Tulejayi kanemu bua nzubu wa Nzambi

¹ Mu bikondo bitshivuabo bafunda Bible, Yehowa wakatumina tshisamba tshiende dîyi bua kusangilatshi pa tshibidilu mu nzubu wende. (Lew. 23:2) Bisangilu ebi bivua biambuluisha bena Izalele bua kabapu Dîyi dia Nzambi muoyo, bibapetesha mushindu wa kueleela meji, kuikala pamue ne kukonkonona Mukenji wa Yehowa. Bavua nunku buuja bieledi biabo bia lungenyi ne meji a Nzambi, ke tshivua tshibapetesha masanka a mu nyuma. Bisangilu ebi bivua bikondo bia disanka. Bivua bikolesha buobumue ne ntendelelu mulelela. Bidi kabidi ne mushinga lelu’eu bua kusangila mu nzubu wa Nzambi.

² Mmunyi mutualeja mutudi bamanye mushinga wa bisangilu? Bimue bisumbu bidi biakidila bungi bukese bua bateleji mu bisangilu. Bushuwa, bidi mua kutufikila bua tuetu kupanga kuikalamu, kadi tudi tulekela tulumbulumbu tutupangisha mua kubuela pa tshibidilu mu bisangilu anyi? Imue misangu, bamue badi basungula bua kushala ku mabo amu bua disama dikese dia mutu anyi bua dipungila kunyima kua dituku dijima dia mudimu. Bakuabo badi bela meji se: badi ne bua kuakidila balela babo badi kabayi bena kuitabuja badi basua kulua kubakumbula. Bakuabo kabidi badi nansha balengulula bimue bisangilu bua kubandila bindidimbi bidibo banange ku televizion anyi dinaya dikuabo kampanda. Bulelela, abi nkuikala kule ne dijinga dijima diumvuija kudi bana ba Koré: “Anyima wanyi mmushiikile ne kabidi mmujinge miaba ya kuendela ya Yehowa.”—Mus. wa 84:2, NW.

³ Bushuwa, tudi tupeta biakudia bia mu nyuma bivule mu bisangilu; pabi, bidi bikolele bamue bateleji bua kulonda ne ntema. Kudi bakuabo badi balotakana, bikale baditatshisha ne malu mapitakane munda-munya, anyi balala mene. Bavule mbamone bikuatshisha bua kufunda note bua kushala batabale ne kulonda bimpe. Kabidi, ebi bidi bibambuluisha bua kukuata mu lungenyi luabo bidi biambibua. Pashishe, bituadilongolola bimpe, netupete masanka mavule mu bisangilu ne netukumbane mua “kuteleja ne ntema ya pa buayi” bidibo balongesha.—Eb. 2:1, NW.

⁴ Amu bu bakulumpe, bana badi bakengela pabo kumanya malongesha mafila mu bisangilu. Bikala baledi babapesha bia kunaya nabi anyi bia kuzola bu mudimu ne bua kubabatamija, bana kabakulonga tshintu nansha tshimue mu bisangilu. Dipanga kukela ke didi difikisha ku dibalekela banaya, bakula, bela mbila anyi benza bionso bidi mua kusuya bateleji. Bana kabakutamba kuya ku bisokomenu anyi kunua mâyi pikalabo bamanye se: tatuabo anyi mamuabo neikale ne bua kubafilaku misangu yonso.

⁵ Mushinga wa kufika pa dîba: Ku musangu ne ku musangu, nsombelu kayiyi ku disua dietu idi mua kutupangisha mua kufika pa dîba mu tshisangilu. Kadi tshibidilu tshia kufika dîba dipite ne kubuela kunyima kua musambu ne disambila tshidi tshileja dipanga kanemu bua ngikadilu wa bunême wa bisangilu ne kupanga kuangata bakuabo ne mushinga. Tuvulukayi se: dimba misambu ne masambila menza pamue ne bana betu bidi tshitupa tshia ntendelelu wetu. Kufika pa tshibidilu dîba dipite kudi kufumina nangananga ku dipanga bulongame. Eu udi ufika pa dîba udi uleja mudiye unemeka bisangilu ne mudiye mumanye mushinga wabi.

⁶ Bu mudi dituku dia Yehowa dienda disemena, tudi tuenda amu tukengela kusangila pamue. (Eb. 10:24, 25) Tulejayi kanemu bua bisangilu pa kuikala ne tshibidilu tshia kubuelamu, pa kudilongolola, pa kufika pa dîba ne kuikala ne ntema, kabidi ne pa kutumikila bitudi tulonga.