Mishindu mipiamipia ya kuyisha muaba udi bantu ba bungi

1. Bena Kristo ba mu bidimu lukama bia kumpala mbatushile tshilejilu kayi?

¹ Bena Kristo ba mu bidimu lukama bia kumpala kabavua bayisha anu ku nzubu ne ku nzubu to. Bavua kabidi bayisha miaba ivua bantu ba bungi. (Bien. 20:20) Tshilejilu, bavua baya ku ntempelo muaba uvuabu bamanye ne: bavua mua kusangana bantu ba bungi. (Bien. 5:42) Pavua mupostolo Paulo mu Atena, uvua uyisha dituku dionso bantu bavua mu tshisalu. (Bien. 17:17) Lelu, mushindu wetu munene wa kutangalaja lumu luimpe udi anu wa kuyisha ku nzubu ne ku nzubu. Kadi tudi tuya kabidi miaba idi mashinyi imana, miaba idibu bapanyishila bintu ne miaba ya midimu, miaba idi bantu bajikijila lutetuku, mu njila idi ne makazen a bungi ne miaba mikuabu bua kuyisha bantu kuonso kutudi mua kubapeta. Nansha mudibu bakankamija mumanyishi yonso bua kuyisha miaba idi bantu ba bungi padiku mushindu, bamanyishi ba bungi nebapete mpunga wa kuenza mudimu eu mu mishindu mipiamipia ibidi mimpe ya kuyisha muaba udi bantu ba bungi.

2. Bakatuadija kuteta mushindu kayi wa kuyisha mu ngondo wa 11 wa 2011?

² Diyisha dia pa buadi mu bimenga binene: Anu muvuabi bileja mu dibeji dia 16 ne dia 17 mu mukanda wa Annuaire 2013, bakatuadija kuteta mushindu kampanda wa kuyisha muaba udi bantu ba bungi mu ngondo wa 11 mu 2011 mu tshimenga tshia New York. Bavua bateka mêsa ne bintu bivuabu batekela mikanda ya mu miakulu ya bungi bua ikale mimueneke bua kukoka bantu ntema; bavua babitekela miaba kampanda ya mu tshimenga ivua bantu ba bungi bapitshila. Dituku dionso bantu ba bungi bavua bapitshila miaba ayi, kusangisha ne bantu ba bungi batu basombela miaba idi Bantemu kabayi mua kubuela ne bantu batu kabayi batamba kusomba kumbelu. Bantu ba bungi bavua banyisha mikanda yetu. Mu ngondo umue patupu, bavua bafile bibejibeji 3 797 ne mikanda 7 986. Bantu ba bungi bavua bapitshilapu bakalomba bua bikale babalongesha Bible. Bu muvua tshipatshila tshinene tshivua tshia kutuadija malonga a Bible, adrese yonso uvuabu bashiye kudi muntu uvua muanyishe kulonga bavua bamutuma diakamue mu tshisumbu tshia muaba uvuaye musombele bua baye kumutangila kuende.

3. Mmunyi mudi mushindu eu wa kuyisha mutangalake?

³ Bu muvua mushindu eu wa kuyisha mupatule bipeta bimpe, badi mpindieu benza nawu mudimu pa buloba bujima, mu bimenga bikuabu mudi bantu ba bungi kabayi ne dîba. Betele wa mu ditunga dienu ke udi ne bua kuleja bimenga bidibu mua kuyisha mu mushindu eu. Misangu ya bungi bidi ne bua kuikala bimenga bidi ne miaba minene ya kuangatshila mashinyi anyi miaba idi biro bia bena mudimu bia bungi peshi ne nzubu ya bungi idi ifikisha bantu ba bungi ku dipitshila mu njila. Nunku, Betele neafundile bantu bikala mua kuyisha mu mushindu eu ne neabaleje malu makuabu adibu ne bua kulonda. Misangu ya bungi batu batuma bampanda-njila ba pa tshibidilu ne ba pa buabu bua kuenza mudimu eu, miaba mikuabu batu bangata bampanda-njila bambuluishi bua kuenzabu mudimu eu.

4. Leja mudibu bayisha mu bimenga binene mudi bantu kabayi ne dîba mu mushindu wa pa buawu.

⁴ Mushindu udibu bayisha: Bamanyishi batu bayisha muaba udi bantu ba bungi mu mushindu wa pa buawu batu misangu ya bungi bindila bua muntu alue ku mêsa kudibu peshi ku tshintu tshidibu batekele mikanda. Padi muntu usemena pabuipi, badi bamuambila bua kuangata mukanda udi umusankisha. Yeye muele nkonko, bampanda-njila badi bamuandamuna ne disanka dionso ku diambuluisha dia Bible. Yeye muangate mukanda, bampanda-njila kabena bamuambila bua kufila makuta to. Kadi yeye muebeje bua kumanya mututu tupeta makuta bua kutungunuja mudimu eu, bampanda-njila badi mua kumumvuija ne: bantu batu batuma makuta abu mu adrese udibu baleje mu mukanda eu. Koku mushindu, badi bamuebeja ne: “Udiku musue bua muntu alue kukutangila kuebe anyi?” peshi ne: “Udiku mumanye ne: pa kumbusha mukanda eu, tutu kabidi tulonga Bible ne bantu tshianana anyi?”

