Tshikondo tshia kudia mu nyuma kutshionkomoka
1. Mmushindu kayi utu Yehowa udisha bantu bende mu nyuma?
1 Yehowa utu udisha bantu bende mu nyuma ne dinanga dionso. Padi bantu bapite bungi lelu bafua ne nzala ya mu nyuma, tuetu tudi tudia bimpe tutshionkomoka. (Yesh. 65:13) Umue wa ku mishindu itu Yehowa utudisha mu nyuma mpatudi tubuela mu mpungilu ya distrike itutu tuenza ku tshidimu tshionso. Ukadi mubange kudilongolola bua kubuela mu bitupa bionso bia mpungilu wetu wa distrike wa “Nyuma wa Nzambi udi utulombola” udi ulua anyi? Mbatulongoluele didia dimpe dishema diatukuatshisha mu nyuma.
2. Kudianjila kudilongolola bua kubuela mu mpungilu kudi kumvuija tshinyi?
2 Dianjila kudilongolola: “Malu adi muntu wa tshisumi ujinga kuenza [anyi upangadija] adi akumbana.” (Nsu. 21:5, MMM) Nanku, bua kushikija didilongolola diebe bimpe bua kubuela mu mpungilu matuku onso asatu, kuladikiji bua kuyikila ne mfumuebe wa mudimu bikalabi bikengela kuangata dikisha bua kubuela mu mpungilu. Ukadi mudilongolole bua muaba wa kulala biwikala nawu dijinga anyi? Udi mua kudilongolola kabidi bua biakudia bia mu midi bia wewe kudilaku anu muaba wenzekela mpungilu ne bana betu bakuabu. Udilongolole bua wamona mua kufikaku kumpala kua dîba dituku dionso bua kupeta muaba wa kusomba ne kuimba musambu wa ntuadijilu ne kuteleja disambila.
3. Mvuadilu kayi utudi mua kudilongolola bua kuvuala mu mpungilu?
3 Tuenze bua mvuadilu wetu ikale muimpe ne muakanyine. (1 Tim. 2:9, 10) Dîba dia mpungilu ya distrike ditu dîba dimpe dia kuyisha bantu ba miaba itudi bulelela. Tuetu badiakaje ne badilengeja bimpe patudi mu tshimenga tshienzekela mpungilu ne patudi tuvuala tumanyishilu tuetu pa tshiadi, netushilangane ne bantu badi kabayi bena Kristo ne badi batumona nebatuanyishe.
4. Ntshinyi tshiatuambuluisha ne mêku etu bua kumvua mpungilu bimpe menemene?
4 Uteleje ne ntema: Katuena basue kujimija nansha katete kamue ka ku biakudia bimpe bia mu nyuma ebi to. (Nsu. 22:17, 18) Bua kuepuka ditanaji ne kulonda mpungilu bimpe, mbimpe wikale ubala mvese yonso idibu babadisha ne ufundaku tumalu tua mushinga. Dilolo tudi mua kuangata malu atuvua bafunde au bua kuyikilaku ne bakuabu malu manene atuvua bumvue. Bidimu bishale ebi, tuvua bamone ne: bamue bansonga bavua basomba pamue mu mpungilu, bayikila munkatshi mua ndongamu anyi bafundilangana mesaji ku telefone. Bituikala ne bana, nansha bana bakadi tunsonga, nebikale bitambe buimpe kusomba nabu pamue mu dîku ne kuteleja nabu miyuki pamue pamutu pa kubalekela basomba muaba mukuabu ne bana nabu.
5. Mushindu kayi utudi mua kuikala ne disanka dia bungi mu mpungilu?
5 Bulunda buimpe: Tshiakudia tshimpe tshitu tshilua kabidi kulengela patudi tutshidia ne balunda. (Nsu. 15:17) Ke mudibi kabidi patudi tudisangisha ne bana betu mu mpungilu, disanka dietu didi divula. Nanku, si nebikale bia disanka dia bungi patuikala mu dikisha bua kuyikilaku ne bana betu bakuabu, kudimanyisha kudibu ne kuabanyangana disanka! (Mus. 133:1) Padi mulombodi wa tshitupa ulomba bantu bua kusomba miaba yabu kumpala kua mijiki kutuadijayi, mbimpe tukose kuyikila ne tusomba bindila bua programe atuadije.
