Tumanyishayi Lumu Luimpe Mu Miaba Yonso

¹ Bena nkristo ba kumpala bakamanyisha lumu luimpe mu miaba yonso. Lukunukunu luabu luakenza ne: bidimu 30 panyima pa dibiishibua dia Yezu, mukenji wa Bukalenge wikale mumanyishibue “mu bifukibua bionso muinshi mua diulu.”​—⁠Kolos. 1:⁠23, NW.

² Lelu’eu, basadidi ba Yehowa ba mitalu mbatungunuke ne tshipatshila tshia muomumue: kumanyisha lumu luimpe lua Bukalenge kudi bantu bavule batambe. Ntshinyi tshidi mua kutuambuluisha bua kukumbaja tshipatshila etshi? Bantu bavule batu benza mudimu dituku dijima ne misangu mivule katutu tubasangana ku nzubu yabu patudi tupita bua kubatangila. Padibu kabayi ku mudimu badi bapatuka, baya mu malu makuabu peshi badiolola. Mmunyi mutudi mua kumanyisha mukenji wa Bukalenge kudi aba badi bawakanyine?​—⁠Mat. 10:⁠11.

³ Bamue badi mua kupetela lumu luimpe ku miaba yabu ya mudimu. Nansha mu bimenga bikese, mutu miaba ya midimu mudi bantu bavule bapitshishila tshitupa tshinene tshia dituku diabu. Mu bimenga binene, bantu batu benza mudimu mu miaba idi biapu anyi mu nzubu minene ya biro, pamue ne aba batu basombele mu nzubu minene milama bikole, bavule batu bapeta bumanyishi bua musangu wa kumpala. Ku ndekelu kua lumingu, munkatshi mua aba batudi tupeta mu dijikija lutetuku mu lupangu lua nyama, mu miaba ya manaya, mu mitàndà, peshi kabidi munkatshi mua aba badi bindile ku tshimanyikilu tshia mashinyi anyi mu muaba munene wa disumbishila bintu, bamue batu bakidila bimpe lumu luimpe.

⁴ Bamanyishi bavule ba lumu luimpe badi benza madikolela a pa buawu bua kufila bumanyishi mu miaba ya patoke, idi bantu basanganyibua. Bangabanga, Bantemu aba bavua belakana ne ku misangu batshina, bikale ne tshibidilu tshia kuyisha mu mushindu mulongolola, tshilejilu ku nzubu ne ku nzubu. Mmunyi mudibu bakuata mudimu lelu’eu?

⁵ “Mudimu wanyi wakafululuka!” ke muakamba muanetu wa balume mumonamone mianda. Mukuabu wakasakidila ne: “Ebi bidi bingambuluisha bua kushala mutume meji ku mudimu.” Mpanda-njila kampanda mukulakaje wakamba ne: “Abi biakankolesha mu lungenyi, ku mubidi ne mu nyuma, . . . ne ndi ntungunuka ne kulubuluka!” Mumanyishi kampanda mmumone se: utu utuilangana ne bantu bavule batu kabayi banji kuakulangana ne Bantemu ba Yehowa nansha. Umue wa kudibu udi wamba ne: “Mbimpe bitambe bualu tudi tufika ku diakula ne bantu bavule.” Mukuabu ne: “Tshitu muanji kufila mikanda bungi nunku nansha!” Mandamuna mapeta mu teritware mutumikatumika.