5. Mmunyi muvua kuyisha mu mushindu mupiamupia eu kupeteshe bamanyishi masanka?

⁵ Kuyisha mu mushindu eu nkupeteshe bamanyishi masanka a bungi. Muanetu mukuabu wa balume ne mukajende badi bamba ne: “Patuvua tuimana ku mêsa ne tumona muvua bantu binunu ne binunu bapita dituku dionso, bivua bisaka mioyo yetu bua kuditua mu mudimu munene udi wenzeka bua kuambuluisha bantu ba pa buloba bujima. Patuvua tumona bisumbu bia bantu ebi ne tuelangana meji bua mudi Yehowa utabalela muntu yonso ne muoyo mujima, dipangadika dietu dia kuteka mudimu wa kuyisha pa muaba wa kumpala diakakola. Tudi tufuanyikija mudi Yehowa mua kuikala ukonkonona mioyo ya bantu bonso bavua bapitshila ku mêsa, wenda ukeba badi bakumbane. Tudi tudiumvua pabuipi menemene ne banjelu benzejanganyi netu ba mudimu.”

6. a) Mmushindu kayi mukuabu wa kuyisha muaba udi bantu ba bungi udi bisumbu bia bungi bienda bilongolola? Mmushilangane ne wa pa buawu wa kuyisha mu bimenga binene ku tshinyi? b) Leja mudi bisumbu mua kueleshangana diboko padibi biyisha muaba udi bantu ba bungi.

⁶ Mudibu balongolole buambi bua muaba udi bantu ba bungi mu teritware wenu: Pa kumbusha diyisha dia pa buadi mu bimenga binene, kudi mushindu mukuabu mupiamupia udi tusumbu tua bakulu tua bungi tuenda tulongolola mu teritware yabu. Mushindu eu ngua bamanyishi baya ne mêsa peshi tshintu tshia kutekela mikanda muaba udi bantu ba bungi menemene bapitshila, bilondeshile mikalu ya teritware wa tshisumbu. Mushindu eu mmushilangane ne wa diyisha dia pa buadi mu bimenga binene mudi bantu kabayi ne dîba, bualu bamanyishi badi bafumina mu bisumbu bia bungi, baya kuyisha muaba umue udi bantu ba bungi bapitshila mu bimenga bisungula kudi Betele.​—Bala kazubu ka ne: “Mbimpe kuyukidilangana.”

7. Leja mudi bakulu mua kulongolola buambi bua muaba udi bantu ba bungi pikalabi bikumbana bua kuenza nanku.

⁷ Bakulu nebakonkonone bua kumanya bikala teritware wa tshisumbu tshiabu ni udi ne miaba idi bantu ba bungi batamba kupitshila ne kumona bikalabi ne mushinga bua kulongolola mudimu wa kuyisha muaba udi bantu ba bungi. Badi mua kuteka mêsa anyi tshintu tshikuabu tshia kutekela mikanda mu miaba bu mudi: miaba minene ya kuangatshila mashinyi, miaba idi bantu ba bungi, miaba itubu bajikijila lutetuku, njila idi bantu batamba kupitshila, miaba minene ya dipanyishila bintu, miaba ya iniversite, ku bipalu bia ndeke ne mu miaba itubu benzela bibilu bia ku tshidimu. Kuteka mêsa muaba umue, mu matuku a muomumue ne mu dîba dia muomumue kudi kupatula bipeta bimpe. Bana betu ba bungi bakamona ne: kuteka mêsa miaba minene ya dipanyishila bintu nkupatule bipeta bilenga kupita kuteka mêsa kumpala kua makazen amuepele tshianana, kudi bantu batuma lungenyi luabu luonso ku bidibu bakeba. Mu imue miaba bu mudi mu njila idi bantu ba bungi bendela idi mua kutuambuluisha bua tuteke kantu kampanda ka kutekela mikanda. Bakadi batulongoluele mabeji a pa buawu adi ne bimfuanyi bia Tshibumba tshia Nsentedi ne bia Réveillez-vous! ne bia mukanda wa Bible ulongesha bua kubiteka mu mushindu udi bantu mua kubimona anu bua mushindu mupiamupia eu wa kuyisha muaba udi bantu ba bungi. Bakulu badi mua kuangatshila ku Enternete mu site wetu. Bampanda-njila ne bamanyishi badi bakulu basungula bua kuenza mudimu eu, nebawenze anu mu mushindu wa muomumue ne bantu badi bawenza mu bimenga binene mudi bantu kabayi ne dîba, ne badi ne bua kutumikila mibelu ya mutangidi wa mudimu bimpe menemene. Bantu badi bitaba bobu babapeshe adrese udi kayi wa mu teritware wabu, mbimpe buuje diakamue formilere wa S-43 (Veuillez suivre l’intérêt) ne bamupeshe sekretere.

