“Benji ba Dîyi dia Nzambi”: Mpungilu wa Distrike wa Bantemu ba Yehowa bua tshidimu tshia 2000
“Nenkusakidile mu disangisha dinene dia bantu; nenkutumbishe munkatshi mua tshisumbu tshinene tshia bakole.” (Mus. 35:18) Elabi meji disanka divua Davidi mua kuikala nadi lelu’eu dia kumona binunu bia bantu bungi nunku badisangisha mu ditalala bua Nzambi kubalongeshaye mu mpungilu yetu! Uvuaku pebe mu bantu bapite pa 250 000 bavua babuele mu Mpungilu ya Distrike ya “Dîyi dia mulayi dia Nzambi” anyi? Biangatshile pankatshi pa ngondo wa muanda-mutekete too ne ku ndekelu kua ngondo wa muanda-mukulu, mu 1999, bavua balongolole bua kuenza mpungilu 77 mu miaba 59 mu République démocratique du Congo ne mu Congo-Brazzaville.
2 Mu Musambu 122:1 mufundi wa misambu wakamba ne: ‘Ngakadi ne disanka pakungambilabu ne: Tuye mu nzubu wa Yehowa.’ Bushuwa, uvua pebe ne disanka dia muomumue pawakapeta tshisakidila tshia Mudimu wetu wa Bukalenge tshivua tshiakula bua mpungilu wa distrike. Kakuyi mpata, udi uvuluka malu mimpe atuvua balonge mu mpungilu au. Mu bidimu lukama bia kumpala, mupostolo Petelo wakavuluija bena Kristo ne: bivua ne bua kuikala bimpe bu buobu mua kuteya ntema ku dîyi dia mulayi anu bu ku “muinda udi utema mu muaba wa mîdima.” (2 Pet. 1:19) Ke mudibi kabidi lelu’eu buetu tuetu. Bu mutudi pa buloba budi bulombola kudi Satana, tudi ne dianyisha dia mudibu batupatule mu mîdima ya mu nyuma. (Kolos. 1:13; 1 Pet. 2:9; 1 Yone 5:19) Bua tuetu kutungunuka ne kuenda mu butoke, bidi bikengela tuikale ne ditabuja dikole pa kuteya ntema ku Dîyi dia Yehowa difunda ku spiritu. Ke tshivua mpungilu wa distrike mutukankamije bua kuenza.
3 Bantu bavua babuele mu mpungilu eu bakapeta bivuabu batekemene anyi? Ndongamu eu wakafika ku tshipatshila tshiende anyi? Malu akamba bantu ba bungi adi aleja ne: ndongamu eu uvua muakanyine menemene bikondo bitudi ebi. Muntu kampanda wakamba ne: “Ndongamu eu neangambuluishe bua tshipu muoyo dipanga bupuangane dianyi ne kumona mua kuindila dituku dia Yehowa tshiyi ne katoba ka ku malu a pa buloba to.” Muanetu wa balume kansanga ukadi munenge mu bulelela wakamba ne: “Ndongamu eu mmutupingaje mu njila. Udi utuambuluisha bua kumona bituikala tutshidi mu njila muakane.” Muanetu mukuabu wakamba ne: “Pa kumona ntatu mikole itudi tutantamena matuku aa, tshivuaku muele meji ne: mvua mua kubuela mu mpungilu wa nunku to. Mmuleje ne: tudi bushuwa mu buobumue mu ditabuja nansha mutudi mutantshi ne bakuabu. Yehowa mmuena kalolo ne udi tshimuenekelu mene tshia dinanga. Udi uditatshisha bua bualu buetu.” Tudiku tunyingalala bua madikolela atuvua benze bua kubuela mu mpungilu tshidimu tshishale anyi? Tòo.
4 Mpungilu yetu ya distrike mu tshidimu tshia 2000 neyitupeshe kabidi mushindu wa kudisangisha ne basamunyi netu ba Yehowa badi “bamanye bupele buabu bua mu nyuma” ne bikale ne disanka ne dijinga dikole dia “kuteleja tshidi spiritu wambila bisumbu.”—Mat. 5:3, NW; Buak. 2:29, NW.
