Kalasa ka Mudimu wa Teokrasi bua tshidimu tshia 2001
1 Kudi mvese ya bungi ya mu Bible idi ileja tshitudi ne bua kudifidila bikole mu Kalasa ka Mudimu wa Teokrasi.—Nsu. 15:23; Mat. 28:19, 20; Bien. 15:32; 1 Tim. 4:12, 13; 2 Tim. 2:2; 1 Pet. 3:15.
2 Kukadi matuku a bungi adi programe wa dibala dia Bible dia ku lumingu muikale mu kalasa aka. Programe eu mmuenza bua kubala dibeji bu dimue dia Bible dituku dionso. Kubangila tshidimu etshi, nekuikale kabidi dibala dia Bible lumingu luonso lutuikala tuenza diambulula difunda. Programe utuvua basakidile wa dibala dia Bible mu bidimu bisatu biapitshi ebi ukadi mujike. Kadi biwajinga kubala bia bungi mu Bible kupitshisha too ne mudibu baleje mu programe, udi mua kudienzela webe nkayebe.
3 Mudimu No. 2 udi wambuluisha bana betu ba balume bua badibidije ku ‘dibala dia kumpala kua bantu’ dia Dîyi dia Nzambi. (1 Tim. 4:13, MML) Paudi ne mudimu wa dibala, anji kudibadila tshia pa nkayebe ne dîyi dikole misangu ne misangu. Udi mua kuteleja bande ya Société idi ne mikanda ya mu Bible bua wewe kumona mua kulengeja nshindumuinu webe wa miaku, kumanya mua kushintulula dîyi ne malu makuabu adi atangila dibala dilenga.
4 Mudimu No. 3 ne No. 4 malu ayi nga kuangatshila mu mukanda wa Comment raisonner, udibu bapatule bua kuikala kuya nawu mu buambi. Bikala mudimu udibu bakupeshe muikale ne malu a bungi audi kuyi mua kujikija mu dîba dikukosela, sungula anu malu adi makumbanyine tshisumbu tshienu. Enza mudimu eu bilondeshile mushindu udi muakanyine bantu ba muaba unudi.
5 Enza muebe muonso bua kuenza midimu yebe yonso mu kalasa aka. Udilongolole bimpe, wakule ne mutshima webe onso. Neukankamije tshisumbu ne nebikuambuluishe wewe muine paudi wenza ne muoyo webe mujima bionso bidi bikengela kuenza mu Kalasa ka Mudimu wa Teokrasi mu tshidimu tshia 2001.