Tshitembelu tshia kulonda menemene
1 Kamuyi mpata, Yezu udi muntu munene wa katshia ne katshia. Wakashila balongi bende tshilejilu tshipuangane. Nansha mutudi katuyi bapuangane bu yeye, tudi balombibue bua ‘kulonda mu makasa ende bimpe.’ (1 Pet. 2:21) Dijinga dietu divua kuikala dia kufuanangana muetu muonso ne Yezu, nangananga pa kumanyisha bakuabo bulelela ne mitalu.
2 Yezu kavua amu mumanyishi patupu: uvua mulongeshi wa dikema. ‘Bisumbu bia bantu bivua bikema mushindu uvuaye ulongesha.’ (Mat. 7:28) Bua tshinyi uvua upatula bipeta bilenga nunku? Tukonkonone ne ntema “mushindu uvuaye ulongesha.”
3 Mushindu wa kulonda Yezu: Yezu wakalongeshibua kudi Tatuende. (Yone 8:28) Tshipatshila tshiende tshivua tshia kuendesha lumu lua Yehowa ne kutumbisha dîna diende. (Yone 17:4, 26) Didifila dietu mu buambi ne mu mudimu wa kulongesha divua ne bua kusonsodibua kudi dijinga dietu dia kutumbisha Yehowa kadi ki mbua tuetu kuditeka kumpala.
4 Bionso bivua Yezu mulongeshe bivua biashila pa Dîyi dia Nzambi. Uvua misangu yonso utela amu Mifundu. (Mat. 4:4, 7; 19:4; 22:31) Tudi tujinga kukoka ntema ya batuyukidishi betu pa Bible. Nunku, nebajingulule ne: bitudi tubayisha ne tubalongesha mbishindamene pa bumfumu butambe kutumbuka budiku.
5 Yezu uvua utumika ne biambilu bikosoloja, bikuatshishi ne bipepele. Tshilejilu, pakumvuijaye balongi bende mushindu wa kupeta dilekelela dia Nzambi, wakabakankamija bua buobo bine kulekelela bakuabo. (Mat. 6:14, 15) Tudi ne bua kuenza madikolela bua kumanyisha mukenji udi utangila Bukalenge mu miaku mipepele mua kumvua.
6 Yezu wakatumika mu mushindu muzanzamuke ne bimfuanyi ne nkonko bua kusaka bamuyukidishi ku diela meji. (Mat. 13:34, 35; 22:20-22) Bimfuanyi biangatshila mu nsombelu wa pa tshibidilu bidi mua kuambuluisha bantu bua kumvua amue malongesha makole a mu Bible. Tudi ne bua kuela nkonko idi ibelesha meji. Nkonko miludiki idi mua kubafikisha ku dipatula nkomenu mimpe.
7 Yezu uvua upeta dîba dia kumvuija biena-bualu bikole kudi aba bavua bajinga kumanya bipitshidile. Aba bavuabi bisankisha bushuwa, tshilejilu balongi bende, bakakuata diumvuija dia bivua Yezu ulongesha. (Mat. 13:36) Tudi petu ne bua kudiakaja bua kuandamuna ku nkonko idi bantu batuela ne muoyo mujima. Bituapanga kumanya diandamuna ku imue ya kudiyi, netuenze makebulula ne kupingana pashishe ne mamanyisha adi akengedibua.
8 Yezu wakalongesha kabidi ku tshilejilu. Wakuowesha balongi bende makasa, pabi yeye ke uvua Mfumuabo. (Yone 13:2-16) Bituikala bena tshikadilu tshia budipuekeshi, bantu batudi tulongesha nebasakibue ku ditumikila bidibo balonga.
9 Yezu uvua ulenga mitshima ya bantu ne usonsola dinanga diabo dia buakane. Tudi basue petu kulenga mitshima. Tudi tuteta kujula munda muabo dijinga dia ku tshilelelu didi muntu yonso nadi dia kutendelela Eu udi mutambe bunene ne kusomba mu ditalala ne disanka pamue ne bantu nende.
10 Mu Kabalashipu, netuikale ne mushindu wa kuakula pa bituvua balonge pa bidi bitangila Yezu pa kufila mukanda wa Le plus grand homme de tous les temps. Bitualonda ndongeshilu wa Yezu, netusake bantu badi badiakaje bua kuteleja dilongesha diende.—Mat. 10:40.