“Tutumbishayi Nzambi”: Mpungilu wa Distrike wa Bantemu ba Yehowa bua tshidimu tshia 2003
1 Yehowa wakatuma dîyi mukana mua muprofete wende wa lulamatu Yeshaya ne: ‘Umvuayi dîyi dianyi, nuenu bantu banyi; telejayi matshi enu kundi, nuenu ba mu tshisamba tshianyi.’ (Yesh. 51:4) Mu tshikondo tshidi tshienda tshikola anu kukola etshi tshia ku nshikidilu, katuenaku tumona ne: bidi bikengela kutamba kutuma ntema yetu yonso ku mêyi a Yehowa kupita mu bikondo kayi bionso anyi? Mushindu umue utudi mua ‘kuteleja’ Yehowa nkutumikila dîyi diende didiye utuambila bua kuikala tudisangisha bua kumutendelela. Tudi bashale bindile ne muoyo mujima tshikondo tshia pa buatshi tshitu mpungilu wetu wa distrike wa ku tshidimu tshionso utupetesha! Kasumbu Kaludiki ka Bantemu ba Yehowa nkalongolole kabidi bua mpungilu ya distrike kuenzekayi miaba ya bungi mu teritware wetu mu tshidimu tshia 2003.
2 Anu mudibu baleje mu Tshibumba tshia Nsentedi tshia dia 1 Kashipu 2002, mpungilu ya bantu bafumine mu matunga a bungi neyenzeke mu bimue bimenga, bantu babuelamu nebafumine mu matunga mavule a pa buloba bujima. Bu muikalaku anu bimenga bikese bikalabu mua kuenzelamu mpungilu eu, anu bena mu bisumbu biatumabu bua kubuelamu ke bikala mua kuya. Kadi miaba yonso yenzekela mpungilu ya distrike mikuabu eyi neyikale payi anu bu eyi ya bantu bafumine mu matunga a bungi. Bu muikalaku ba-misionere miaba ya bungi yenzekela mpungilu ayi, nenku nebatulondele amue malu mamonamona. Ntshinyi tshitudi mua kuenza bua bionso bidibu balongolola mpindieu bua mpungilu ya muetu emu kutuambuluishayi?
3 Tuikaleku dituku dionso: Bua tuetu kupeta mibelu ya bungi eyi ya kudi kasumbu ka mupika wa lulamatu ne wa budimu, tudilongololayi bua kulonda programe yonso mujima wa mpungilu eu. (Mat. 24:45, NW) Bidi bikengela bua ulombe mfumuebe wa mudimu matuku a dikisha bua umone mua kuikalamu matuku onso enzeka mpungilu eu anyi? Kumpala kua Nehemiya kulombaye Mukalenge Atashasete dianyisha bua kuyaye ku Yelushalema bua kuasulula lumbu, ‘wakatendelela Nzambi wa mu diulu.’ (Neh. 2:4) Wewe pebe usambile Yehowa bua akupe dikima bua ulombe mfumuebe wa mudimu akulekele uye mu mpungilu matuku onso asatu. Kadi newenze tshinyi bikala mfumuebe wa mudimu kayi musue bua upumbishe ku mudimu mu matuku enzeka mpungilu? Pamuapa wewe mumumvuije ne: malu adibu batulongesha mu mpungilu yetu adi atuambuluisha bua kuikala bena mudimu ba malu malelela badi kabayi bibila, ba tshisumi ne ba kueyemena bidi mua kumuambuluisha bua kuitabaye. Kabidi, tuetu bikale ne bamue bena mu dîku dietu badi kabayi Bantemu, netuenze bimpe tuetu babamanyishe kumpala kua dîba bua mpungilu wetu.
