Shala muindile anu Yehowa

1. Mpungilu wetu Distrike udi ne tshiena-bualu kayi? Ne mbua tshinyi ntshiakanyine?

¹ Muprofete Yeshaya wakafunda ne: ‘Yehowa udi Nzambi udi ulumbulula biakane; bonso badi bamuindila badi bavudijibua disanka.’ (Yesh. 30:18b) Mu Bible mudi miyuki ya bungi idi ileja muvua Yehowa mubutule bena lukuna bende bua kusungila bantu bende. Ntshinyi tshitudi mua kulongela ku miyuki eyi? Ntshinyi tshitudi ne bua kuenza bua kushala bindile “dituku adi dinene dia Yehowa didi dikuatshisha bantu buowa?” (Yoe. 2:31, 32) Mpungilu wetu wa Distrike wa: “Lupandu luetu lukadi pabuipi” neatuambuluishe bua kuandamuna nkonko eyi ne kudikonkonona bimpe. Neatuambuluishe kabidi bua kushala anu bindile Yehowa.

2. Mmunyi mutudi mua kuleja ne: tudi ne disanka dia kubuela mu mpungilu wetu wa distrike?

² Ukadi mudilongolole bua kubuela mu mpungilu eu matuku onso asatu anyi? Ukadiku muambile mfumuebe wa mudimu bua ne: newangate dikisha bua kubuela mu mpungilu anyi? Suminyina ne kulomba ne sambila bua bualu ebu. Pashishe, lomba dikisha. (Neh. 2:4, 5) Bia muomumue, tudi ne bua kudilongolola kumpala kua dîba bua makuta a njila, muaba wa kulala ne makuabu malu adi ne mushinga. Patudi tudilongolola bimpe nunku, tudi tuleja mutudi ne dianyisha bua biakudia bidi Yehowa mututekele ku mesa a mu nyuma. Bakulu kabapu muoyo bua kuambuluisha bana betu badi dijinga ne diambuluisha bua kubuela mu mpungilu eu to, nangananga bakulakaje badi mu tshisumbu tshiabu.​—Gal. 6:10.

3. Nngikadilu kayi idi bantu ba Yehowa ne bua kuleja kudi bantu ba mu tshimenga tshidibu benzela mpungilu?

³ Bikadilu bimpe bidi bitumbisha Nzambi: Patudi tudisangisha bantu ba bungi mu mpungilu yetu, bienzedi bietu bimpe bitu biambuluisha bua kuyisha bantu. Ntshinyi tshitudi mua kuenza? Mbimpe bantu ba mu tshimenga tshitudi tuenzela mpungilu bamone ngikadilu yetu ya bena Kristo bu mudi muoyo-mule, lutulu, didikanda ne meji mimpe. (Gal. 5:22, 23; Filip. 4:5) Tuetu bonso tudi ne bua kuleja dinanga ‘didi kadiyi dienza malu ne dikamakama, kadiyi didikebela bintu, kadiyi dikuata tshiji lubilu.’ Nansha padiku bilumbu anyi dibenga kupetangana, tukebayi bua ‘kuenza malu onso bua kutumbisha Nzambi.’​—1 Kol. 10:31; 13:5.

4. Mmunyi mudi baledi mua kuambuluisha bana babu bua kufikabu ku ditumbisha Yehowa?

⁴ Kunyima kua mpungilu kampanda, muena nzubu wa tshilala benyi kansanga wakamba muvua bikadilu bia bana ba Bantemu ne tshimuenekelu tshiabu bimusankishe bikole, kujingaye bua “Bantemu bikale balua misangu yonso ku nzubu wa tshilala benyi au.” Bualu ebu kabuenaku butuenza disanka anyi? Bivua bienzeke nanku bualu baledi babu bavua balongeshe bana ne babalame bimpe. Baledi kabena ne bua kulekela bana babu batua eku ne eku muaba udibu batudile to. Kadi badi ne bua kulama bana babu bimpe. (Nsu. 29:15) Tudienzejayi bua bikadilu biabu bimpe bitumbishe Yehowa ne bisankishe mutshima wende.​—Nsu. 27:11.

