshia mu Palestine tshivua tshia kulongolola programe wa dibala mu bidimu bisatu. Tshitupa tshia mifundu ya ba-profete bavua kabidi batshibala ne batshiumvuija. Yezu uvua uya pa tshibidilu mu programe ya dibala Bible mu dia Nsabatu muaba uvuaye.​—Luka 4:16-21.

Diandamuna dia muntu pa nkayende ne ditumikila

12. (a) Pavua Mozese ubadila tshisamba Mikenji, mmunyi muvua tshisamba tshibabidila? (b) Mmunyi muvua tshisamba tshiandamuna?

¹² Kubala Mifundu mienzeja ku spiritu kadivua dia tshidingishilu patupu to. Kadivua dienzeka anu bua mêsu a bantu. Pavua Mozese ubadila bena Izalele “mukanda wa tshiovo” mu mpata uvua buludiludi ne Mukuna wa Sinayi, wakenza nanku bua bamone mua kujingulula majitu avuabo nawu kumpala kua Nzambi ne kuakumbaja. Ke muakenzabo anyi? Dibala divua dikengela diandamuna. Tshisamba tshiakajadika muanda awu, ne bakakula ne dîyi dikole, bamba ne: “Bionso bidi Yehowa mutuambile tudi basue kubienza ne kubitumikila.”​—Ekesode 24:7, NW; fuanyikija ne Ekesode 19:8; 24:3.

13. Pavua Yoshua ubala milawu bua dibenga kutumikila, ntshinyi tshivua tshisamba ne bua kuenza, ne mbua tshipatshila kayi?

¹³ Kunyima, pavua Yoshua ubadila tshisamba malaya pa bidi bitangila mabenesha ne mitshipu, anyi milawu, diandamuna divua dikengedibua. Kunyima kua mulawu wonso, bavua batuma dîyi: “Ne tshisamba tshionso tshivua ne bua kuamba ne: ‘Amen!’” (Dutelonome 27:4-26, NW) Nenku, ku bualu ku bualu, bavua bitaba dipishibua diabo dia kudi Yehowa bua malu mabi matedibua. Mmuanda kayipu wa tuyayi tukamona pavua tshisamba tshijima tshipunguluja ne dîyi edi!

14. Mu matuku a Nehemiya, bua tshinyi dibala dia patoke dia Mikenji divua nangananga diakane?

¹⁴ Mu matuku a Nehemiya, pavua tshisamba tshionso tshisangila mu Yeruzaleme bua kuteleja Mikenji, bakamona se: kabavua bakumbaja tshishiki mêyi-maludiki avua mafundamu. Mu tshine tshikondo atshi bakatumikila diakamue biakalongabo. Ntshipeta kayi tshiakapatuka? “Disanka divulavulayi.” (Nehemiya 8:13-17, NW) Kunyima kua lumingu lujima lua dibala dia Bible ku dituku dionso mu tshikondo tshia difesto, bakajingulula se: bivule bitshivua bikengedibua. Ne mmuenenu wa disambila bavua bakonkonona mianda ya kale ya malanda avua pankatshi pa Yehowa ne tshisamba tshiende bituadijile mu matuku a Abrahame. Bionso ebi bivua bibasaka bua kuenza mutshipu bua kuenza malu mu diumvuangana ne bivua Mikenji ilomba, kudikanda bua kuselangana ne benyi, ne kuitaba majitu bua kulama ntempelo ne midimu yende.​—Nehemiya, nshapita wa 8-10.

15. Mmunyi mudi mêyi-maludiki adi mu Dutelonome 6:6-9 aleja se: munkatshi mua bena mêku, dishidimunyibua mu Dîyi dia Nzambi kadivua ne bua kuikala dia tshidingishilu?

¹⁵ Bia muomumue, mu dîku, kulongesha Mifundu kakuvua kua tshidingishilu patupu to. Bu mutukadi bamane kumona, mu ngakuilu wa tshimfuanyi mu Dutelonome 6:6-9 (NW), tshisamba tshivua tshilombibue bua ‘kusuika mêyi a Nzambi bu tshimanyinu pa tshianza tshiabo’​—nenku bua baleje ku tshilejilu ne ku bienzedi dinanga diabo bua njila ya Yehowa. Ne bavua ne bua kuteka mêyi a Nzambi bu ‘kakaba pa mpala pankatshi pa mêsu abo’​—nunku kulama pa tshibidilu mêyi-maludiki a mu Mifundu ne kutumika nawu bu nshindamenu bua mapangadika abo. (Fuanyikija ne ngakuilu mutumika nende mu Ekesode 13:9, 14-16.) Bavua ne bua ‘kuafunda pa mikamba ya biibi bia nzubu yabo ne pa biibi biabo’​—nenku, bitapuluja nzubu yabo ne biota biabo bu miaba ivuabo banemeka Dîyi dia Nzambi ne baditumikila. Mu ngumvuilu mukuabo, nsombelu yabo ivua ne bua kufila bijadiki bivule bivua bileja se: bavua banange ne batumikila mêyi-maludiki makane a Yehowa. Mmunyipu muvuabi biambuluisha! Dîyi dia Nzambi didiku ne muaba munene nunku mu nsombelu wa buatshia-buila wa bena dîku dietu anyi? Diakabi, bena Yuda bakavuija ndongoluelu yonso eyi bu ya tshidingishilu, baluata tushete tua mifundu anu bu bijimba bia buanga. Ntendelelu wabo katshivua kabidi ufumina mu mutshima ne Yehowa wakamubenga.​—Yeshaya 29:13, 14; Matayo 15:7-9.

