Ndongamu wa Bisangilu bia Mudimu

DIMANYISHA: Kutuadijila ku Mudimu wetu wa Bukalenge eu, Ndongamu wa Bisangilu bia Mudimu neikale ne malu a mu Tshisangilu tshia Mudimu tshia kumpala tshia ngondo udi ulonda. Tudi bakajilule malu nunku bualu, imue misangu, Mudimu wetu wa Bukalenge udi mua kuikala ufika kunyima mu bisumbu bualu tudi mpindieu balongolole mushindu mupiamupia wa dinutumina mikanda.

Lumingu lua dia 6 Tshisua-munene

Musambu 207

Min. 10: Mamanyisha a mu tshisumbu. Mamanyisha makumbanyine a mu Mudimu wetu wa Bukalenge. Ufile luapolo lua mudimu wa budimi lua ditunga dietu ne lua tshisumbu tshienu bua Tshimungu.

Min. 15: “Tuidikijayi Yehowa pa kubenga kuikala ne kansungasunga.” Mbuelelu webe kafiki ku munite mujima to, pashishe utungunuke ne nkonko ne mandamuna. Leja tshidi kubenga kuikala ne kansungasunga kumvuija, fila bilejilu bidi bileja mudi Yehowa kayi naku, ne mushindu utudi mua kuepuka kansungasunga mu mudimu wetu.​—Tangila Étude perspicace, Vol. 1, dib. 1175, tshik. 8 too ne ku dib. 1176, tshik. 3.

Min. 20: “Tukadiku bumvue bualu ebu anyi?” Muyuki ne diyukidilangana ne bateleji. Lomba bateleji bua bumvuije mudi diambulula malu dibambuluishe bua kumvua ne kuanyisha menemene bulelela.​—Tangila Tshibumba tshia Nsentedi tshia 15 Kashipu 1995, mab. 21-22, ne tshia 15 Tshimungu 1993, mab. 13-14, bik. 10-12.

Musambu 218 ne disambila dia nkomenu.

Lumingu lua dia 13 Tshisua-munene

Musambu 168

Min. 10: Mamanyisha. Luapolo lua konte. Fila ngenyi pa mushindu wa kuandamuna ne bukalanga padibu batuela mioyo bua kutujingila mafesto malenga a bena panu. Bikala tshisumbu ne mikanda ya Muntu mutambe bunene anyi Mulongeshi munene mu stoke, leja mudibu mua kuenza nayi mudimu bimpe mu buambi mu matuku a difesto dia Nowele.

Min. 15: “Kalasa ka Mudimu wa Teokrasi bua tshidimu tshia 2000.” Muyuki kudi mutangidi wa Kalasa ka Mudimu wa Teokrasi. Konkononayi malu adibu bashintulule mu ndongamu bua tshidimu tshipiatshipia. Mudimu No. 3 neushindamene pa “Biena-bualu bua kuyikila pa Bible” bidi mu Traduction du monde nouveau. Mudimu No. 4 neutungunuke ne mamanyisha pa muntu kampanda wa mu Bible mangata mu Étude perspicace anyi Auxiliaire ne mu ngondo isatu ya ku ndekelu kua tshidimu, neushindamene pa “Biena-bualu bua kuyikila pa Bible.” Padi tshiena-bualu tshia mudimu eu tshikale ne kamanyinu aka (#) ku luseke luatshi, mbiakanyine bua muanetu wa balume awenze. Ambila bantu bonso bua batungunuke ne dibala diabu dia Bible dia ku lumingu ne bikale ne tshisumi mu dienza midimu yabu mu kalasa.

Min. 20: “Ntshinyi tshiwambila muntu udi wamba ne: Nzambi katuku to?” Mu nkonko ne mandamuna. Konkononayi malu mashilashilangane adi afikisha bantu ku dijimija ditabuja kudi Nzambi. Leja imue mishindu itudi mua kutuadija nabu diyiki bua kubambuluisha bua bamone ne: kuitaba dikalaku dia Nzambi nkuikala ne ngelelu wa meji mujalame. Enzayi dinaya dia tshilejilu dimue anyi abidi a mu tshikoso. Bua kupeta mamanyisha makuabu, tangila mukanda wa Comment raisonner, mab. 106-112, ne wa L’humanité à la recherche de Dieu, nshapita 14.

Musambu 220 ne disambila dia nkomenu.

Lumingu lua dia 20 Tshisua-munene

Musambu 219

Min. 10: Mamanyisha a mu tshisumbu. Bamanyishi balonde amue malu adibu bamone mu buambi matuku aa.

Min. 15: Mushindu wa kuandamuna ku malu atu mua kukosesha diyuki. Diyukidilangana ne bateleji ne manaya a tshilejilu. Bala “Nseka” mu mabeji 7-8 a broshire wa Mua kutuadija ne kutungunuka ne mayuki pa Bible. Sungula “bipumbishi bia diyukidilangana” bibidi anyi bisatu mu mabeji 8-13, anyi wangate bikuabu biutu utamba kumvua mu teritware wenu. Konkonona amue a ku mandamuna mafila, ne leja bua tshinyi adi mua kuikala mimpe bua muaba unudi. Enzayi manaya a tshilejilu mîpi pa amue a ku malu atu akosesha diyuki. Lomba bateleji bua bumvuije mushindu udi mandamuna aa mabambuluishe.