5. Mmunyi mutudi mua kutumbisha Yehowa ku mvuadilu ne ndengejilu wetu wa mubidi?

⁵ Mvuadilu ne ndengejilu wa mubidi muimpe: Bantu nebanyishe mpungilu wetu anu pikala yonso wa kutudi mudienzeje bua kubenga kuvuala miodele ya bilamba ne ya nsuki ya tshikondo etshi idi mibi, idi kayiyi ileja kanemu, ne didipuekesha to. Tudi ne bua kuikala ne tshimuenekelu tshimpe patudi tuya mu mpungilu ne patudi tumufuma, patudi tuya kulongolola muaba wa kumuenzela ne patudi tubuelamu. Tuetu bantu ba Yehowa tudi ne bua kuditatshisha tshia kumpala bua dîna diende ne butumbi buende, pamutu pa kuenza malu adi muoyo wetu musue. Bamfumu ba mêku badi ne bua kutabalela bua bena mu mêku abu bikale ne tshimuenekelu tshidi tshileja kalolo ne didipuekesha dîba dionso.​—1 Tim. 2:9.

6. Bua tshinyi tudi ne bua kuikala amu ne tshimuenekelu tshimpe patudi tuikisha anyi tupitshisha dîba ku malu makuabu a tshianana?

⁶ Mbimpe tuetu kuikala amu ne tshimuenekelu tshimpe patudi tupitshisha dîba ku malu a tshianana ku ndekelu kua dituku dionso dia mpungilu. Mbimpe kuikala ne bilamba bietu bitudi bavuale mu mpungilu patudi tuya kudia muaba kampanda. Tuetu bavuale tumanyinu tua mpungilu, netupete mushindu wa kuyisha padi mpunga umueneka.​—2 Kol. 6:3, 4.

7. Ntshinyi tshitudi mua kuenza bua mpungilu kupitaye bimpe mu bulongame? (Tangila “Malu a kuvuluka bua Mpungilu wa Distrike.”)

⁷ Yeshaya wakamba ne: ‘Yehowa udi windila bua kunuleja dinanga diende; ne bua muanda eu neadibishe bua kunuleja luse.’ (Yesh. 30:18a) Bua kuleja mutudi tuanyisha luse ne dinanga bidi Yehowa utuleja, tumutumbishayi ku bienzedi ne tshimuenekelu tshietu mu mpungilu. Eyowa, Mpungilu wetu wa Distrike wa: “Lupandu luetu lukadi pabuipi” atumbishe Nzambi ne atuambuluishe bua kutumbisha Nzambi ne kushala anu bamuindile!

[Kazubu mu dibeji 5]

Malu a kuvuluka bua mpungilu wa distrike

▪ Mêba: Mu matuku onso asatu, programe neatuadije pa dîba dia 9:30 mu dinda. Nebakangule biibi pa dîba dia 8:00 mu dinda. Minite mikese kumpala kua mpungilu kutuadija, mulombodi wa tshitupa tshia mu dinda anyi tshia dilolo neasombe ku tshiakuidi padi mijiki yenda idila. Dîba adi, tuetu bonso tudi ne bua kusomba pa miaba yetu bua mpungilu kutuadijaye bimpe. Mu Ditanu mpungilu neajike pa dîba dia 5:15 ku dilolo, mu Disambombo neajike pa dîba dia 5:05, ne mu Dia lumingu neajike pa dîba dia 4:10 ku dilolo.

▪ Dikuatshila miaba ya kusomba: Bantu baudi mua kukuatshila miaba ngaba banudi benze nabu luendu pamue anyi banudi nabu mu nzubu umue.

▪ Biakudia bia mu midi: Bavua batulombe bua kulua ne biakudia bu midioku bidi mua kudisha mubidi bu mudi: mampa, mikata, bimuma (bibote), tumbele, benyi anyi kato. Bintu bia kunua bu mudi mâyi, kafe anyi tshiayi nudi mua kulua nabi biela mu bintu bidi kabiyi mua kutayika. Mbakandike bua kulua ne maluvu adi akuatangana mu mpungilu. Tuetu balue ne bietu biakudia ne biakunua mu mpungilu, katuakuya bua kubisumba muaba wa mpungilu to. (Numanye ne: Ki mbanyishe nansha kakese bua bapanyi ba bintu kubuela muaba udi mpungilu wenzekela to.​—Yone 2:13-17.) Aba badi balambila pa muaba wa mpungilu badi ne bua kuanji kulomba dianyisha kudi bana betu badi balombola mpungilu. Tuikalayi ne budimu bua kuepuka njiwu.​—Luka 10:38-42.

