‘Nulonde mu makasa ende’
1. Ntshinyi tshitudi ne bua kuenza bua kulua bayishi bimpe?
1 Nansha muvua Yezu kayi mulonge tulasa tua bafalese, uvua Muyishi mutambe bunene muende lumu mu miyiki ya bantu. Diakalenga, muyiki wa mudimu uvua Yezu muenze mbaufunde bua kutuambuluisha. Bua tuetu kuikala bambi ba lumu luimpe badi bapatula bipeta bimpe, tudi ne bua ‘kulonda mu makasa ende.’—1 Pet. 2:21.
2. Ntshinyi tshidi mua kutuambuluisha bua kunanga bantu bu muvua Kristo mubanange?
2 Leja muudi munange bantu: Dinanga divua nadi Yezu bua bantu bakuabu ke divua dimusaka bua kutangila malu abu. (Mâko 6:30-34) Bantu ba bungi mu teritware wetu badi “batua mikemu” ne bajinga kumanya bulelela budi mu Bible. (Lomo 8:22) Patudi tuela meji a nsombelu mukole udibu nende ne mushindu udi Yehowa mubanange, bidi bitusaka bua kutungunuka ne kubayisha. (2 Pet. 3:9) Kabidi, bantu nebikale ne disanka dia kututeleja patudi tubayisha padibu bamona ne: tudi tuditatshisha bua bualu buabu.
3. Yezu uvua uyisha dîba kayi?
3 Akula dîba dionso diudi upeta mpunga: Yezu uvua uyisha bakuabu lumu luimpe misangu yonso ivuaye upeta mpunga. (Mat. 4:23; 9:9; Yone 4:7-10) Muomumue kabidi, tudi ne bua kuikala badilongolole bua kuyisha bulelela patudi tuenza malu etu a dituku dionso. Bamue batu benda ne Bible ne mikanda bua bamone mua kuyisha padibu ku mudimu, mu kalasa, mu ngendu, padibu baya mu bisalu, anu nanku.
4. Mmunyi mutudi mua kuvuija Bukalenge tshiena-bualu tshia diyisha dietu?
4 Utambe kulongesha bantu bua Bukalenge: Tshiena-bualu tshia mudimu wa buambi wa Yezu tshivua tshia Bukalenge. (Luka 4:43) Nansha bituikala katuyi batele Bukalenge diakamue mu muyiki wetu ne muntu, tudienzeje bua kumufikisha ku diumvua mushinga wabu. Nansha patudi tutela ntatu idi pa buloba idi ileja mutudi mu matuku a ku nshikidilu, tshia kumpala tshitudi tumanyisha ‘ndumu luimpe lua malu mimpe.’—Lomo 10:15.
5. Mmushindu kayi udi Bible mua kutuambuluisha bua kupatula bipeta bilenga mu mudimu wetu?
5 Imanyina mu Dîyi dia Nzambi: Yezu uvua muimanyine mu Dîyi dia Nzambi pavuaye uyisha. Kavua ulongesha malu avua afume munda muende nansha. (Yone 7:16, 18) Bua kutantamena mateyi a Satana, uvua ulonga Dîyi dia Nzambi ne uditumikila. (Mat. 4:1-4) Bua tuetu kufika ku dilongesha bimpe, tudi ne bua kubala Bible dituku dionso ne kutumikila malu adimu. (Lomo 2:21) Patudi tuandamuna nkonko mu buambi, tudi ne bua kutela mvese ya mu Bible ne kuyibadilangana padiku mushindu. Bidi bikengela bua muntu utudi tuyikila nende afike ku diumvua ne: katuena tumuambila ngenyi yetu tuetu to, kadi tudi balamate ku tshidi Bible wamba.
6. Yezu wakenza tshinyi bua dilongesha diende kulengadi mioyo ya bantu?
6 Malongesha ebe alenge bantu ku muoyo: Pavua Bafalese ne bakuidi banene batume basalayi bua kukuata Yezu, bakapingana bianza bitupu. Basalayi kuamba bua Yezu ne: “Katshia, kakuena muntu muanji kuakula bu mudi muntu” eu. (Yone 7:46, MMM) Yezu kavua anu ulondela bantu malu tshianana to, kadi uvua ulongesha mu mushindu uvua ulenga mioyo ya bantu bavuaye ulongesha. (Luka 24:32) Uvua ubalongesha ne bilejilu bivuabu bamanye bimpe bia mu nsombelu wabu bua kubambuluisha bua kumvua bivuaye ulongesha. (Mat. 13:34) Yezu kavua upupija bantu ne malongesha mapite bungi to. (Yone 16:12) Uvua utuma meji a bantu anu kudi Yehowa pamutu pa kuatuma kudiye yeye. Bua kufuana Yezu, tudi mua kulua balongeshi bimpe anu patuikala ‘badimuke mu diyisha dietu.’—1 Tim. 4:16.
7. Bua tshinyi Yezu wakananukila mu mudimu wa buambi?
7 Unanukile nansha padibu babenga anyi bakuluisha: Nansha muvua Yezu wenza bishima bia bungi, bantu ba bungi kabakamuteleja to. (Luka 10:13) Nansha bana babu ne Yezu bine bakamuamba ne: ‘mmupale.’ (Mâko 3:21) Nansha nanku, Yezu wakananukila anu kunanukila. Wakashala anu ne muoyo mukole bualu uvua mujadike bimpe ne: uvua ne bulelela buvua ne bua kupesha bantu budishikaminyi. (Yone 8:32) Bu mudi Yehowa utuambuluisha, tuetu petu tudi badisuike bua kubenga kuimanyika mudimu wetu.—2 Kol. 4:1.
8, 9. Mmunyi mutudi mua kuidikija Yezu patudi tudifila bua lumu luimpe?
8 Nudifile ne bienu bionso bua kuyisha bikole: Yezu wakalekela dikeba bintu anu bua kuyisha lumu luimpe. (Mat. 8:20) Uvua uyisha kayi ulekela nansha, pamuapa too ne ku dilolo. (Mâko 6:35, 36) Yezu uvua mumanye ne: dîba divua dimushadile dikese bua kukumbaja mudimu wende. Bu mudi ‘dîba dienda dikepa,’ tuetu petu tudi ne bua kudifila ne dîba dietu, bukole buetu, ne bintu bitudi nabi bua kuidikija Yezu.—1 Kol. 7:29-31, MMM.
9 Bena Kristo ba kumpala bavua bayisha bapatula bipeta bimpe bualu bavua bidikija Yezu. (Bien. 4:13) Tuetu petu tudi mua kukumbaja mudimu wetu bimpe anu patuikala tuidikija Muyishi mutambe bunene wa kale.—2 Tim. 4:5.