Mushindu Wa Kudisumbila Tshikondo Tshiakanyine

¹ Bu mutudi ne bivule bia kuenza mu mudimu wa Yehowa, tudi bikale bushuwa ne mudimu. (1 Kol. 15:58) Tudi bamanye mushinga wa dilonga dia muntu nkayende ne dia mu dîku, wa dibala dia Bible dituku dionso, wa dilongolola dia bisangilu ne dibuelamu, ne wa kudifila pa tshibidilu mu buambi. Batangidi badi bakumbaja bujitu bua balami ne benza midimu mikuabu ya mu tshisumbu. Bamue badi ne majitu manême a mu dîku peshi malu makuabu mashilashilangane adibu ne bua kuenza. Bidi bikengela bua muntu yonso wa kutudi ikale ne nkatshinkatshi ne bulongame buakane bua kufikaye ku dikumbaja malu onso.

² Tudifundile bipatshila bia bunême: Tudi ne bua kuikala ne bujinguluji ne busunguluji buimpe bituikala basue ‘kudisumbila tshikondo tshikumbanyine.’ (Ef. 5:​15, 16, NW) Tudi ne bua kujadika “bintu bidi bitambe mushinga” ne kubiteka pa muaba wa kumpala mu mulongolongo wetu wa bipatshila bia bunême. (Fil. 1:​10, NW) Bena dibaka kampanda bakamba bua bidi bitangila dîku diabu dia teokrasi ne: “Tudi buuje nsombelu wetu ne bulelela . . . . Bulelela kabuena amu luseke lumue lua nsombelu wetu, budi nsombelu wetu. Malu onso ashadi aa adi anyungulukilaku.” Bidi bia mushinga bua tuetu kuteka ntendelelu wa Yehowa ne mudimu Wende pa muaba wa kumpala mu nsombelu wetu.

³ Tusunguluje malu adi atujimijila dîba: Lumingu lumue ludi ne mêba 168, ne tudi ne bua kuikala ne meji mu ditumika ne dîba ditudi nadi. Bua kupeta dîba dikumbane dia kudifila mu midimu ya teokrasi, tudi ne bua kusunguluja bintu bidi bitujimijila dîba ne kukepesha bungi buabi. Bilondeshile dikebulula kampanda, muena Amerike utu utangila televizion mu mêba mapite pa 30 ku lumingu! Bakuabu batu bapitshisha mêba mavule mu dibala mikanda ya bulongolodi ebu. Bamue badi mua kumona se: badi bajimija dîba dipite mu malu menza pamue, mu dipitshisha dîba, mu dijikija lutetuku peshi kumpala kua ordinatere. Imue misangu netukengele kukonkonona ne lubatshi ditumika dietu ne dîba dia dituku dionso bua kumona mua kutumika biakane ne dîba dietu. Bituenze malu ne meji, netukepeshe dîba ditutu tufila mu malu makuabu a patupu.

⁴ Tutumike biakane ne dîba: Mu nsombelu kayi yonso utudi nende, tudi bonso ne bua kudisumbila tshikondo bua kukumbaja bipatshila bietu bia mu nyuma. Bamue mbafike ku dimona se: pa kutuadija mudimu patshiatshia dituku dionso, badi bafika ku dienza malu a bungi. Bituikala tuangata mêba mavule mu diya ku mudimu peshi mu dindila bakuabu, tudi mua kulambilapu bua kubala Bible, bua kulongolola bisangilu anyi bua kuteleja kasete ìdì Société utupetesha. Bidi bia mushinga bua mêku kudilongoluelawu tshikondo tshijadika ne tshia pa tshibidilu bua kulonga popamue. Bikala bena mu dîku bonso balua pa dîba bua dilonga dia mu dîku, muntu yonso neapete dîba divule buende nkayende.

⁵ Bu mudi tshikondo tshipita, tudi ne bua kutamba kuikala bamanye se: “tshikondo tshidi tshishale ntshipidile.” (1 Kol. 7:​29, NW) Muoyo wetu mmushindamene ku mushindu utudi tutumika ne tshikondo etshi tshia mushinga. Netubeneshibue bituadisumbila tshikondo tshikumbanyine ne kipatshila ka kuteka bipatshila bia Bukalenge pa muaba wa kumpala.​—⁠Mat. 6:⁠33.