Bipeta bia disanka bia mpuilu “Ditshina dia Nzambi”

¹ Mpuilu ya distrike “Ditshina dia Nzambi” yatu ku tshibungubungu. Mpuilu eyi, mituadija mu ngondo wa Tshimungu mushale, yakatungunuka too ne mu ngondo wa Kasuamansense wa tshine tshidimu atshi, ivua mituambuluishe bua kujingulula biakane tshidi ditshina dia Nzambi diumvuija ne bua tshinyi bidi bikengela kudileja.

² Ku diambuluisha dia Yehowa, mpuilu ya distrike “Ditshina dia Nzambi” ivua bikondo bia disanka bivua bisangishe, munkatshi mua matuku asatu malondangane, bantu bapite pa 236 300. Ku buonso buabo, bantu 2 902 pa kusanga ne tuyeke tunayi, bakangata batismo bu tshimfuanyi tshia mulambo wa bumuntu buabo kudi Nzambi. Ntatu ya difuta tudiendelandela kayakapumbisha bena mpuilu bua kusankabo mu dikala pamue ditambe buimpe ne bateleji bakuabo, kabidi ne kubabidila biakudia bisheme bia mu nyuma bifila mu mpuilu eyi. Luapolo mivule idi ileja ne: nansha bana betu bafofo bavua bende mitantshi mile mipite too ne pa kilometre 400 bua kuikalabo mu bisangilu bia mu nyuma bishidimunyi ebi.

³ Ndongoluelu ne dilongesha difila mu mpuilu “Ditshina dia Nzambi” kabiakapanga kulenga mitshima ya bena mu bulongolodi ebu, pamue ne banangi ba bulelela bavua babuelemu. Mulombodi kampanda wa kalasa wakamba ne: “Tshindi mumone ne mubambishe pa bidi bitangila bulongame munkatshi mua Bantemu ba Yehowa ntshikoke ntema yanyi. Biena-bualu biumvuija bivua ne dikuatshisha dikole; pamu’apa ndi mua kulua dituku dikuabu Ntemu wa Yehowa.” Ku luabo luseke, bena dibaka kampanda bakamba ne: “Bulongolodi ebu kabuena bulongolodi bukese bu mutuvua tuela meji to; budi bulelela bulongolodi bunene. Mibelu idibo bafilamu idi ilombola ne ipetesha meji.” Munangi umue wa bulelela utshivua amu ‘uzobela’ pankatshi pa nseke ibidi, wakapangadija ne muoyo mujima bua kuangataye batismo mu mpuilu utshivuavua. Bua bana betu, mumvuija abo akaleja ne: bavua bapingana mu teritware yabo bapangadika bushuwa bua kuleja ditshina dia Nzambi pa kuenza mudimu ne anyima wabu wonso.

⁴ Mbimueneke patoke ne: mpuilu ya distrike “Ditshina dia Nzambi,” ivua mienjibue nansha muvuaku ntatu ya mishindu yonso mu teritware wetu, ivua bikondo bilenga biakapetesha aba buonso badi batshina Nzambi masanka mavule. (Mus. wa 128:1) Bua tshidimu tshia 1995, Société mmupangadija bua kulongolola mpuilu ya distrike ya matuku asatu mu miaba mivule. Ndongoluelu eu neafikishe kabidi bungi bupite bunene bua bantu ku didisanga netu ne kipatshila ka kulonga mua kutshina Yehowa ne kuendela mu njila yende.