Tujingululayi diumvuija dia dîyi didi ditangila Bukalenge

¹ Mu lusumuinu lua mumiaminyi, Yezu wakumvuija ne: mamiinu adi mamate pa “buloba buimpe” adi afunkuna “eu udi umvua dîyi dia Nzambi ne udijingulula.” (Mat. 13:23) Kunyima kua tuetu bamane kuteleja lumu lua Bukalenge, tudiku ‘bajingulule diumvuija’ dialu anyi? Bidi bulelela ne buenzeji kayi pa nsombelu wetu? Tudiku bashile bipatshila bia Bukalenge muaba wa kumpala, bua kuleja ne: tudi bajingulule diumvuija dia mukenji anyi?

² Didilongela dia pa nkayetu didi ne diambuluisha bua kupeta lumvu luimpe lua mukenji wa Bukalenge. Tudi ne bua kulama dîba dia kueleela meji pa biakudia bia mu nyuma bitudi tupeta. Tuetu tubala lubilu lubilu Tshibumba tshia Nsentedi, netuikale bu badi bamina lukasa lukasa biakudia bia muenya ne bidi bidiisha mubidi. Tutuku tudilamina tshikondo kampanda bua kulabula pa kumvua muenya wa biakudia bia mu nyuma anyi? Bua kupatula tshipeta tshitambe buimpe, tudi ne bua kuikala ne kenzela ne kuikala ne nzala mikole ya mu nyuma. Pikalabi kabiyi nanku, midimu mikuabu idi mua kutukepeshila masanka a didilongela dia pa nkayetu ne kutupangisha dîba ditudi tukengela bua kulonga. Ki mbipepele bua kulonda programe muimpe wa dilonga nansha. Bulelela, tudi ne bua kutabalela ne ntema yonso buakananganyi bua midimu yetu idi pa muaba wa kumpala, kadi biuma bia mu nyuma bitudi mua kupeta kabiena kutua mushinga.—Nsum. 3:13-18; kolos. 1:27.

³ Dikonkonona dia Mifundu matuku wonso nedimeneshe mu mitshima yetu ngenyi ya dimona nseke mimpe ya malu ne mibaki pa bidi bitangila Bukalenge. Aba badi “bamanye bidibu bakengela mu nyuma” badi badilongolola bua kudifila mu minute mikese ku dikonkonona dia Mifundu ne mumvuija ayi matuku wonso. (Mat. 5:3) Kudi mifundu ya bungi idi yakula bua Bukalenge mu mishindu mishilangane. Tshilejilu, mvese wa mu dia 22 Kasuabanga 1994 uvua muangatshila mu Matayo 13:4. Diumvuija diende divua diakula bua ditekemena dia Bukalenge ne divuluija njiwu kampanda idi mua kutumuenekela mu ditantshila dibi dia bena mutumba anyi bena mu dîku dietu. Mu Betele yonso dikonkonona dia mifundu didi dienzeka matuku wonso a mudimu mu dinda mu minute 15. Ndongoluelu eu udi wela kashonyi pa mushinga wa kukonkonona mvese buonso pamue ne masanka atudi mua kupeta bituikala tuenza nenku. Dîku diebe dituku dilongolole dikonkonona dia mushindu’eu dituku dionso anyi?

⁴ Padi dianyisha dietu bua Bukalenge dienda divula, tudi tudiumvua basakibue bua kumanyisha bantu netu mukenji udi ubutangila. Tshibumba tshia Nsentedi ne Réveillez-vous! bidi bitupetesha tshitudi mua kubikila ne: kasolonyi ka mu lungenyi ne bidi bidiisha mitshima yetu ne mamanyisha makanyine mapiamapia. Ku diambuluisha dia bibejibeji ebi tudi amu bajadike se: bukua-bantu budi bukengela Bukalenge bua Nzambi. Bidi bituambuluisha bua kuikala bantu bashindame mu nyuma badi ne “lungenyi lua kristo.” (1 Kol. 2:15, 16) Nenku, tudi mua kukolesha ditabuja dietu ne kuvudija disuminyina dietu bua kumanyisha ditekemena dia Bukalenge.—1 Petelo 3:15.

⁵ Bidi bikengela bua tujingulule diumvuija dijima dia mukenji wa Bukalenge. Bukalenge ke tshiamu tshiashindamija natshi Nzambi bumfumu buende budikadile, kujikija malu mabi ne kuasa bulongolodi bupiabupia, mparadizu. Yezu wakatulomba bua kuteka Bukalenge pa muaba wa kumpala mu nsombelu wetu. Bituikala basue kuikala ne muoyo muinshi mua bukokeshi buende, tudi ne bua kuikala bakokedi bafuanangane ne mikoko. (Mat. 6:10, 33) Tubabidilayi mushindu mutupesha wa kulabula masanka adi Bukalenge bumuangalaja!