5 Newikaleku anyi? Dianjila kudilongolola mpindieu. Angata dipangadika dia kuikalamu matuku onso asatu a didia edi dilenga dia mu nyuma kutuadijila ku musambu wa mbangilu too ne ku disambila dia nkomenu. Pa tshibidilu, mpungilu udibu bakulomba bua kubuela ng’udi pabuipi ne muaba uudi musombele. Société mmukupepejile malu pa muanda eu. Mbasakidile muaba mupiamupia wenzekela mpungilu ku eyi ya tshidimu tshishale bua yonso wa kutudi kupetaye mushindu wa kudia biakudia bia mu nyuma ebi pamue ne bena diende bonso. (Dut. 31:12) Bidi bikengela kutuadija mpindieu kulama makuta bua kumona mua kufutshila bena dîku dienu njila. Bamue bavua benze madikolela a bungi bua kubuela mu mpungilu ya distrike ya 1999. Tshilejilu, muanetu wa balume kampanda wakenza luendu lua kilometre 300 ne muanende panyima pa dikalu bua kufika muaba uvua mpungilu ne bua kuenzekela. Wakajuka mu musoko wabu matuku asatu kunyima kua mukajende mumane kufuila pa lulelu. Muanetu eu wakashiya muana mutoke kudi baku bende, ne kuenzaye luendu mutangile muaba uvua mpungilu e kuenzaye mene muyuki wende uvuaye mulongolole! Bua kuleja dianyisha bua malu adi Société mulongolole, tudi ne bua kuenza muetu muonso bua kubuela mu mpungilu mu 2000.
6 Miaba ya kulala: Pa tshibidilu, bana betu ke badi bafila miaba ya kulala. Tudi ne bua kuikala ne dianyisha kudi bana betu badi bitaba bua kutupesha miaba ya kulala. Kabidi, ki mbimpe bua padibu batuakidila mushindu’eu kujinga bua batuteke matuku a bungi kumpala anyi kunyima kua mpungilu to. Bana betu badi bafila miaba ya kulala anu bua matuku a mpungilu. Padibu batupesha miaba ya dilala tudi ne bua kunemeka bintu bia muena nzubu, katunyangi kantu ka bende nansha kamue, katuena ne bua kuya miaba idibu kabayi batuleje ne mbimpe tuikale ne dîsu dikole bua bana betu balela benze pabu bia muomumue. Bikala bena nzubu bikale ne lutatu kampanda pa bualu ebu, badi ne bua kumanyisha diakamue tshibambalu tshia miaba ya kulala ne tshiotshi netshibambuluishe. Bua tshibambalu tshia miaba ya kulala kuendatshi bimpe, tuetu bonso tudi ne bua kueleshangana diboko. (Eb. 13:17) Bavua batumanyishe mudi bamue babenga ku bukole miaba ya kulala mibapesha ne baya pamu’apa kua mulunda wabu kampanda peshi mumanyangana nabu. Ngenzelu eu udi ukondakaja mudimu wa bana betu buomekela bujitu bua Tshibambalu tshia miaba ya kulala. Tudi tunulomba bonso bua kutuishangana maboko ne tshibambalu etshi.
7 Kakuyi mpata, Yehowa udi ukuatshisha malu atudi tulongolola bua mpungilu ya ku tshidimu. Bu mudi bana betu ba bungi batu benza luendu bua kubuela mu mpungilu wa distrike dijinga ne miaba ya kutudila, tudi mua kuikala ne dishindika dia se: Yehowa neakumbaje majinga abu mu muanda eu. Bu mudi malu aa mikale tshitupa tshia ntendelelu mulelela, tudi ne bua kulonda ne disanka mêyi aa adibu bafile. Tulejayi ne: tudi bena lulamatu mu bidi bikese; nenku netupete masanka a bungi adi mindile bantu badi Yehowa munange. —Luka 16:10.
8 Tutabalelayi badi ne majinga a pa buawu: Bakulakaje peshi balema, basadidi ba ku dîba ne ku dîba anyi bantu bakuabu badi pamu’apa dijinga ne diambuluisha bua kumonabu mua kubuela mu mpungilu. Bena mu mêku abu, bakulu peshi bena mu tshisumbu badi bamanye tshidibu natshi dijinga badi mua kuleja dinanga ne kubakumbajilatshi pamutu pa kushiya bujitu ebu pa makaya a bana betu badi balongolola mpungilu.—Tangila 1 Timote 5:4.
9 Satana mmutete kumbusha ntema yebe ku malu a mu nyuma anyi? Bia dibungama, bana betu ba bungi ne mêku abu batu bapumbisha bua kuya kudia biakudia bia mu nyuma bia mushinga mukole. Tshilejilu, batu bapumbisha bitupa bia mpungilu wa distrike bia mu Ditanu. Mu imue miaba mene, bana betu ba bungi batu bapangila dilongesha dia mu nyuma ne bunyana bitudi mua kupeta mu bitupa bia mpungilu bia mu Ditanu.
10 Bamue bana betu batu batshina bua kuyikila ne bamfumu babu ba mudimu bua kulomba matuku a diikisha ne kumonabu mua kubuela mu mpungilu. Bitu pebe bikufikila nunku anyi? Bikalabi nanku, bua tshinyi kubenga kusambila Yehowa bua bualu ebu ne kupeta dikima dia kuleja mfumuebe wa mudimu bualu buudi nabu? Vuluka malu mimpe akafikila Nehemiya uvua muikale pende ne tshilumbu tshia muomumue. (Neh. 2:1-6) Ikala ne ditabuja mu muoyo muimpe udi nawu Tatu wetu wa mu diulu bua kukuambuluisha, ne wikale mujadike ne: biwavuluka malu a Bukalenge kumpala, yeye neafile bidi bikengedibua.—Mat. 6:32b, 33.
