Tutangalajayi Ngumu Mimpe ya Bualu Butambe Bulenga

¹ Kukadi mpindieu bidimu 117 bidi Tshibumba tshia Nsentedi tshiakuila bulelela. Lelu’eu badi batapa ku biamu kopi 18 950 000 ya nimero yonso mu miakulu 125. Réveillez-vous ! udi kabidi muakuidi wa kale wa Dîyi dia Nzambi ne kopi 15 730 000 idi mpindieu ipatuka mu miakulu 80.​—⁠Tangila Kolosai 1:⁠23.

² Bibejibeji bidi bikumbaja malu makengela a mu nyuma: Miliyo ya bantu ba muoyo muimpe badi bababidila Tshibumba tshia Nsentedi ne Réveillez-vous ! bìdì bibambuluisha bua kukumbaja makengela abu a mu nyuma ku diambuluisha dia biena-bualu bìdì biibaka ditabuja. Tshilejilu, mu Tshibumba tshia Nsentedi tshia mu dia 1 Luishi 1996, tuvua balonge tshiena-bualu tshivua tshiakula bua mushinga wa kueyemena Yehowa ne Dîyi diende. Tshibumba tshia Nsentedi tshia mu dia 1 Luabanya 1996 tshivua tshitukankamija bua kuikala ne bia bungi bia kuenza mu mudimu wa Yehowa ne kutungunuka ne kumuindila. Mmunyipu muvua dikonkonona disulakaja dia mulayi wa Sefanya dikolesha mutshima! Pashishe tuakenza diyukidilangana disonsodi pa bulamatshi ku mikenji bua Buena-nkristo mu Tshibumba tshia Nsentedi tshia mu dia 15 Luabanya 1996. Nimero wa mu dia 15 Lumungulu 1996 uvua muele kashonyi pa mushinga wa kubala ne kulonga Dîyi dia Nzambi pa tshibidilu. Biena-bualu ebi bivua bituambuluishe bua kulepesha ngumvuilu wetu wa Dîyi dia Nzambi ne bua kudiundisha dianyisha dietu bua Bukalenge buende.

³ Ku lukuabu luseke, bibejibeji bidi ne biena-bualu biakanyine tshikondo ne bikuatshishi pa bikadilu bidi bisankisha Nzambi, pa malu a mu nsombelu wa Buena-nkristo ne malu makuabu a mushinga. Bidi biakula bua malu a mushinga mukole àdì atangila muoyo wetu. Nenku, tudi mua kupeta nsombelu mutambe bulenga bituadijile ku mpindieu eku bindile dikumbana dia malaya a Nzambi pa bidi bitangila bualu butambe bulenga bua matuku atshilualua.​—⁠Yesh. 48:17; 1 Tim. 6:⁠19.

⁴ Pa kubala mu tshikoso malu mafunda mu dibeji 4 dia nimero yonso wa Réveillez-vous ! netumone se: tudi ne tubingila tuakane tua kulomba bantu bua bangate tshibejibeji etshi. Muaba kayi wonso udi musombe bantu, nansha bikale bansonga peshi bakulakaje, dibala edi nditambe bulenga kudibu. Badi bamba mu dibeji edi ne: “Réveillez-vous ! udi utangila muena dîku yonso. Udi uleja mushindu wa kupita ne ntatu ya mu tshikondo tshietu etshi. Udi ufila mamanyisha, wakula bua bibidilu bia bisamba bishilashilangane ne bua biena-bualu bia malu a ntendelelu ne bia sianse. Kadi kêna wimanyina apu to. Udi ukebulula malu mu buondoke ne ufila diumvuija dilelela dia mianda, pa kulama ndubidilu wende mu malu a tshididi ne kêna utumbisha dikoba kampanda anyi kansanga. Bia mushinga mutambe, tshibejibeji etshi tshidi tshifila tubingila tujalame bua kuitabuja ne: Mufuki neakumbaje malaya ende pa kujadika mu katupa kîpi emu bulongolodi bupiabupia bua ditalala ne bua bukubi buapingana ndongoluelu eu mubi wa malu ne ukena ne mikenji.”

⁵ Tulejayi bibejibeji kudi bakuabu: Tuikala ne muoyo wa kalolo pa bidi bitangila dileja dia Tshibumba tshia Nsentedi ne Réveillez-vous ! (Tangila 1 Timote 6:18.) Tuikale ne imue nimero ku bianza bua kuyileja bantu batuikale mua kusambakena nabu. (Muambi 11:⁠6) Tuetu bonso, popamue ne bansonga ne bamanyishi bapiabapia, tudi mua kudifila tshishiki mu diabanya dia bibejibeji ngondo eu pa kukuata mudimu ne maleja a mu tshikoso maashila pa biena-bualu bia ngumu ya matuku aa bidi mu nimero ya ndekelu. Tuibidilangane bimpe ne malu mafundamu ne tubileje ne muoyo mujima ne dituishibua.

⁶ Tshibumba tshia Nsentedi ne Réveillez-vous ! bidi ne mamanyisha adi muntu yonso ne dijinga dia kumanya. Tubishile bantu; ng’umue wa ku mishindu mitambe buimpe ya kubambuluisha bua kumanya lumu luimpe lua se: bualu butambe bulenga bukadi pa kuenzeka.