Min. 20: Ndiku ne bua kuitaba mudimu udi umbuejakaja ne bulongolodi kampanda bua malu a Nzambi anyi? Muyuki kudi mukulu, muashila pa Tshibumba tshia Nsentedi tshia dia 15 Tshisanga 1999 mabeji 28-30. Bamue bavua bitabe mudimu wa nunku ne pashishe kumona ne: tshivuabu benza katshivua mu diumvuangana ne mêyi a mu Bible to. Konkononayi nkonko itudi ne bua kudiela patudi tuangata dipangadika bua kuenza mudimu wa ku mubidi udi mua kutubuejakaja ne bimue bitendelelu. Kankamija bantu bonso bua kuenza malu adi kaayi mua kunyanga malanda etu mimpe ne Yehowa.​—2 Kol. 6:3, 4, 14-18.

Musambu 109 ne disambila dia nkomenu.

Lumingu lua dia 27 Tshisua-munene

Musambu 166

Min. 10: Mamanyisha a mu tshisumbu. Bikala tshisumbu tshienu ne bua kushintulula mêba a bisangilu mu tshidimu tshipiatshipia, fila mibelu mimpe bua bantu bonso batungunuke ne kulua mu bisangilu pa mêba abi mapiamapia. Manyishayi balongi ba Bible ne bantu bakuabu badi banyisha bulelela malu aa anudi bashintulule. Vuluija bamanyishi bonso bua kufila luapolo lua mudimu wa buambi bua Tshisua-munene.

Min. 15: Majinga a tshisumbu.

Min. 20: Tufilayi mikanda ne broshire ya kale mu Tshiongo. Muyuki ne manaya a tshilejilu. Leja mukanda umue anyi ibidi ya mabeji 192 mipatula kumpala kua 1986 idi mu stoke mu tshisumbu, ne ambila bamanyishi bua kuya ne mikuabu mu buambi. (Bikala nansha umue kauyi mu stoke, sungulayi mikuabu ya kufila mu Tshiongo.) Umvuija bua tshinyi mikanda ya kale eyi itshidi amu ijula bantu dijinga dia kumanya bivule pa Bible. Leja mu mukanda wonso malu manene ne bimfuanyi binudi mua kuangata bua kutuadija nabi mayuki ne bantu. Enzayi dinaya dia tshilejilu dimue anyi abidi. Leja mushindu wa kuenza mudimu ne broshire wa Spiritu ya bafue ne wa Bantemu ba Yehowa ba tshikondo tshietu etshi bikalayiku. Padi muntu uleja dijinga dia kumanya bia bungi, nudi mua kutuadija kulonga nende broshire wa Utulomba.

Musambu 224 ne disambila dia nkomenu.

Lumingu lua dia 3 Tshiongo

DIMANYISHA: Bisumbu kabiena ne bua kusemeja Tshisangilu tshia Mudimu tshia lumingu lua dia 3 Tshiongo ne kutshiteka mu lumingu lukuabu ludi kumpala to, anu bikalabu ne dikumbula dia mutangidi wa tshijengu.

Musambu 10

Min.  8: Mamanyisha a mu tshisumbu.

Min. 17: Ikala mumanye mushindu wa kuandamuna muntu. (Kolos. 4:6) Muyuki ne diyukidilangana ne bateleji. Mukanda wa Comment raisonner ntshiamu tshilenga tshidi tshibotesha njila bua kuyikila ne bantu pa bulelela. Padi muntu ujula lukonko pa amue malu atudi tuitabuja, pamu’apa tudi mua kudiambuluisha ne ngenyi idi muinshi mua katupa ka: “Si quelqu’un vous dit:” (Padi muntu wamba ne:) kadi ku ndekelu kua tshitupa tshidi tshiakula bua bualu abu. Yukidilanganayi pa malu atu bantu bamba bua Bible adi mu mabeji 57-60, ne konkononayi tshidi tshileja ne: mandamuna aa adi mua kupatula bipeta bimpe.

Min. 20: “ ‘Benji ba Dîyi dia Nzambi’: Mpungilu wa Distrike wa Bantemu ba Yehowa bua tshidimu tshia 2000.” Sekretere udi ukonkonona tshiena-bualu etshi tshia mu tshisakidila mu nkonko ne mandamuna. Tshia kumpala, bala mukanda mufunda wa mu dia 15 Tshisua-munene 1999, udi utangila diabanya dia midimu mu mpungilu. Angata mvese idibu batele bua kuleja bua tshinyi tuetu bonso tudi ne bua kutumikila menemene mushindu udi Société utuludika. Leja muntu yonso mudibi bilenga bua kudilongolola kumpala kua dîba bua kupeta matuku a diikisha ne kubuela mu mpungilu matuku onso asatu, kusangisha ne mu Ditanu. Ela bana betu kalumbandi bua mudibu batumikila mapangadika onso adi Société wangata.

Musambu 56 ne disambila dia nkomenu.