Tukadiku bumvue bualu ebu anyi?
1 Bushuwa tukadi babumvue! Yehowa udi wamba wambulula malu a bungi mu Dîyi diende bua diakalengele dia bantu bende. Yezu uvua misangu mivule wambulula malu kabukabu adi atangila Bukalenge avuaye ulongesha. Bapostolo bende bavua bambuluila pabu bantu bavua bajalame mu bulelela malu a mu nyuma.—Lomo 15:15; 2 Pet. 1:12, 13; 3:1, 2.
2 Mu tshikondo tshietu etshi bulongolodi bua Yehowa mbulongolole bua tuikale tuambulula misangu ne misangu malu a mushinga mukole mu bisangilu bietu. Kudi imue mikanda itudi balonge njila ne njila. Kadi tumanye se: bidi bikengela kuteleja malu atukadi bumvue.
3 Diambulula malu didi dikumbaja dijinga dinene: Malu adi Yehowa utuvuluija adi akolesha ngumvuilu wetu, alabaja mmuenenu wetu ne akolesha dipangadika dietu dia kushala bakole mu nyuma. (Mus. 119:129) Kukonkonona tshiakabidi mêyi ne mikandu bia Nzambi kudi bu kuditangila mu lumuenu. Kudi kutuambuluisha bua kudikonkonona tuetu bine ne kuepuka bua kuikala ‘bumvu badi bapua muoyo.’—Yak. 1:22-25.
4 Bituikala katuyi ne tshibidilu tshia kuela meji bua kuvuluka malu a mu Bible, mutshima wetu neulue kunanga makuabu malu. Malu adi Nzambi utuvuluija adi atuambuluisha bua kukandamena bukua-panu bua Satana. (Mus. 119:2, 3, 99, 133; Filip. 3:1) Malu adibu batuvuluija pa tshibidilu adi aleja dikumbana dia malongolola a Nzambi adi atusaka bua ‘tuikale batabale.’ (Mâko 13:32-37, Mukanda wa Mvidi Mukulu) Diambulula malelela a mu Mifundu didi dituambuluisha bua kushala mu njila udi ufikisha ku muoyo wa kashidi.—Mus. 119:144.
5 Mmunyi mudibi mua kutukuatshisha tuetu bine: Tudi ne bua ‘kuinyika mitshima yetu bua kulondayi [mavuluija, NW] a Nzambi.’ (Mus. 119:36) Padibu balongolole mu tshisangilu tshia tshisumbu bua kukonkonona tshiena-bualu tshitudi bamanye bimpe, tudi ne bua kudianjila kudilongolola, kubala mvese mifilamu ne kuela meji pa mushindu utudi mua kutumikila malu aa. Katuikadi ne tshibidilu tshia kubenga kudilongolola bua diambulula difunda dia mu Kalasa ka Mudimu wa Teokrasi, tuela meji ne: kabiena ne mushinga. (Luka 8:18) Katudibueji mu ditanaji mu bisangilu bietu anu bualu badi bamba bambululamu malelela a nshindamenu nansha.—Eb. 5:11.
6 Mbimpe tuetu kuidikija mufundi wa Misambu; wakamba ne: ‘Ndi ne disanka mu dilonda dia [mavuluija, NW] ebe, bu mundi nsanka mu bubanji buonso.’ (Mus. 119:14) Eyowa, tukadi bumvue malu a mushinga aa, ne netuumvue kabidi. Bua tshinyi? Bualu Yehowa mmumanye ne: bidi bikengela tuumvue kabidi!