Kampanye ka pa buloba bujima bua kubikila bantu mu Mpungilu wetu wa Distrike wa ‘Lupandu luetu lukadi pabuipi’
Mumanyishi yonso neabanye tubeji etu
1 Kutuadijila mu ngondo muisambombo wa tshidimu etshi, kampanye kanene ka diabanya tubeji etu nekenzeke pa buloba bujima bua kubikila bantu mu mpungilu ya distrike yenzeka mu matunga matue ku 155. Kampanye aka nekenzeke kabidi bua mpuilu wa pa buende wenzabu mu ditunga dia Allemagne, dia République tchèque ne dia Pologne mu ngondo wa muanda mutekete ne mu lumingu lua kumpala lua ngondo wa muanda mukulu wa tshidimu tshitudi natshi etshi.
2 Mpungilu eyi idi ileja mushindu wakumbaja Nzambi dilaya diende dia kupandisha bantu ku bulongolodi ebu bubi neyisankishe bantu ba bungi bualu tukadi ku ndekelu kua matuku a ku nshikidilu aa. Malu umvuabu neabasake bua kuela meji ku tshikala ne bua kuenzeka mu matuku atshilualua. Bua bantu binunu ne binunu kumvuabu lumu luimpe elu ludi lukolesha ku muoyo ne ludi lupesha bantu ditekemena, bisumbu bia Bantemu ba Yehowa bitue ku 98 000 nebiditue bionso ne muoyo mujima mu kampanye aka ka dibikila bantu bua balue mu mpungilu wa distrike.
3 Nebatumine tshisumbu tshionso tubeji tua dibikila natu bantu etu bungi bukumbane bua mumanyishi yonso kupetaye tuende 50. Koku kushala tukuabu, nebatupeshe bampanda-njila. Tshisumbu tshionso netshituadije kuenza kampanye aka mbingu isatu kumpala kua dituku didi mpungilu uditshi ne bua kubuela kutuadija. Nuenu benze nunku, nenupete mushindu wa kufila tubeji etu mu tshitupa tshinene anyi mene mu teritware wenu yonso mujima.
4 Mbatulombe bua tuditatshishe bua kupesha muntu ne muntu wa mu teritware wetu kende kabeji ka dibikila. Kadi patudi tusangana muena ku mbelu kayiku, tumuelele kende kabeji muinshi mua tshiibi, kadi tuikale ne budimu. Bana betu tuenze muetu muonso bua kuabanya tubeji etu tuonso anu munkatshi mua mbingu isatu idibu baleje eyi.
5 Tudi batuishibue ne: kampanye aka ka dibikila bantu mu Mpungilu wa Distrike wa ‘Lupandu luetu lukadi pabuipi’ nekatuambuluishe bua kuyisha bikole menemene bilondeshile mudibu baleje mu tshiena-bualu etshi. Tudi tulomba Yehowa bua atuambuluishe mu bionso bituenza bua kampanye aka ka pa buloba bujima.