Kalasa ka Mudimu wa Teokrasi bua tshidimu tshia 2000
1 Kalasa ka Mudimu wa Teokrasi ndibenesha dinene bua bantu ba Yehowa. Nkambuluishe bantu miliyo ya bungi bua kulua bangamba-malu ba patoke bapiluke ne balongeshi ba Bible kukadi bidimu bipite pa 50. (Mus. 145:10-12; Mat. 28:19, 20) Udiku mua kuela meji mudi kalasa aka kakuambuluishe wewe anyi? Kadi mua kutungunuka ne kukuambuluisha mu tshidimu tshia 2000 biwadifilamu bikole ne kutumikila mibelu idibu bafilamu.
2 Mamanyisha adi atangila midimu ya kuenza mu kalasa aka ne mikanda ya kudikuatshisha nayi mbifunda pa dibeji dia kumpala dia ndongamu wa kalasa bua tshidimu tshia 2000. Mbalejemu dîba dikosela tshitupa tshionso, mikanda ya kuangatshila malu, mushindu udi muntu ne bua kuenza mudimu wende ne malu makuabu. Tudi tukulomba bua ubale mamanyisha aa ne ntema ne uatumikile.
3 Dibala dia Bible dia ku lumingu luonso: Kudi ndongamu ibidi mitapuluke ya dibala dia Bible dia ku lumingu luonso mileja mu ndongamu wa kalasa aka. Kudi ndongamu wa pa tshibidilu wa dibala didi diangata mabeji a mu Bible matue ku atanu. Tshitupa tshia malu manene a mu dibala dia Bible ntshiashila pa dibala edi. Ndongamu mukuabu wa dibala ng’eu udibu basakidile, ne malu a dibalamu mmapite a mu ndongamu wa pa tshibidilu ku bungi misangu ibidi. Wewe mulonde ndongamu eu, neufike ku dibala Bible mujima munkatshi mua bidimu bisatu. Kakuena bualu nansha bumue bubi bikala bamue mua kujinga bua kubala tshitupa tshinene kupita tshidi tshifunda mu ndongamu musakidila eu, padi eku bakuabu kabayi mua kukokesha bua kumulonda mushindu udibu bafunde to. Pamutu pa kudifuanyikija ne bakuabu, tshidi ne bualu nkusanka bua tshiudi mua kuenza. (Gal. 6:4) Kubala Dîyi dia Nzambi dituku dionso ke bualu budi ne mushinga.—Mus. 1:1-3.
4 Bua kudifundisha mu Kalasa ka Mudimu wa Teokrasi, mbimpe uyikile ne mutangidi wa kalasa. Suaku bua wikale wangata midimu yebe ne mushinga, ne kuikadi upumbisha tshianana tshianana bua kuyenza to. Angata kalasa aka bu ndongoluelu wa mushinga mukole wa kudi Yehowa. Wikale udilongolola bimpe, udibidije bikole ne midimu idibu bakupeshe, ne wakule ne muoyo mujima, nunku neupete dikuatshisha dia bungi menemene mu kalasa aka ka pa buaku.