Batangidi bena ngendu mu mulongo wa kumpala: Mumanye ne: “malu a mu bulongolodi ebu adi enda ashintuluka,” Société mmulombe batangidi bena ngendu matuku mashale aa bua kushintulula programe wabu wa buambi wa ku lumingu bua kumona mua kufila bumanyishi bua lumu luimpe lua Bukalenge kudi bantu bavule menemene. (1 Kol. 7:31, NW) Kukadi bidimu bivule, batangidi ba tshijengu batu bateke mêba abu a dinda bua buambi bua ku nzubu ne ku nzubu ne mêba abu a mu mapingaja bua makumbulula ne malonga a Bible. Kudi mushindu wa programe eu kuikalaye anu ne mushinga mu imue rejon. Mu mikuabu, kakuena bua nsongo budibu benza mu diyisha dia ku nzubu ne ku nzubu mu amue mêba a dinda. Pikalabi nanku, mutangidi muena ngendu neamone pamue apa bimpe bua kufila mêba a dinda ku mudimu wa ku magazin ne ku magazin anyi ku buambi bua mu misesu. Udi kabidi mua kuangata mapangadika bua tusumbu tukese kufilatu bumanyishi mu nzubu minene ya biro, bijengu bia bungenda, bimanyinyi bia mashinyi anyi mu miaba mikuabu ya patoke. Bikala bamanyishi mua kutumika bimpe ne dîba didibu bapitshisha mu buambi, bantu bavule nebikale mua kulengibua.

⁷ Luapolo idi ileja ne: mashintuluka aa avua makidila bimpe bitambe kudi batangidi bena ngendu pamue ne kudi bamanyishi. Tusumbu tua bakulu tuakalomba mutangidi wa tshijengu kampanda bua kulongesha bamue bamanyishi mishindu ya mudimu idi ikengedibua kutumika nayi bilondeshile nsombelu wa muaba udibu. Bidi bia mushinga bua bamanyishi aba kushindikijabu mutangidi muena ngendu mu midimu ya mushindu eu. Pashishe, badi mua kulongesha pabu bakuabu. (2 Tim. 2:⁠2) Nunku, bantu bavule badi mpindiewu bumvua bakula bua lumu luimpe.

⁸ Mbuena kuamba ne: kanuena nukengela kuindila anu dikumbula dia mutangidi wa tshijengu bua kuteta imue ya ku mishindu eyi ya diyisha. Mona imue ngenyi iwikala mua kumona miakane bua teritware webe:

⁹ Bumanyishi mu misesu: ‘Bantu badi penyi?’ ke mututu tudiebeja imue misangu mu diyisha mu tshitupa tshikena bantu mu dinda munkatshi mua lumingu. Bidi mua kuenzeka ne: utuilangana ne bakuabu padibu mu ditambakana. Ukadiku mutete bua kuyukila nabu mu difila dia bumanyishi mu misesu anyi? Ngenzelu eu wa mudimu udi mua kupatula bipeta bimpe patuikala mua kuwenza mu mushindu muimpe. Pamutu pa kushala muaba umue ne bibejibeji ku bianza, mbimpe kuakuisha bantu ne kutuadija muyuki muimpe wa bulunda. Kabiena bikengela anu kufila bumanyishi kudi bapitshi ba mu njila bonso to. Akula, tshilejilu, ne aba badi benda bitekete, babandidi ba bintu mu magazin, aba badi mu mashinyi mimanyika anyi bindile bise. Bua kutuadija bidi bikengela kuela muntu muoyo wa bulunda ne kuindila diandamuna diende. Pikalaye muanyishe bua kuyukila, muebeje mmuenenu wende pa tshiena-bualu kampanda tshidi mua kumusankisha.

¹⁰ Mu dikumbula mu tshisumbu kampanda, mutangidi muena ngendu wakabikila bamanyishi basambombo bua kudisangabu kudiye ne kudi mukajende bua kufila bumanyishi mu misesu. Tshiakenzeka ntshinyi? “Tuakapitshisha dinda dilenga!” ke muakajadikaye. “Katuakapangila muntu kumbelu nansha. Tuakafila bibejibeji 80 pamue ne trakte mivule. Tuakenza miyuki mivule idi isonsola mutshima. Mumanyishi, uvua uyisha bua musangu wa kumpala mu misesu, wakamba ne: ‘Ndi mu njila wa bulelela kukadi bidimu bivule ne tshivua mua kuela meji ne: mvua mpitshila ku luseke lua nganyi to!’ Ku ndekelu kua lumingu, bibejibeji bionso bia pa mutu bia mu tshisumbu bivua bifidibue.”