11 Mpungilu yetu itu ikuambuluisha anyi? Muanetu wa bakaji kampanda wa ku Est kua États-Unis wakafunda ne: “Ndi nnuela tuasakidila wa manza ntente bua mpungilu wa distrike wa 1999. Kudisangisha ne bana betu bantu mmona anu musangu umue ku tshidimu kudi kunsankisha bikole. Ngakafika ku dimanya bulelela ntshidi mushikankunde tshikondo tshimvua muîmite difu dia panshi, ne ntshidi mvuluka ne dianyisha dîba dituakaya ne muntu uvua undongesha Bible bua musangu wa kumpala mu mpungilu. Ngakela mêsu muulu mu tshipalu tshia ndundu atshi tshivua katshiyi tshibuikila ku mutu dîba dituvua tuimba musambu wa Bukalenge wa ‘Des myriades de frères’ (Misumba ya bana betu), ne meme kuasa muadi. Mvua ndiebeja mundamunda se: ‘Ne bantu bonso aba balenga mushindu’eu muab’eu, mmunyi mudi Yehowa mua kunnanga?’ Anu dituku adi ngakangata dipangadika dia kusadila Yehowa ne muoyo umue.” Mmunyipu mudi bualu ebu butusanguluja mutshima! Bidi bienza disanka menemene bua kuikala pamue ne bantu bakezuke ba Yehowa, ki mmuomu anyi?
12 Bu mutukadi mu tshitupa tshia ndekelu tshia matuku a ku nshikidilu, tudi dijinga ne mpungilu wetu wa distrike wa ku tshidimu kupita muvuabi kumpala. Eu mmushindu udi Yehowa mulongolole bua tuetu kulama makanda etu a mu nyuma ne nkatshinkatshi. Nunku, ikala mupangadije bua kuikalaku matuku onso asatu a Mpungilu wa Distrike wa “Benji ba Dîyi dia Nzambi” wa tshidimu etshi. Mmunyi muudi mua kukumbaja dipangadika diebe? Dianjila kulomba mfumuebe wa mudimu kumpala kua dîba bua kupeta matuku a diikisha bua wamona mua kubuela mu mpungilu yonso mujima. Biwikala kuyi ne makuta a bungi, tuadija kulama makuta adi akengedibua bua kubuela mu mpungilu. Sambila Yehowa bua akuambuluishe bua kutshimuna lutatu luonso ludi mua kumueneka. Wewe muenze nanku, neumvue bunyana bulenga bua bana betu ne kabidi neuteleje mêyi a muoyo wa tshiendelele a kudi Yehowa, Tatu wetu wa mu diulu udi mutunange.—Tangila Yone 6:68.
[Kazubu mu dibeji 3]
Ndongamu
Ditanu ne Disambombo
9:30 mu dinda – 5:00 mu mapingaja
Dia lumingu
9:30 mu dinda – 4:00 mu mapingaja
[Kazubu mu dibeji 4]
Amue malu a kuenza bua kubuela mu mpungilu ya “Benji ba Dîyi dia Nzambi”
1. Biwikala ne bua kuenza luendu lule bua kubuela mu mpungilu, utuadije kulama makuta a biakudia ne a difutshila dîku diebe njila.
2. Pangadija kabidi bua kukuatshisha mpungilu ne mapa ebe a ku budisuile. ‘Kumueneki ku mêsu kua Yehowa bianza bitupu to,’ kadi ‘umutumbishe ne biuma biebe.’—Dut. 16:16; Nsu. 3:9.
3. Netutumbishe kabidi dîna dia Yehowa pa kuikala ne bienzedi bimpe, mvuadilu mulenga ne muakanyine, dîba dia mpungilu.—1 Kol. 10:31.
4. Ikala mupangadije bua kueleshangana diboko ne bana betu badi benza mudimu wa bulongame. Kulami miaba patupu to, kadi udi mua kuyilama anu bua bena dîku diebe ne baudi muende nabu.
5. Mêba a diikisha, kanudi biakudia bia bujitu bua kabilu kunupangisha bua kuteleja bilenga ndongamu wa mu mapingaja to. Kudia kukuta bikole kutu kufila tulu.—Luka 8:18.
6. Mankenda atu apa Yehowa lumu. Ku ndekelu kua tshitupa tshionso, muntu yonso neangule mabeji ne bintu bikuabu bia bukoya ne kubiela mu miaba mibilongoluela, bua muaba wa mpungilu kushalawu ne mankenda.—1 Pet. 1:15, 16.