Bujitu bua aba badi ne mudimu wa butangidi

16. Bua tshinyi dibala Mifundu pa tshibidilu divua ne mushinga kudi Yoshua?

¹⁶ Mu muanda udi utangila dibala Mifundu, bavua batamba kukoka ntema kudi aba bavua batangila tshisamba. Yehowa wakambila Yoshua ne: “Utabalele bua kuenza malu mu diumvuangana ne Mikenji yonso.” Bua kukumbaja bujitu buende, bakamuambila ne: “Udi ne bua kubalamu ne dîyi dia panshipanshi munya ne butuku . . . bua umone mua kulubuluja njila webe ne nenku kuenza malu ne meji wonso.” (Yoshua 1:7, 8, NW) Bu mutubi nunku bua muena nkristo kayi yonso mutangidi lelu’eu, dibala pa tshibidilu Mifundu dia Yoshua divua mua kumuambuluisha bua kuvuluka mêyi-matuma masunguluke avua Yehowa mupeshe tshisamba Tshiende. Yoshua uvua kabidi ne bua kumanya muvua Yehowa upita ne bamusadidi bende mu nsombelu kabukabu. Pavuaye ubala mêyi avua atangila dilongolola dia Nzambi, bivua bia mushinga kudiye bua kueleela meji pa bujitu buende mu diumvuangana ne dilongolola adi.

17. (a) Bua bakalenge kubabidila dibala Mifundu mu mushindu uvua Yehowa muambe, ntshinyi thivua tshikengedibua pamue ne dibala diabo? (b) Bua tshinyi dibala Bible pa tshibidilu ne dieleela meji bidi ne mushinga menemene bua bakulu bena nkristo?

¹⁷ Yehowa wakatuma dîyi se: muntu kayi yonso uvua usadila bu mukalenge pa tshisamba Tshiende uvua ne bua kuenza kopi wa Mikenji ya Nzambi ku ntuadijilu kua dikokesha diende, mushindamena pa kopi uvua nende bakuidi. Nenku uvua ne bua ‘kuikala umubala matuku ende wonso a muoyo.’ Tshipatshila katshivu’anu tshia kukuata ku muoyo bionso bivuamu to. Bishilangane, bivua bua se: “ipatshila kumanya mua kutshina Yehowa Nzambi wende” ne se: “mutshima wende kawumufikishi ku didibandisha ku mutu kua bana babo to.” (Dutelonome 17:18-20, NW) Ebi bivua bimulomba dieleela meji mu buondoke buonso pa bivuaye ubala. Amu muvuabi bimueneka patoke, bamue ba ku bakalenge bavua bela meji muvuabo ne bivule bia kuenza mu midimu ivua itangila bukalenge, nenku kakuyi mushindu wa kuenza nanku, ne bu tshipeta tshia dilengulula diabo, ditunga dijima diakakenga. Mudimu wa bakulu mu tshisumbu tshia bena nkristo kawena nansha kakese [bu] wa bakalenge. Kadi, anu muvuabi bua bakalenge, mbia mushinga bua bakulu bikale babala ne beleela meji pa Dîyi dia Nzambi. Kuenza nanku nekubambuluishe bua kulama mmuenenu muakane wa aba badi beyemena bukubi buabo. Nekubambuluishe kabidi bua kukumbaja bujitu buabo bu balongeshi mu mushindu udi menemene utumbisha Nzambi ne udi ukankamija bena nkristo nabo mu nyuma.​—Tite 1:9; fuanyikija ne Yone 7:16-18; sulakaja ne 1 Timote 1:6, 7.

18. Ntshilejilu kayi tshiakashiya mupostolo Paulo tshikala dibala pa tshibidilu ne dilonga Bible mua kutuambuluisha bua kuidikija?

¹⁸ Mupostolo Paulo, mutangidi muena nkristo wa mu siekele wa kumpala, uvua umue wa ku bavua bamanye bimpe bitambe Mifundu mienzeja ku spiritu. Pavuaye ufila bumanyishi kudi bantu bavua mu Tesalonike wa kale, uvua ufika ku dieleela nabo meji tshishiki kumbukila mu Mifundu ne kubambuluisha bua kujingulula diumvuija diayi. (Bienzedi 17:1-4) Uvua ulenga mitshima ya bateleji bena muoyo mulenga. Nenku, bamuteleji bende bavule bakalua bena kuitabuja. (1 Tesalonike 2:13) Bu tshipeta tshia programe webe wa dibala ne dilonga Bible, udiku mua kueleela meji tshishiki ne bantu kumbukila mu Mifundu anyi? Muaba udi nawu dibala dia Bible mu muoyo webe ne mushindu uudi udienza bidiku bifila tshijadiki tshia se: udi menemene wanyisha tshidi kuikala ne Dîyi dia Nzambi kumvuija anyi? Mu tshiena-bualu tshidi tshilonda, netukonkonone mushindu udi diandamuna dimpe mua kufidibua ku nkonko eyi nansha kudi aba badi programe yabo miwule tente [ne bia kuenza].

Mmunyi muwandamuna?

◻ Bua tshinyi bantu bavua ku budisuile banyisha bua kubueja muoyo ne budikadidi mu njiwu bua kumona mua kubala Bible?

◻ Mmunyi mutudi mua kubabidila ndongoluelu ya dikonkononona yakenjibua bua Izalele wa kale bua kuteleja Dîyi dia Nzambi?

◻ Ntshinyi tshitudi ne bua kuenza ne bitudi tubala mu Bible?

◻ Bua tshinyi dibala Bible ne dieleelapu meji bidi nangananga ne mushinga bua bakulu bena nkristo?

[Tshimfuanyi mu dibeji 9]

Yehowa wakambila Yoshua ne: “Udi ne bua kubalamu ne dîyi dia panshipanshi munya ne butuku”