¹¹ Pakayaye mu tshisumbu tshikuabu, mutangidi muena ngendu umue umue eu wakapeta lumu ne: bamue bamanyishi bavua bafile bumanyishi mu misesu mu dinda menemene, kadi kabavua bapatule bipeta bilenga to. Muanetu wa bakaji kampanda wakakula anu ne bantu babidi mu diyisha diende, bualu bakuabu bonso bavuaye upetangana nabu bavua banyemena ku midimu. Mutangidi muena ngendu wakabela yonso wa kudibu bua kupingana anu mu musesu umue umue au mu mêba mabandile a dinda. Ke tshiakenzabu, ne bakashalamu too ne ku midi. Muanetu wa bakaji uvua muyukidilangane anu ne bantu babidi mu dinda menemene wakenza bipite apu musangu muibîdi eu. Wakashiya bibejibeji 31 ne broshire 15, wakapeta mêna ne adrese ya bantu muanda-mutekete ne wakatuadija malonga a Bible abidi! Bamanyishi bakuabu mu kasumbu aku bakapeta pabu bipeta bikankamiji.

¹² Paudi utuilangana ne muntu udi uleja dijinga dia kumanya bivule, dienzeja bua kupeta dîna diende, adrese wende ne nimero yende ya telefone. Pamutu pa kumuebeja bionso ebi diakamue, udi mua kuamba ne: “Ndi muanyishe bikole muyuki eu. Kudiku mushindu wa kutungunuka nawu musangu mukuabu anyi?” Peshi muebeje ne: “Kudiku mushindu wa kukupeta kumbelu anyi?” Mu mushindu eu, bantu bavule batu bitaba bua kubakumbulula. Jadika ne: udi ne mabeji a bungi a dibikila bua aba bàjingà kubuela mu bisangilu.

¹³ Pawikala wakula ne muntu kampanda musankididi wa bulelela kadi muikale usomba mu teritware wa tshisumbu tshikuabu, fila mamanyisha bua ne: bana betu bena muaba eu bamone mua kutabalela dijinga diende. Bumanyishi mu misesu nebuambuluishe bua kumuangalaja bimpe menemene lumu luimpe mu rejon wenu anyi? Pikalabi nanku, dilongolola bua kuditua mu bumanyishi mu misesu pa dîba didi dikengedibua ne nedikuambuluishe bua kulenga bantu ba bungi.

¹⁴ Bumanyishi mu mashinyi a diambula bantu: Mu dinda kampanda, bampanda-njila kansanga bakangata dipangadika dia kufila bumanyishi kudi bantu bavua bindila mashinyi ku luseke lua tshilongelu tshia tulasa tubandile. Bavua ne miyuki misheme, kadi lutatu luvua lumueneka. Mashinyi avua afika anu pa dibotakana dia muyuki, ke tshivua tshimanyika diakamue muyuki. Bampanda-njila kujikija bualu ebu pa kubuela mu mashinyi bua kutungunuka ne kufila bumanyishi kudi bantu bavua mu mashinyi, eku baya batangile mu tshimenga. Pakafikabu ku muaba udi mashinyi ashikidila, bampanda-njila bakalukila kabidi ne mashinyi au eku baditue anu mu difila dia bumanyishi. Panyima pa misangu mivule ya diya ne dialukila, bakatangila bipeta bivuabu bapete: bavua bashiye bibejibeji bipite pa 200 ne batuadije malonga a Bible asambombo! Bamue bantu bakitaba bua kufila adrese yabu ne nimero ya telefone bua kubakumbulabu ku mabu. Lumingu luvua lulonda, bampanda-njila bakalukila kabidi ku tshimanyinyi tshia mashinyi ne bakenza anu mushindu wa muomumue. Bakashiya bibejibeji 164 ne kubangabu dilonga dia Bible dimuepele dipiadipia! Ku muaba wa diambuila bantu, muena luendu kampanda wakabuela ku bise ne kusombaye pa muaba anu umuepele uvuaku: ku luseke lua mpanda-njila kansanga. Wakatangila muanetu ne kumuambilaye ne: “Ndi mumanye ne: udi ne Tshibumba tshia Nsentedi tshia kumpesha!”