6. Londa bualu buukadi mudimuene budi buleja ne: kudi mushindu wa kuyisha bantu muaba udi mpungilu wenzekela.
6 Uyishe ponso paudi upeta mpunga: Bikondo bia mpungilu bitu bitupesha mpunga ya bungi ya kuyisha bakuabu. Bana betu bakuabu batu baya mu restoran padibu babuela mu mpungilu batu babela nkonko bua tshiena-bualu tshitu pa kamanyishilu kadibu bavuale kudi bantu batu mu restoran eyi anyi bakuabu. Nkonko eyi itu ibapetesha mpunga wa kuyikila ne bantu ne wa kubayisha bulelela. Bamue bantu batu babuela mu mpungilu yetu mba ku batu bela nkonko eyi batubu babikilamu.
7. Bua tshinyi tudi ne bua kubuela mu mpungilu wa distrike udi ulua eu?
7 Kulongolola kua mpungilu, muaba wamuenzelabu, kulombola bibambalu bishilashilangane ne kulongolola miyuku nkuangata dîba dia bungi. Midimu yonso mikole idibu benza bua kulongolola didia dia mu nyuma edi idi ileja mudi Yehowa ukumbaja majinga a bantu bende. Nunku tuenze muetu muonso bua kubenga kupumbisha tshibilu etshi bua tudie biakudia ebi bimpe. Patuenza nanku, ‘netuimbe misambu bua disanka dia mu mitshima yetu’ didi bena panu kabayi nadi to.—Yesh. 65:14.
[Kazubu mu dibeji 4]
Malu a kuvuluka bua mpungilu wa distrike
▪ Dîba: Matuku onso asatu mpungilu neatuadije mu dinda pa dîba dia 9:20. Bantu nebatuadije dibuela muaba wenzekela mpungilu mu dinda pa dîba dia 8:00. Patuadija mijiki ya mbangilu, muntu yonso wa kutudi udi ne bua kusomba pa muaba wende bua mpungilu atuadije bimpe. Mu Ditanu ne mu Disambombo mpungilu neajike pa dîba dia 4:55 wa dilolo ne mu Dia lumingu pa dîba dia 4:00 wa dilolo.
▪ Dikuatshila dia miaba: Muntu udi mua kulamina bantu badiye muende nabu anyi bena mu dîku diabu miaba ya disomba.
▪ Bia kudia mu dikisha: Mbimpe kulua ne biakudia bia midioku bidi mua kudisha mubidi bu mudi: mampa, mikata, bimuma (bibote), tumbele, bitumbula anyi kato. Bintu bu mudi mâyi, kafe anyi tshiayi, nudi mua kulua nabi biela mu bintu bidi kabiyi mua kutayika to, bionso ebi mbua kuepuka njiwu. Mbakandike bua kulua ne maluvu adi akuatangana mu mpungilu. Mbimpe kulua ne biakudia ne bia kunua bietu tuetu bua katuyi kubisumba kudi bangenda muaba wa mpungilu to. (Numanye ne: bapanyishi ba bintu kabena ne bua kubuela ne bintu biabu muaba udi mpungilu wenzekela nansha kakese.—Yone 2:13-17.) Bana betu badi balambila muaba wa mpungilu badi ne bua kuanji kulomba dianyisha kudi bana betu badi balombola malu a mpungilu bua babaleje muaba wa kulambila. Tshibi nuikale badimuke bua kakulu kumueneka njiwu.—Luka 10:38-42.
▪ Makuta: Tudi mua kuleja dianyisha bua mpungilu mitulongoluela patudi tufilaku ku budisuile kakese katudi naku bua kutungunuja mudimu wetu wa buloba bujima patudi ku Nzubu wa Bukalenge anyi mu mpungilu.
