Badi balomba bia bungi kudi aba badi bapeshibue bia bungi
1 Mmuabipu kayi wa kumanya bulelela! Bamane kudilambula kudi Yehowa, tudi ‘batekibue lumu luimpe mu bianza.’ (1 Tes. 2:4) Abi bidi bitupesha bujitu bunene. Yezu mmuambe ne: ‘Udi mupeshibue bia bungi nebamulombe bia bungi.’—Luka 12:48b.
2 Mmushindu kayipu udi mêyi aa malelela! Buonso tudi tubabidila dimanya dia Dîyi dia Nzambi, ditantshilangana dilenga dia bana betu ne ditekemena dia dikema; tudi bushuwa mua kuamba nenku ne: tudi bapeshibue bia bungi. Bidi biakanyine bua kutulombabu bia bungi ku luetu luseke.
3 Lamayi mmuenenu muimpe pa majitu enu: Bamue badi bela meji se: badi balombibue bipitshidile. Yezu Kristo, Mfumu wa tshisumbu tshia bena nkristo, udi ujadika “tshidi tshikengedibue” bua tshisumbu kutumika tshishiki. (Ef. 4:15, 16) Udi utushindikila ne: ‘mutshi wende wa tshikokedi udi mutekete ne bujitu buende budi bupepele.’ (Mat. 11:28-30) Mu dinanga diende, udi udileja muena luse kudi aba badi ne makokeshi mashadile. (Luka 21:1-4) Bituadifila muetu muonso, kabiyi kutangila tshidikijilu, netubeneshibue.—Kolos.3:23, 24.
4 Diebejayi ne: ‘Ntu ntekaku Bukalenge pa muaba wa kumpala mu nsombelu wanyi anyi? Ntuku ntumika ne dîba kabidi ne bintu bidi bu bianyi bua kutumbisha dîna dia Nzambi ne bua disanka dia bakuabu anyi? Dianyi disanka ditambe bunene ndia kusadila Yehowa anyi peshi ndia kusankila ne budisu-nkaya mu bintu bia ku mubidi?’ Pa kuandamuna ne muoyo umue ku nkonko eyi, netusokolole tshidi ngenyi ya mu mutshima wetu.—Luka 6:45.
5 Imanshayi ditetshibua dia kuenza bubi: Katshia kakutu kuanji kumueneka matetshibua ne disonsodibua dia kumuenesha budisu-nkaya, ne lukuka, ne bunangi bua masanka a mubidi. Dituku dionso, nsombelu wetu wa tshitembu udi ubuejibua mu diteta, ne tudi mua kusakibua ku ditupa ku dîyi. Bua kutshimuna ntatu eyi, tudi ne bua kulomba Yehowa bua kutuambuluishaye. (Mat. 26:41) Ku diambuluisha dia spiritu wende udi mua kutukolesha. (Yesh. 40:29) Dibala dia Bible matuku wonso didi ne diambuluisha dinene. (Mus. 1:2, 3) Didilanga ne didikanda bidi pabi ne mudimu wa mushinga.—1 Kol. 9:27.
6 Ki mbikumbane amu kunanga malu mimpe to, tudi kabidi ne bua kukina bubi. (Mus. 97:10) Mbuena kuamba ne: ki mbimpe kudima dijinga dia malu mabi nansha. Nsumuinu 6:16-19 udi ubadika malu muanda-mutekete adi Yehowa ukina. Bidi bia bushuwa se: eu udi musue kusankisha Yehowa udi pende ne bua kukina malu aa. Bu mutudi ne muabi wa kuikala ne dimanya dijalame dia bulelela, dijinga dietu didi ne bua kuikala dia kuenza malu mu diumvuangana ne dimanya edi, mu dilama ngenyi yetu mimanyine pa malu mimpe.
7 Bidi bimpe kusambila bua ne: nsombelu wetu atushile mpunga bua “tuikale anu ne bivule bia kuenza mu mudimu wa Mukalenge.” (1 Kol. 15:58, NW) Ba bungi badi bamone se: programe muule ntente ne bia kuenza mu mudimu wa Yehowa udi bukubi, bualu udi ushiya dîba dikese bua kuenza malu adi mapange dikuatshisha.
8 Mu kumona kuimpe, bidi Yehowa utulomba mbia meji matshintshikila menemene. (Mika 6:8) Tudi ne tubingila tuonso tua kuleja dianyisha bua disanka dionso dia mudimu. (Ef. 5:20) Nunku tudi tutungunuka ne ‘kuenza mudimu mukole ne kuluila,’ batekemena se: difutu dietu nedipite kule bionso bidi bitulomba.—1 Tim. 4:10.