¹⁵ Bamanyishi bavule batu bafila bumanyishi bikole padibu benzela luendu ku bise, ku kawulu anyi ku ndeke. Mmunyi mutudi mua kutuadija diyukidilangana ne muntu udi ku luseke luetu? Mumanyishi wa bidimu 12 wakasanka bua kubanga dibala dia Réveillez-vous ! mu mashinyi, utekemena bua kujula ntema ya nsongakaji uvua musombe ku luseke luende. Ke tshiakenzeka! Nsongakaji wakamuebeja tshivuaye ubala, ne wakamuandamuna se: tshivua tshiena-bualu pa mushindu wa kujikija ntatu idi bansonga bakamangana nayi. Wakasakidila ne: tshiena-bualu tshivua tshimuambuluishe bikole ne yeye pende uvua mua kupetelaku diambuluisha. Nsongakaji wakitaba bibejibeji ne disanka. Diyukidilangana diabu divua diteleja kudi bansonga bakuabu babidi bakalomba pabu kopi ya bibejibeji. Ke kanyemesha wa bise kuimanyika mashinyi ku mpenga kua njila e kukonka tshivua tshikoka ntema ya bantu nunku ku bibejibeji ebi. Mumane kumvua, wakitaba pende bua kubiangata. Nunku, bionso ebi kabivua mua kuenzeka bu nsonga eu mumanyishi kayi ne bibejibeji bikumbane bua kuleja aba bavua basankidile bumanyishi!

¹⁶ Bumanyishi mu mpangu ya nyama ne mu bimanyikilu bia mashinyi: Padi tshikondo tshikale tshimpe, bumanyishi bua mu mpangu ya nyama ne mu bimanyikilu bia mashinyi budi mushindu mutambe buimpe wa kulenga bantu. Ukadiku mutete bua kufila bumanyishi ku tshimanyikilu tshia mashinyi mu tshijengu tshia bungenda anyi? Mu difika ku tshimanyikilu tshia mashinyi, kenzakana katupa eku ne eku. Keba muntu ukena lukasalukasa anyi udi muindile mu mashinyi mimanyika ne teta mua kutuadija muyuki muimpe wa bulunda. Pikala muyuki mua kutungunuka, amba mukenji wa Bukalenge. Dienzeja bua kuikala nkayebe kadi eku muikale ku luseke lua mumanyishi mukuabu. Epuka bua kuikala ne tshibuta tshipatshisha bintu anyi kukoka ntema mu mushindu umue peshi mukuabu ku mudimu webe. Ikala ne lubatshi. Imue misangu mbimpe kubenga kuenza mutantshi mule ku tshimanyikilu tshia mashinyi tshimue ne kuya ku tshikuabu. Bikala muntu kayi musue kuyukila nebe, mulekele mu bukalanga ne tete kuakula ne mukuabu. Mu dienza mushindu eu, muanetu wa balume mukuabu wakashiya bibejibeji 90 mu ngondo umuepele mu difila bumanyishi pa bimanyikilu bia mashinyi!

¹⁷ Bamue bantu batu baya mu mpangu ya nyama bua kudiolola, bua kunaya peshi bua kusomba ne bana babu balela. Pa kubenga kulubakaja midimu yabu, keba mushindu wa kufila bumanyishi. Muanetu wa balume kampanda wakabanga diyukila ne mulami wa lupangu ne wakamona se: muntu eu uvua unyingalala bua dinua dia bintu bia lulengu ne bua nsombelu wa matuku atshilualua wa bana bende. Dilonga dia Bible diakabanga, ne didi dienzekela pa tshibidilu mu lupangu elu.

