Mua kuyisha bimpe miaba itu bantu ba bungi
1. Bua kulonda tshilejilu tshia bena Kristo ba mu bidimu lukama bia kumpala, mmunyi mudi bena Kristo ba lelu bayisha miaba idi bantu ba bungi, ne mbapatule bipeta kayi?
1 Bena Kristo ba lelu badi benza muabu muonso bua kuyisha lumu luimpe miaba yonso idi bantu anu muvua bayidi ba Yezu ba kumpala benza. (Bien. 16:13; 17:17; 20:20, 21) Ke bualu kayi diyisha diabu miaba idi bantu ba bungi ndibambuluishe bua kupeta bantu badi banyisha bulelela bavuabu kabayi mua kupeta ku mabu dîba ditubu bayisha ku nzubu ne ku nzubu.
2. Bua tshinyi bidi bikengela kuikala ne busunguluji patudi tuyisha miaba idi bantu ba bungi, ne tshia kuenza ntshinyi bua malu kuenzekawu mu bulongame?
2 Bidi bikengela kuikala ne busunguluji dîba ditudi tuyisha miaba idi bantu ba bungi. Pa tshibidilu, mbimpe kuyisha ne budimu. Tshilejilu, bamanyishi bavule bobu bikale bayisha muaba umue anyi bayishila anu miaba ya muomumue idi bantu basumbishila bintu, bidi mua kutonda bamue bantu. Bidi mua kunyangila mudimu wetu lumu ne kutupangisha mua kupatula bipeta bimpe. Tshia kuenza ntshinyi bua kubenga kuyisha mushindu eu? Bimue bisumbu bitu ne miaba ya kuyishila itu bantu ba bungi basanganyibua nunku mbikosoluele bamanyishi miaba eyi mu bitupa mu bitupa. (1 Kol. 14:40) Kabidi tudi mua kuenza malu mu bulongame tuetu bikale anu tuyisha mu teritware wa tshietu tshisumbu. Tudi mua kuyisha mu teritware wa tshisumbu tshikuabu anu padi Komite wa Mudimu wa Tshisumbu tshietu mutuanyishile bua kuambuluisha tshinga tshisumbu.—Tangila Mudimu wetu wa Bukalenge wa Kasuabanga 1998, dib. 6, tshik. 18-19.
3. Mmushindu kayi wa kutuadija kuyukila ne bantu udi bamue bamanyishi bamone muimpe padibu bayisha muaba udi bantu ba bungi?
3 Tuyukilayi ne bantu: Dîba diakayukila Yezu ne mukaji kampanda ku tshina tshia mâyi, wakatuadija ne ka-bualu kampanda ne ku kakese ku kakese wenda ulepesha muyuki wabu eu pakamonaye ne: malu avuaye wamba avua asankisha mukaji au. (Yone 4:7-26) Mu imue nsombelu lelu, diyuki dia nunku ditu dimpe. Bamue bamanyishi mbafike ku dimona ne: bua kuyisha bimpe muaba udi bantu ba bungi, mbimpe kuanji kubela muoyo ne kumanya mudibu babike kabiyi bia mulunguluku kumpala kua kubambila mukenji wa Bukalenge. Bamanyishi aba batu batuadija ne malu a muaba udibu atu misangu ya bungi ababueja mu diyuki ne bantu. Badi bashala ne ntema ya bungi padi bakuabu bakula. Mutantshi mukese badi batuadija kubambila malu adi akolesha ku muoyo a mu Dîyi dia Nzambi.—Lomo 15:4.
4. Mmunyi mutudi mua kukolesha dijinga dia muntu dia kumanya malu a bungi?
4 Tukoleshayi dijinga diabu dia kumanya bia bungi: Dîba dionso ditudi tufika ku diyukila bimpe ne muntu, tumvuanganayi nende bua kumupinganyina bua kukolesha dijinga diende dia kumanya bia bungi. Mmunyi mutudi mua kufika ku dienza nunku? Bangabanga ne nuenu kukosa muyuki wenu, mbimpe upatule karne kebe ne wambe ne: “Ndi muanyishe bikole muyuki wetu eu. Kadi kudiku mushindu wa tuetu kulua kutungunuka musangu mukuabu anyi?” Peshi udi mua kuamba ne: “Ndi musue bua ubale pebe tshiena-bualu etshi tshikala mua kukusankisha bikole. Udiku musue bua nkutuadile natshi kuebe anyi muaba webe wa mudimu anyi?” Bamue bamanyishi batu bebeja patupu ne: “Meme musue kukubikila ndi mua kukubikila mu nimero kayi?” Pa tshibidilu bitu bifikisha bantu ku ditaba anyi ku difila nimero yabu ya telefone.
5. Tudi ne bua kuikala ne tshipatshila kayi patudi tuyisha miaba itu bantu ba bungi?
5 Bantu bavule bavuabu bayishe kumpala miaba itu bantu ba bungi bakitaba bua kulonga Bible. Malonga a nunku adi mua kuenzekela ku nzubu kua muntu, muaba wende wa mudimu, muaba kampanda udi muakanyine anyi mene ku telefone. Tuikalayi ne tshipatshila tshia kutuadija malonga a Bible patudi tuyisha bimpe miaba itu bantu ba bungi.