Kabena badikanda bua kufila bumanyishi

¹ Dîna dietu, Bantemu ba Yehowa, didi ditufunkuna ne disokolola tshitudi tuenza. Tudi tuenza mudimu wa dimanyisha ngikadilu milenga ya Nzambi wetu, Yehowa. (Yesh. 43:10, 12) Muntu yonso udi ne bua kufila bumanyishi ebu bikalaye musue kulua muena mu tshisumbu. Bumanyishi budi buenzeka bangabanga mu mudimu wetu wa patoke udi ukongoloja mudimu wa ku nzubu ne ku nzubu, bumanyishi mu misesu, makumbula mapiamapia ne malonga a Bible. Tudi buonso bakankamijibue pa nanku bua kuvudija didifila dietu mu mudimu wa buambi.—1 Kol. 15:58.

² Pabi, bamue bena mu tshisumbu badi ne mishindu mishikile. Disama anyi bulema bukole bidi mua kubabamba bua kushalabu ku mabu. Buluishi mu dîku budi pamu’apa buikale tshipumbishi tshinene. Nsonga muena nkristo udi mua kukandikibua kudi muledi ukena muena kuitabuja. Aba badi ku mpenge kule kudi kakuyi kuendela mashinyi badi mua kudiumvua batshintshimikibue. Bua bukata, bamue badi mua kushinshila anyi kuelakana bua kufila bumanyishi. Bamanyishi badi mu nsombelu eyi anyi mu mikuabu ya buena eyi kabena pamu’apa badiumvua bakumbane bua mudimu eu, bualu badi benza bishadile ku bia bakuabu ne mu mushindu wonso bishadile ku tshidibu bananga bushuwa bua kuenza. Kabena ne kabingila nansha kamue ka kupepeja madikolela abu. (Gal. 6:4) Nebapete dikoleshibua ku muoyo pa kumanya se: Yehowa udi usanka padibu benza muabu muonso mu nsombelu kayi yonso udibu basanganyibua.—Luka 21:1-4.

³ Kebayi mushindu wa kudifilamu: Mbalonde binunu bia mianda idi ileja ne: bantu bavua mu nsombelu mikole kabakalekela bipumbishi kubapangisha bua kufila bumanyishi nansha. Pa kudianjila kuela tshiidia, bakatshinka mishindu mipite bungi ya difila bumanyishi bua mu mpukapuka. Aba badi bapangadije kushala ku mabu bakatumika ne telefone bua kunzulula tshiibi tshia difila bumanyishi. Badi bamone mubakumbudi yonso bu muteleji udibo mua kuyukila nende. Nansha bikala mukaji muena dîku dia buluishi kayi mua kufila bumanyishi kuende, udi mua kubabidila dîba didiye wakula ne bena mutumba anyi ne bantu bakuabu badiye upetangana nabo dîba dia midimu yende ya dituku dionso.

⁴ Nsonga muena nkristo udi mua kudimona mukandikibue bua kufila bumanyishi bua patoke kudi muledi ukêna ditabuja. Pamutu pa kubimona bu njikilu kayiyi bupitshi, udi mua kuvuija balunda bende ne balongeshi bende “teritware” wende nkayende, ufila bumanyishi buimpe ne pamu’apa ulombola malonga a Bible. Bavule ba ku badi basombele mu misoko ya ku mpenge kule mbafike ku difila bumanyishi ku diambuluisha dia mikanda mifundilangana. Aba badi basakibue ne mitalu ya buena nkristo nebapete amu mushindu wa kupanga kuikala “kabayi ne tshidibu benza anyi baatuke bilondeshile dimanya dijalame dia Mukalenge wetu Yezu Kristo.”—2 Petelo 1:8 NW.

⁵ Pa bidi bitangila didifila dietu mu mudimu wa bumanyishi, Yehowa udi utupa buonso njila wa kulonda, eu wa kukumbaja mudimu ‘ne anyima wetu mujima.’ (Kolos. 3:23) Dîba ditudi tudifilamu ne bitudi tukumbaja mene bidi bishilangane, kadi kenzela ka nshindamenu kadi ka muomumue: dinanga dijalame didi difuma mu “mutshima musangisha.” (1 Kul. 28:9; 1 Kol. 16:14) Bituenza muetu muonso, katuakuikala ne kabingila nansha kamue ka kuela meji ne: tudi tuenza bikese, tudi bapange ditabuja anyi tudi bantu ba tshianana mu tshisumbu. Pa kulonda Paulo, tudi mua kuamba ne muoyo umue se: katuena ‘badikanda bua kuamba malu wonso akamanya mua kukuatshisha ne bua kuyisha padi bantu bunguile.’—Bienzedi 20:20.