¹⁸ Bumanyishi bua mu mpukapuka mu bijengu bia bungenda: Nansha mudibi kabiyi bikumbana misangu mivule bua kuyisha mu mushindu mulongolola ku magazin ne ku magazin mu bijengu bia bungenda bilondeshile mikenji idimu, bamue bamanyishi badi basonsola mishindu ya kufila bumanyishi bua mu mpukapuka. Badi basomba pa tshibasa ne batuadija muyuki ne badi bimana bua kuikisha. Padi bantu baleja dijinga dia kumanya bivule, badi babaleja mu musokoko trakte anyi tshibejibeji ne baditatshisha bua kuenza malongolola bua kubakumbula. Panyima pa bamane kupitshisha minute mu difila dia bumanyishi mu tshitupa tshimue tshia tshijengu tshia bungenda, badi baya mu muaba mukuabu ne bayukila ne muntu mukuabu. Mbimpe kudimuka bua kubenga kukoka ntema ya bantu patudi tufila bumanyishi bua mu mpukapuka mu mushindu eu.

¹⁹ Paudi wela muntu muoyo, tuadija nende diyukidilangana dia bulunda. Bianyisha muteleji webe muyuki, muele lukonko ne muteleje ne ntema padiye wakula. Tabalela bidiye ukuambila. Muleje ne: udi wangata mmuenenu wende ne mushinga. Pikalaku mushindu, amba ne: udi witaba tshidiye wamba.

²⁰ Muanetu wa bakaji kampanda wakayukila mu mushindu mulenga ne mukaji kansanga mukulakaje wamba ne: mishinga ya bintu ivua mibande bikole. Mukaji wakashikula mutu diakamue, ke tshiakafikisha ku dibotakaja dia muyuki. Muanetu wa bakaji eu wakafika ku dipeta dîna ne adrese bia mukaji eu ne wakalukila bua kumumona munkatshi mua lumingu.

²¹ Buambi bua ku magazin ne ku magazin: Teritware ya bimue bisumbu idi kabidi ne nzubu ya dipanyina bintu. Muanetu udi muomekela mudimu wa teritware neenze karte nangananga bua bitupa ebi bidi ne bantu bavule badi bapanyisha bintu. Nenuleje bimpe pa teritware yonso idi ne kartié bu nunku bua se: bangenda badi bakumbudibua pa buabu. Mu teritware mikuabu, badi mua kukumbula bangenda pamue ne miaba idibu basombela. Bakulu badi mua kulomba bamanyishi bapiluke bua kutambakena misangu yonso mu teritware ya bungenda bua ne: buambi bua ku magazin ne ku magazin kabujiki.

²² Biakulombabu bua uditue mu mudimu eu bua musangu wa kumpala, mushindu muimpe wa ‘kupeta dikima’ ng’wa kuanji kuya mu magazin a makese, pashishe, pawibidile, walabaje mudimu webe mu a manene. (1 Tes. 2:⁠2) Paudi uyisha ku magazin ne ku magazin, vuala bienza bu udi mu tshisangilu ku Nzubu wa Bukalenge. Bikalaku mushindu, buela mu magazin pikalamu kamuyi musumbi wa bintu. Lomba bua kuakula ne mfumu wa mudimu anyi muena bintu. Ikala ne musangelu, ne nangananga akula mu tshikoso. Kabiena ne mushinga bua kulomba luse. Bangenda bavule badi bambuluisha basumbi ne mbamanye bimpe ne: badi mua kukoshibua ku mêyi.

²³ Mumane kuela ngenda-mushinga muoyo, udi mua kuamba ne: “Bangenda-mushinga badi dîba dionso bafimpakaja kudi midimu ne mbikole bua kubasangana ku mabu; ke bua tshinyi tudi balue kukukumbula ku muaba webe wa mudimu bua kukulomba dibala dia tshiena-bualu tshidi tshisaka ku diela meji.” Nunku, fila diumvuija dimue anyi abidi pa nimero ya bibejibeji bia ndekelu.