4 Miaba ya kulala: Mbalongolole bua se: bantu badi balua ku mpungilu badi ne dijinga dia muaba wa kulala batudile ku nzubu ya bana betu. Tudi ne bua kuleja dianyisha kudi bana betu badi batuitabila bua kutudila kumabu. Kabidi, nansha buobu mua kutuakidila nunku, katujingi bua kushalaku matuku a bungi kumpala ta kunyima kua mpungilu to. Bana betu badi bafila miaba ya kulala anu bua matuku a mpungilu aa. Padibu batupesha miaba eyi, tudi ne bua kunemeka bintu bia bende bia muena nzubu, katunyangi kantu nansha kamue, katuena ne bua kubuela tshibuelabuela miaba idibu kabayi batuanyishila bua kubuela to. Mbimpe kabidi bua tuikale ne dîsu dikole bua bana batudi nabu benze pabu bia muomumue. Bikala bena nzubu kampanda ne lutatu kansanga pa bualu ebu, mbimpe bamanyishe diakamue tshibambalu tshia miaba ya kulala ne tshiotshi netshibambuluishe. Bua malu adi atangila tshibambalu etshi kuendawu bimpe, tuetu bonso tudi ne bua kueleshangana nabu maboko. Bavua batumanyishe ne: bamue bana betu batu babenga ku bukole miaba idibu babapesha bua kutudila, baya pamu’apa kua mulunda wabu peshi mumanyangana nabu kampanda. Ngenzelu eu udi ukondakaja mudimu wa aba badibu buomekele bujitu bua Tshibambalu tshia miaba ya kulala. Tudi tunulomba bonso bua nutumikile bionso bidi tshibambalu etshi tshilongolole.
5 Kakuyi mpata, Yehowa udi ubenesha bionso bitudi tuenza bua mpungilu yetu ya ku tshidimu ku tshidimu eyi. Bu mudi bana betu ba bungi batu bumbukila kule bua kubuela mu mpungilu wa distrike bikale dijinga ne kua kutudila, Yehowa kakubalekela to, neabambuluishe. Bu mudi ntendelelu mulelela muikale ulomba malu aa, tudi ne bua kulonda ne disanka mêyi adibu bafile aa. Tulejayi ne: tudi bena lulamatu nansha mu tu-malu tua tukese tukese; nenku netupete masanka a bungi adi Yehowa mulaye bantu badiye munange.—Luka 16:10.
6 Tangila mu tshisumbu tshienu: Tuetu bamanye ne: muanetu kampanda udi ne lutatu kansanga (bulema anyi ne: mmupangile tshinga tshintu) ludi mua kumupangisha bua kulua mu mpungilu, katuenaku mua ‘kunzulula mioyo yetu,’ kumuleja dinanga ne kumuambuluishaku anyi? (2 Kol. 6:12, 13; Dut. 15:7) Ke lungenyi luvua Paulo mukankamije bantu mu mukanda wa 2 Kolinto 8:14 bua kuikalabu nalu. Bua tshinyi kubengaku kuambila bantu badi ne ntatu ya nunku bua nuenze nabu luendu pamue bua kuya ku mpungilu? Buobu bikale bampanda-njila, pamuapa badi ne malu malenga a bungi akadibu bamone adibu mua kunulondela panuikale mu njila. Bikalabu bantu bakadi bakulakaje ba mu tshisumbu, badi mua kuikala ne diyuki dilenga dia malu a mu bulongolodi diutu bumue kuyi muanji kumvua. Kuenaku umona se: kudia malanda ne bana betu abu kudi mua kuikala diambuluisha buebe wewe ne bua dîku diebe anyi? Nebanyishe muoyo webe wa kalolo ne Yehowa pende neakubeneshe.—Nsu. 28:27; Mat. 10:42.
7 Nansha mudi dikumbaja majinga a nunku mua kuikala nangananga pa makaya a balela babu badi bena Kristo, bakulu ne bena mu tshisumbu bakuabu badi bamanye ntatu ayi badi mua kubambuluisha ne dinanga dionso. (1 Tim. 5:4) Padi bantu bafundila komite wa mudimu wa tshisumbu mikanda balomba miaba idibu mua kuya kutudila, bena komite eu badi ne bua kukonkonona ngikadilu ya muntu eu bangabanga ne kutumina bena Tshibambalu tshia miaba ya kulala mikanda eyi.
