Bantu bakuabu ne mudimu webe wa kuyisha
1 Bantu bakuabu badi ne bukole bua kukusaka ku malu mimpe ta mabi. Basadidi ba Yehowa buobu badi batusaka ku midimu mimpe ya buena-Kristo. (Eb. 10:24) Kadi, bena mu dîku, bena mudimu netu, balongi netu, bena mutumba peshi bantu bakuabu bamanyangana nabu badi kabayi Bantemu badi mua kutusaka bua kulonda njila idi ibengangana ne mêyi a buena-Kristo. Badi mua kuikala ‘batupenda bua nsombelu wetu muimpe bu balondi ba Kristo.’ (1 Pet. 3:16, Muanda Mulenga Lelu) Kadi ntshinyi tshitudi mua kuenza bua kutungunuka ne kuyisha mutudi bapangadike emu nansha patudi kumpala kua bantu badi batusaka ku malu mabi?
2 Bena mu dîku: Imue misangu, tatu wa dîku udi kayi Ntemu wa Yehowa udi mua kuikala kayi musue bua mukajende anyi bana bikala bapatuka mu buambi. Ke tshiakenzeka mu dîku dikuabu mu ditunga dia Mexique. Mukaji wa muntu mukuabu ne bana bende muanda-mutekete bakalonga bulelela. Ku ntuadijilu muntu awu kavua musue bua bena mu dîku diende bikale bapatuka mu buambi ne bapesha bantu mikanda ya kulonga nayi malu a mu Bible ku nzubu ne ku nzubu to. Uvua umona ne: mudimu eu uvua ubapuekeshisha milongo. Kadi mukajende ne bana bakasuminyina, kushala bapangadike bua kusadila Yehowa ne kupatuka pa tshibidilu mu buambi. Kunyima kua matuku, tatu awu wakabanga kumona bua tshinyi bidi bikengela kuitaba mudimu wa buambi udi Nzambi mulongolole, ke kudilambulaye pende kudi Yehowa. Wakenza bidimu 15 bua kushisha kuitaba bulelela. Tuanji kuamba, bu bena mu dîku diende kabayi basuminyine, tatu eu uvuaku mua kufika ku didilambula kudi Yehowa anyi?—Luka 1:74; 1 Kol. 7:16.
3 Bena mudimu nebe: Paudi uditatshisha bua kuyisha bena mudimu nebe, bamue ba kudibu kabena pamu’apa mua kuanyisha to. Tshilejilu, muanetu mukuabu wa bakaji udi ulonda ne: pakajuka dimue dituku tshilumbu tshia nshikidilu wa bukua-panu ku mudimu, bakamuseka kudi bakuende bualu wakabalomba bua kubalabu Matayo nshapita wa 24. Pabi, matuku makese kunyima, muena mudimu nende mukuabu wakalua kumuambila ne: uvua mubale nshapita awu ne uvua mukeme bikole. Muanetu eu wakamupesha mukanda wetu mukuabu ne kumvuanganabu bua kutuadija kulonga nende Bible pamue ne bayende kabidi. Dilonga dia kumpala diakaya too ne ku dîba ibidi wa butuku. Panyima pa dilonga musangu muisatu, e kutuadijabu kubuela mu bisangilu, ne matuku makese pashishe bakalekela dinua dia makanya, kubangabu kupatuka mu buambi. Bualu ebu buvuaku mua kuenzeka bu bikala muanetu eu kayi muenze bukole nansha bua kana bua kumanyisha bakuende malu adiye mulonge mu Bible anyi?
4 Balongi nebe: Pa tshibidilu Bantemu batshidi bansonga batu mu tulasa tumue ne balongi ba bikadilu bibi, bibafikisha too ne ku diumvua bundu ne ditshina bua bansonga bakuabu kabalu kubapepeja bua mudimu wa buambi utubu benza. Nsongakaji mukuabu wa bidimu dikumi ne bia mu njila mu ditunga dia États-Unis wakamba ne: “Mvua ngumvua bundu bua kuyisha bansonga bakuabu bualu mvua ntshina bua kabalu kunseka.” Nunku kavua uyisha bansonga nende ni mmu kalasa ni mmuaba uvuaye to. Mmunyi muudi mua kupeta bukole anyi dikima dia kubenga malu mabi a bakuebe? Eyemena Yehowa, keba bua akuanyishe. (Nsu. 29:25) Ikala ne disanka bua muudi mumanye kuyisha Dîyi dia Nzambi. (2 Tim. 2:15) Nsongakaji utudi batele kuulu eku wakatuadija kusambila Yehowa, umulomba bua amuambuluishe apete dikima dia kuyisha balongi nende. Wakabanga kuenza buambi bua mu mpukapuka mu kalasa, kupatulaye bipeta bimpe, ne kutuadijaye kuyisha bantu bonso bavuaye mumanye. Wakamba ne: “Bansonga badi bajinga ne batekemena bua kupeta malu malenga mu matuku adi kumpala eku; Yehowa udi ukuata netu mudimu bua kubambuluisha.”
5 Bena mutumba: Tudi mua kuikala ne bena mutumba peshi bantu bakuabu batudi bamanyangane nabu badi batufiikila munda bua tshitudi, ne bua malu a mu Bible atudi tulongesha. Biwikala utshina bua malu adi mu meji abu, dikonka ne: ‘Mbamanye bulelela budi bufikisha ku muoyo wa kashidi anyi? Ndi mua kuenza tshinyi bua kubalenga ku mitshima?’ Mutangidi wa tshijengu mukuabu wakamba ne: muntu udi ufika ku bipeta bimpe padiye wambila bena mutumba badiye uyisha tu-malu ku kakese ku kakese. Sengelela Yehowa bua akupeshe bukole buudi nabu dijinga ne meji bua utungunuke ne kukeba bantu badi mua kukuteleja.—Filip. 4:13.
6 Tuetu badilekelele mu buteyi bua binetu badi batusaka ku malu mabi, baluishi betu badi mua kusanka. Mpindieu bu tuetu mua kuenza tshidibu bajinga, nebikale bua diakalenga diabu peshi dietu? Bakaluisha Yezu bavua anu bantu ba mu tshisamba tshiabu. Kakamona bu bualu mêyi mashile avua bana ba tatuende mudishi bamuamba. Kadi uvua anu mumanye ne: uvua mua kubambuluisha pa kushala ne lulamatu mu njila uvua Nzambi musue ne: alonde. Nanku, Yezu ‘wakakankamana mu ditontolola dia nunku dia bantu babi [pabi bikale bua disanka diabu, NW].’ (Eb. 12:2, 3) Ke tshitudi petu ne bua kuenza. Ikala mupangadije bua kuenza muebe muonso bua kuyisha mukenji wa Bukalenge. Nanku, ‘neudisungile wewe ne buobu kabidi badi bumvua mêyi ebe.’—1 Tim. 4:16.