²⁴ Biwikala wakula ne mfumu wa mudimu, udi kabidi mua kuteta kuamba ne: “Tuvua bafike ku dimona se: bangenda badi dijinga ne kuikala bapeta ngumu. Nimero wa ndekelu wa Tshibumba tshia Nsentedi (anyi wa Réveillez-vous !) udi ne tshiena-bualu tshidi tshitangila yonso wa kutudi.” Umvuija tshidibi bileja ne komesha pa kuamba ne: “Tudi batuishibue se: newanyishe pebe dibala dia nimero eu.”

²⁵ Bikalaku bena mudimu, udi mua kusakidila bikalabi bia meji, ne: “Newanyisheku bua meme kuleja bena mudimu bebe nimero eu mu katupa kîpi anyi?” Pikalaye mukuitabile, kupu muoyo ne: uvua mulaye bua kuakula mu katupa kîpi, ne mfumu wa mudimu mmutekemene se: neunemeke mêyi ebe. Biasua bena mudimu kuyukidilangana nebe mutantshi mule, mbimpe bua kamonangana nabu ku mabu.

²⁶ Matuku mashale aa, mu tshimenga tshikese kampanda, bamanyishi bakashindikija mutangidi wa tshijengu mu mudimu wa ku magazin ne ku magazin. Kumpala, bamue bavua ne ditshina, bualu kabavua banji kuenza mudimu eu; kadi bakawenza bu pa tshibidilu ne bakaunanga. Kumpala kua dîba dijima, bakavua bayukile ne bantu 37 ne bashiye bibejibeji 24 ne broshire 4. Muanetu wa balume kampanda wakaleja ne: pa tshibidilu ki mbipepele bua kutuilangana ne bantu bungi nunku mu mudimu wa ku tshiibi ne ku tshiibi mu ngondo umuepele bu muvuabu benze mu mudimu wa ku magazin ne ku magazin mu mutantshi mukese nunku to.

²⁷ Tukebayi mishindu ya kuyisha: Yezu kavua anu wenza buambi bulongolola nansha. Wakamuangalaja lumu luimpe mu tshikondo tshionso tshiakanyine. (Mat. 9:9; Luka 19:​1-10; Yone 4:​6-15) Bambisha mutu bamanyishi bakeba mishindu ya kuyisha.

²⁸ Bamue badi ne tshibidilu tshia kufila bumanyishi kudi baledi batu bindila bana babu dîba didi tulasa tupatuka. Bu mutu bamue baledi mua kuindila muaba eu minute 20 kumpala, badi ne dîba dia kubanga muyuki mukankamiji pa tshiena-bualu tshia mu Bible.

²⁹ Bampanda-njila bavule badi badienzeja mu mushindu wa pa buawu bua kulenga bantu ku diambuluisha dia biena-bualu bidi mu bibejibeji bietu. Tshilejilu, muanetu wa bakaji kampanda wakapeta bipeta bimpe mu dibuela mu bilongelu bia tulasa bisambombo bivua mu teritware wa tshisumbu tshiabu bua kubaleja muanda uvua ne tshiena-bualu tshia “ L’école en crise”, mupatula mu Réveillez-vous ! wa mu dia 22 Tshisua-munene 1995. Wakaya kabidi mu miaba ya midimu ya diambuluisha bantu muikale ne bibejibeji pa nsombelu wa mu dîku ne dibundangana dia bana, ne bakamuitabila bua kualukilaye ne nimero mikuabu ivua itangila biena-bualu bia mushindu’eu. Udi ujadika muanda uvuaye mumone mu ditanda kampanda bu wa “pa buawu” bua malu a mudimu mu diumvuangana ne Réveillez-vous ! wa mu dia 8 Luabanya 1996 pa bulofua.