8 Tudifilayi ku budisuile mu mudimu eu: Dîba didi mpungilu wenzeka, bena budisuile nkama mivule batu bambuluisha mu midimu ya bungi kabayi bikisha. Bakididianganyi ne basadidi badi ku miaba ya dimanyikila mashinyi ta makalu badi balombola bantu pa miaba ya kusomba ne babatangidila mashinyi, mioto anyi makalu abu muaba udibu baimanyikile. Tshibambalu tshia mankenda tshidi tshienza bua lumu ludi lutuendele lua ne: tudi bantu bena mankenda luya kule, benza muabu muonso bua muaba wetu utudi tuenzela ntendelelu bua matuku makese eu ushale ne mankenda kupita mutuvua bausangane. Tudiku mua kuambuluisha tshibambalu etshi ta bikuabu bidi mua kuikala netu dijinga anyi? Neudifileku ku budisuile bua kuenza mudimu “mu buobumue” pamue ne bana betu bakuabu anyi?—Sef. 3:9.
9 Bu mudi ‘tshimuenekelu tshia malu a pa buloba ebu tshienda tshijimina,’ tudi tujinga bua mpungilu yetu ya distrike ituambuluishe bikole bua kushala batabale mu nyuma. (1 Kol. 7:31) Nansha mudibi bilomba didikolesha bua kumona mua kuikalaku matuku onso asatu, kuenza nenku kudi ne mushinga wa bungi. Mpungilu wa Distrike wa “Tutumbishayi Nzambi” wa tshidimu etshi tshia 2003 mmulongolola bua kutuambuluisha tushale bashindame eku bindile dikumbana dia tshidi Yehowa mukosele bulongolodi bua Satana ebu. Katulekedi bualu nansha bumue butupangisha bua kuteleja malu adibu batulongesha adi Yehowa mutulongoluele.—Yesh. 51:4, 5.
[Kazubu mu dibeji 3]
Ndongamu
Ditanu ne Disambombo
9:30 wa dinda - 5:00 mu mapingaja
Dia lumingu
9:30 wa dinda - 4:05 mu mapingaja
[Kazubu mu dibeji 4]
Amue malu a kulonda bua kubuela mu Mpungilu wa Distrike wa “Tutumbishayi Nzambi”
1. Biwikala ne bua kuenza luendu lule bua kubuela mu mpungilu, utuadije kulama makuta a biakudia ne a njila bua dîku diebe dijima.
2. Uvuluke kabidi mapa a budisuile a kufila bua dilongolola dia mpungilu. ‘Kumueneki ku mêsu kua Yehowa bianza bitupu to,’ kadi ‘umutumbishe ne biuma biebe.’—Dut. 16:16; Nsu. 3:9.
3. Netuikale mua kutumbisha dîna dia Yehowa bituikala ne bienzedi bimpe ne mvuadilu mulenga wa mankenda dîba dia mpungilu.—1 Kol. 10:31.
4. Udilongolole bua kulonda tshidi bana betu badi benza mudimu wa diakidilangana bakulomba. Kulami miaba ya disomba tshianana tshianana to. Kadi udi mua kuyilamina anu bua bena dîku diebe anyi bantu baudi muende nabu.
5. Mêba a dikisha, kanudi biakudia bia bujitu to bua kabilu kunupangisha bua kuteleja bimpe ndongamu wa mu mapingaja. Nuamanya, diukuta ditu difila tulu.—Luka 8:18.
6. Mankenda atu apa Yehowa lumu. Ku ndekelu kua tshitupa tshionso, muntu yonso neangule mabeji ne bintu bikuabu bia bukoya ne kubiela mu miaba mibilongoluela, bua muaba wa mpungilu kushalawu ne mankenda.—1 Pet. 1:15, 16.