▪ Mapa: Bua kulongolola mpungilu wa distrike, tutu tutula makuta a bungi. Tudi mua kuleja dianyisha dietu patudi tuela makuta mu tushete tua mapa a mudimu wa buambi ku Nzubu wa Bukalenge anyi mu mpungilu ne disanka dionso.

▪ Diambuluisha badi bapeta njiwu: Bena mu tshibambalu tshia diambuluisha babedi badi badilakana bua muvuabu bababikile too ne bua tumalu tukese. Nanku pikala bualu bua disama bumueneke panudi mu mpungilu, bikila umue wa ku bana betu badi bakidilangana udi pabuipi nebe bua amanyishe bena ku tshibambalu tshia diondopangana.

▪ Dikuata mêyi ne bindidimbi: Katuena mua kuasa tshiamu nansha tshimue ku nshinga ya nzembu ya biamu bidibu benza nabi mudimu muaba wa mpungilu nansha. Nuenze mudimu ne bintu ebi mu mushindu wa kubenga kufila ditanaji kudi bakuabu.

▪ Dikuata foto: Paudi ukuata foto dîba ditudi munkatshi mua mpungilu, ukange kamu ka midilu.

▪ Telefone ya ku bianza: Nudi mua kuenza muenu muonso bua tuamu tuenu kutufidi ditanaji to.

▪ Mankenda: Tudi bafike ku dimona ne: bana betu batu baya kusumba biakudia kudi bapanyishi ba bintu batu bimansha bintu panshi tshianana tshianana. Ke bualu kayi muaba ututu tuenzela mpungilu utu uula ne mabeji, tubudimbu, tutotola ne bintu bikuabu bia buena ebi. Bikala muntu musue kusumba biakudia kudi bapanyi ba bintu (tshilejilu bu mudi mbombo, bisukuita, tuto, makopo a misanyi anyi bintu bikuabu), udi ne bua kuela bizubu bia bintu ebi mu tshintu tshidibu babilongoluele pamutu pa kubimansha panshi. Kadi tuetu bamone bintu bu mudi tubudimbu anyi mabeji panshi, tubiambule ne tubiele mu tshintu tshia kuela bintu bia butshiafu. Tuenzayi muetu muonso bana betu bua kulama muaba utudi tuenzela mpungilu ne kumpenga kuonso ne mankenda. Kulama muaba utudi tuenzela mpungilu ne mankenda mbualu bua muntu yonso. Muntu yonso yeye muikale uditatshisha bua kushiya muaba wa mpungilu ne mankenda dituku dionso, muaba eu newikale anu ne mankenda. Tudi basue kuleja ngikadilu ya Nzambi wa tshijila utudi tutendelela.​—1 Pet. 1:15, 16; Ekes. 19:10; Dut. 23:14.

▪ Miaba itudi batudile: (1) Kanusombi anyi kanuladi bantu ba bungi mu nzubu padi muntu udi munuakidile kayi muanyishe to. (2) Wewe mumone ne: kuakuya muaba uuvua mulombe bua bakuakidile, manyisha kumpala kua dîba. (3) Kumpala kua wewe kulamba, lomba dianyisha kudi muena nzubu anyi kudi bana betu badibu bateke bua kutangila malu a miaba ya kulala ku Nzubu wa Bukalenge bua bakuambile tshia kuenza. (4) Enza malu ne nkatshinkatshi. (5) Batendeledi ba Nzambi bonso badi ne bua kuikala ne mankenda. Ikala ushiya muaba uuvua mulale ne mankenda dituku dionso. Bikalabu balongolole bua bana betu badi bafuma kule kutudilabu ku Nzubu wa Bukalenge, badi ne bua kumulama ne mankenda. (6) Leja ngikadilu mimpe ya nyuma wa Nzambi kudi muanetu udi munuakidile ne kudi bana benu bakuabu banudi nabu muaba umue.​—Gal. 5:22, 23.