³⁰ Mutangidi wa distrike mukuabu udi wamba ne: utu ufila bumanyishi bua mu mpukapuka pamue ne mukajende padibu mu ditambakana. Batu basungula tshikondo tshidi magazin kâyi ne bantu bavule ne tshikondo tshidi basumbi bendakana mu tujila tukese badilekelele. Nunku, badi ne miyuki mivule idi ilengelela bantu.

³¹ Bamanyishi bavule batu bapeta bipeta bilenga mu difila bumanyishi mu miaba idibu basukula bintu. Kabena basanka bua kushiya bibejibeji padiku kakuyi muntu nansha. Tshipatshila tshiabu ntshia kumanyisha lumu luimpe kudi bantu; badi badienzeja bua kuakula ne basumbi ba ku tshisukuidi tshia bintu.

³² Mu miaba mikuabu, bamanyishi basungula mbanyishibue bua kufila bumanyishi ku bipalu bia ndeke. Bavua bapete imue misangu disanka dia kuyisha bantu benji ba ngendu mu matunga mavule a pa buloba ne badi mu matunga mudi Bantemu ba Yehowa bikale bakese. Padi bantu aba baleja dijinga dia kumanya bivule, badi babashila trakte anyi bibejibeji.

³³ Padiku kakuyi mushindu, mu teritware wa tshisumbu, bua kufila bumanyishi kudi bafutshidi badi ku nzubu minene idi milama bikole, bamue bamanyishi badi ne tshibidilu tshia kuyisha ne budimu nsentedi idi ilama anyi bamfumu ba midimu mu biro biabu. Badi benza mushindu umue mu mpangu minene ya bantu idi milama. Mutangidi wa tshijengu kampanda wakalonda ngenzelu eu ne bamue bamanyishi mu mpangu muanda-mutekete. Misangu yonso, bavua bumvuija mfumu wa mudimu ne: bikalabu kabayi banyishibue bua kumonangana ne bafutshidi bu mutubu benza pa tshibidilu, kabavua bajinga bua kubabengela mamanyisha avua mu nimero ya ndekelu ya bibejibeji bietu. Bamfumu ba mudimu ba mpangu muanda-mutekete bakitaba ne disanka bibejibeji ne bakalomba bua kupeta nimero ivua ilonda!

³⁴ Tudienzejayi bua kuyisha miaba yonso: Bua kulama nsombelu udi mu diumvuangana ne dilambula dia bumuntu buetu kudi Nzambi, tudi ne bua kumanya se: dimanyisha mukenji wa Bukalenge ditomekela ndia kuenza ne lukasa luonso. Bituasa kulenga bantu mu tshikondo tshidi tshibakanyine, tudi ne bua kupua muoyo bitudi basue “bua kusungila mu mishindu yonso bamue ba kudibu.” Basadidi bonso ba Yehowa baditshipe ne batambule badi bajinga bua kuambulula mêyi a Paulo, wakamba ne: “Ndi ngenza bionso anu bua lumu luimpe, bua kuluabanyangana ne bakuabu.”​—⁠1 Kol. 9:​22, 23, NW.

³⁵ Paulo wakafunda kabidi ne: “Nanku ne muoyo mujima, nenditumbishe nangananga pa butekete buanyi, bua bukole bua Kristo buase munda muanyi.  . . . Bualu pandi ne butekete, ke pandi ne bukole.” (2 Kor. 12:​9, 10, Mukenji Mulenga) Mu miaku mikuabu, muntu nansha umue kêna mua kukumbaja mudimu ku bukole buende nkayende. Tudi ne bua kusambila Yehowa bua kupeta bukole bua spiritu wende munsantu. Bitualomba bukole kudi Yehowa, tudi mua kujadika se: neandamune ku masambila etu. Nunku, dinanga ditudi nadi bua bantu neditusake bua kukebulula mishindu ya kubayisha lumu luimpe muaba wonso udibu basanganyibua. Mu lumingu ludi lulonda, bua tshinyi kubenga kuteta dimue dia ku mamanyisha mafila mu tshisakidila etshi?