Mua kuyisha ne kantu ka kutekela mikanda

Kuyisha ne mesa anyi ne kaditempu ka kutekela mikanda nkulue mushindu muimpe udi ukoka bantu ba muoyo muakane ku bulelela. (Yone 6:44) Ke bua tshinyi, mbakakamije bakulu bua kulongolola mudimu wa kuyisha miaba idi bantu ba bungi bapitshila mu teritware wa tshisumbu tshiabu. Bu mudibi ne: kantu ka kutekela mikanda nka kumbusha, misangu ya bungi kabitu bikengela kulomba bamfumu bua batuanyishile to. Nnganyi udi mukumbane bua kuenza mudimu eu? Mbamanyishi badi ne busunguluji ne badi bamanye mua kuyukila bimpe ne bantu. Mona amue malu a kuenza ne a kubenga kuenza ambuluisha bamanyishi bua kukumbaja mudimu eu bimpe.

Malu a kuenza:

Wikale ne musangelu, wakidile bantu mu mushindu muimpe ne ikala musue kuambuluisha bantu. Bamue batu batua mimuemue ne disanka ne bela muntu muoyo ne musangelu. Muntu yeye mutangile ku kamesa padiye upita, muambile ne: “Angata wewe musue.”
Wimanyine kule ndambu ne kamesa. Imue miaba, bamanyishi batu bapatula bipeta bimpe padibu bimanyina kule ndambu ne kantu ka kutekela mikanda. Bakuabu batu bamona ne: kuimanyina kule kudi kupangisha bantu badi bapita bua kuimana ku kaditempu, nunku badi bimana pabuipi ne bindila too ne padi muntu wimana pabuipi ne kamesa. Padi muntu usemena pabuipi, tuadija kuyukila nende, umuebeje ne: “Ukadiku muele meji bua lukonko elu anyi?”
Dîba dionso didi mushindu umueneka, ubale mvese ya mu Bible.
Umvuija mutu dilonga dia Bible dienzeka padi muntu yonso wangata mukanda wetu, bu mudi mukanda wa Bible ulongesha. Ulombe muntu bua kumuleja kafilme ka Bua tshinyi kulonga Bible? mu telefone anyi mu tablete.
Koku mushindu, lomba bantu badi baleje dijinga adrese yabu. Muntu yeye kayi musombele mu teritware wenu, uuja formilere wa S-43 (Veuillez suivre l’intérêt), ne umupeshe sekretere ne lukasa luonso.