Mushindu mupiamupia udi usankisha wa kuyisha muaba udi bantu ba bungi
1. Ntshinyi tshivuabu balombe bisumbu bidi ne miaba idi bantu ba bungi bapitshila?
1 Bavua balombe bisumbu bidi miaba idi bantu ba bungi bapitshila bua kulongolola buambi bua kuyisha muaba udi bantu ba bungi, bateka mêsa anyi kaditempu kalamika foto ya mikanda yetu. Nuenu bateke kaditempu kalamika foto ya mikanda yetu, mumanyishi umue anyi babidi badi mua kuimana anyi kusomba ku luseke luaku. Kadi nuenu bateke mêsa, bamanyishi babidi ke badi ne bua kuimanaku. Bantu badibu bapeshe mudimu eu badi badienzeja bua kuikala ne musangelu, kudivuija balunda ba bantu ne kuikala ne tshimuenekelu tshidi tshisaka bantu bua kuyukila nabu. Padi muntu utangila ku kaditempu, umue wa ku bamanyishi udi mua kutuadija kuyukila nende; udi mua kumuambila ne: “Ukadiku muele meji bua tshidi Bible wamba bua tshiena-bualu etshi anyi?” Mumanyishi mukuabu umue anyi babidi badi mua kushala batabalele kaditempu aku panudi nuenda nuyisha.
2. Londa bualu buvua buenzeke budi buleja mushinga wa mushindu mupiamupia wa kuyisha muaba udi bantu ba bungi.
2 Mushindu wa kuyisha eu mmuambuluishe bamanyishi bua kulonga Bible ne bantu ba bungi. Mulongi kampanda wa mu tulasa tubandile wakasungula bua kufunda malu a Bantemu ba Yehowa mu mukanda wende, kadi kavua mumone Nzubu wa Bukalenge to. Lumingu luakalonda wakamona bateke mêsa avua ne foto ya mikanda yetu mu tshilongelu tshiabu. Wakatuadija kulonga Bible, lelu eu ukadi Ntemu wa Yehowa, ne mmuditue pende mu mudimu wa muomumue eu.
3. Bamue bamanyishi batu bamba tshinyi bua mushindu mupiamupia wa kuyisha eu?
3 Muanetu wa bakaji kampanda uvua muenze mudimu eu udi wamba ne: “Bamue bantu badi bimana bua kuangata bibejibeji bipiabipia. Bakuabu kabatu nansha banji kumvua bakula bua Bantemu ba Yehowa. Meme kumona ne: kuyisha mu mushindu eu kudi kungambuluisha bua kupeta bantu ba bungi.” Muanetu mukuabu wa bakaji udi wamba pende ne: “Eu mmushindu mupiamupia wa kuyisha udi usankisha bualu bantu badi balua kuudi, nansha mukenji wowu kauyi ubasankisha, batu amu bajinga kumanya tshidi tshipitakana.”
4. Bua tshinyi mbimpe kuteka mêsa a mikanda muaba umue, mu matuku a muomumue ne mu dîba dia muomumue lumingu luonso?
4 Mbimpe kuteka mêsa muaba umue, mu matuku a muomumue ne mu dîba dia muomumue lumingu luonso. Nanku bantu nebikale ne tshibidilu tshia kuamona ne nebikale bipepele kudibu bua kusemena pabuipi bua kuela nkonko anyi kulomba mikanda. Bakadiku balongolole mushindu wa kuyisha muaba udi bantu ba bungi eu mu tshisumbu tshienu anyi? Pikalabi nanku, udi pebe mua kuenza mudimu muimpe eu udi upatula bipeta bimpe ne udi utuambuluisha bua ‘kumanyisha Bukalenge bua Nzambi miaba mikuabu.’—Luka 9:60.