8. Pikalabu kabayi balongolole mu tshisumbu tshienu bua kuyisha muaba udi bantu ba bungi, mmiaba kayi iudi mua kupeta mpunga bua kuyisha bantu ba bungi?

⁸ Padi mishindu ibidi eyi kayiyi ikumbana bua tshisumbu tshienu: Bimue bisumbu kabiena mua kuikala ne miaba mu teritware yabi idi bantu batamba kupitshila ku makasa bua kutekabu mêsa anyi tshintu tshikuabu tshia kutekela mikanda. Kadi, nansha mu bisumbu abi, tudi tukankamija bamanyishi bua bikale bayisha miaba idi bantu ba bungi padibu bayisha nkayabu. Kudiku tshisalu anyi makazen manene peshi miaba mikuabu idi bantu batantshila bikole mu teritware wenu anyi? Kudiku muaba utu bantu bajikijila lutetuku anyi badisangishila anyi? Kudiku miaba itu bantu benzela bibilu binene ku musangu ne ku musangu mu teritware wenu anyi? Biobi nanku, udi ne mushindu wa kuyisha muaba udi bantu ba bungi.

9. Tudi ne bua kuditatshisha ne muetu muonso bua kuyisha bantu muaba wonso udibu bua tshinyi?

⁹ Yehowa mmusue ne: “bantu ba mishindu yonso basungidibue ne bafike ku dimanya dijalame dia bulelela.” (1 Tim. 2:4) Nanku tudi tuenza muetu muonso bua kuambila bantu ba bungi mukenji wa Bukalenge kumpala kua nshikidilu kuluaye. (Mat. 24:14) Mu miaba ya bungi mbikole bua kupeta bantu kumbelu. Kadi, kudi anu mushindu wa kuyukila nabu mu miaba itu bantu batamba kuya. Kuyisha muaba udi bantu ba bungi ke mushindu umuepele udi bamue bantu mua kupeta mpunga wa kumvuabu lumu luimpe. Nunku, bua kuenza mudimu eu ne muetu muonso, tuyishayi bantu muaba kayi wonso utudi mua kubapetela.​—2 Tim. 4:5.

[Kazubu mu dibeji 5]

Mbimpe kuyukidilangana

Bilondeshile malu atudi bumvue, bamanyishi ba mu bisumbu bia pamue batu imue misangu benza mudimu wa kuyisha bantu ba bungi mu njila umue umue, ne mu miaba imue imue idibu bimanyikila mashinyi, ne mu miaba imue imue ya midimu anyi itu bantu baya kuangatshila mashinyi. Bamanyishi ba mu bisumbu bishilangane bavua bapeshe bantu bibejibeji mu miaba imue imue ya kuakidila anyi ya kuindila bantu, peshi mu miaba ya disukuila bilamba, ne bavua kabidi bayishe mu miaba imue imue ya midimu. Bualu ebu buakatonda bantu bavua benza midimu ne aba bavua basombele miaba ayi, nansha muvua bamanyishi kabayi baya miaba ayi mu dîba dia muomumue. Nanku mbimpe kunemeka mikalu ya teritware wenu panudi nuyisha muaba udi bantu ba bungi.

Pikala bamanyishi basue kuyisha muaba udi bantu ba bungi mu teritware wa tshisumbu tshidi pamue nabu, mbimpe bayukile ne mutangidi wa mudimu wa tshisumbu tshiabu. Nanku mutangidi wa mudimu neayukile ne mutangidi wa mudimu wa mu tshisumbu tshikuabu atshi bua kupeta dianyisha kumpala kua bamanyishi ba mu tshisumbu tshiabu kuyabu kuyisha. Bikala bisumbu bia miakulu mikuabu biyisha mu teritware umue, batangidi ba mudimu badi ne bua kuyukidilangana bimpe, nunku mudimu wabu kawakutonda bantu tshianana tshianana to. Nuenu nuyukidilangana bimpe, malu onso neenzeke “bimpe mu bulongame.”​—1 Kol. 14:40.

[Tshimfuanyi mu dibeji 6]

[Tshimfuanyi mu dibeji 6]