▪ Njiwu ne masama a tshimpitshimpi: Bena mu tshibambalu tshia diambuluisha babedi badi badilakana bua mutu bana betu bababikila too ne bua tumalu tukese. Pikala disama dia tshimpitshimpi dikuate muntu mu mpungilu, nudi mua kuleja muanetu wa ku bakididianganyi udi pabuipi bua aye diakamue kumanyisha bena tshibambalu tshia diondopangana, nunku bobu nebatangile bukole bua disama bobu kumuambuluisha.
▪ Dikuata mêyi ne bindidimbi: Katuena mua kuasa tshiamu nansha tshimue ku nshinga ya nzembu ya biamu bidibu benza nabi mudimu muaba wa mpungilu nansha. Nuenze mudimu ne bintu ebi mu mushindu wa kubenga kufila ditanaji kudi bakuabu.
▪ Dikuata foto: Paudi ukuata foto dîba ditudi munkatshi mua mpungilu, kutemeshi midilu anyi flashe to. Kubikidi bakuatshi ba foto ba pambelu bua kulua kukuata foto mu mpungilu to. Wewe mubamone benda bakuata foto mu mpungilu, kudikuatshishi foto kudibu nansha.—Yone 2:13-17.
▪ Telefone ya ku bianza: Wenze muebe muonso bua kamu kebe kakapangishi bakuabu bantu bua kuteleja to.
▪ Mankenda: Bidi bimueneka ne: bana betu batu baya kusumba biakudia kudi bapanyishi ba bintu ke batu bimansha tubeji, mabeji, tubudimbu, tutotola ne bintu bikuabu bia buena ebi panshi. Muntu yeye musumbe biakudia kudi basumbishi ba bintu (bu mudi mbombo, bisukuita, tuto, makopo a misanyi anyi bintu bikuabu), yeye ke udi ne bua kuela bizubu bia bintu ebi mu tshipanza tshidibu babilongoluele pamutu pa kubimansha panshi. Kadi tuetu bamone bintu bu mudi tubudimbu anyi mabeji panshi, tubiangule, tubiele mu tshintu tshia kuela bintu bia butshiafu. Bana betu, tuenzayiku muetu muonso bua kulama muaba utudi tuenzela mpungilu ne kumpenga kuonso ne mankenda. Kulama muaba utudi tuenzela mpungilu ne mankenda mbualu budi butangila muntu yonso. Muntu yonso yeye uditatshisha bua bualu ebu, ku dilolo dionso muaba wa mpungilu neushale amu ne mankenda. Tudi basue kuleja ngikadilu ya Nzambi wetu wa tshijila utudi tutendelela.—1 Pet. 1:15, 16; Ekes. 19:10; Dut. 23:14.
▪ Miaba itudi batudile: (1) Kanusombi anyi kanuladi bantu ba bungi mu nzubu padi muntu udi munuakidile kayi muanyishe to. (2) Wewe mumone ne: kuakuya muaba uuvua mulombe bua kutudila, manyisha kumpala kua dîba. (3) Kumpala kua wewe kulamba, lomba dianyisha kudi muena nzubu anyi kudi bana betu badi batangila malu a miaba ya kulala ku Nzubu wa Bukalenge bua bakuleje tshia kuenza. (4) Kunyangakaji bintu bidibu banutekele bonso ne benyi nebe to. Enza malu ne nkatshinkatshi. (5) Batendeledi ba Nzambi bonso badi ne bua kuikala ne mankenda. Ikala ushiya muaba uuvua mulale ne mankenda, kabidi mulongolola bimpe dituku dionso. Bikalabu balongolole bua bana betu badi bafuma kule kutudilabu ku Nzubu wa Bukalenge, badi ne bua kumulama ne mankenda. (6) Leja ngikadilu mimpe ya nyuma wa Nzambi kudi muanetu udi munuakidile anyi kudi bana betu bakuabu banudi nabu muaba umue.—Gal. 5:22, 23.