Tuakajayi mishindu yetu ya kuyisha: Tuadija kuyukila ne bantu bua kubayisha padi mpunga umueneka

Mushinga: Patutu tuyisha ku nzubu ne ku nzubu, misangu ya bungi katutu tusangana bantu kumbelu to. Kadi tudi mua kupetangana nabu patudi tuangata mashinyi bua kuya muaba kampanda, patudi mu lupitadi bindile bua kumonangana ne doktere, patudi mu dikisha ku mudimu anyi mu kalasa, ne miaba mikuabu. Yehowa mmusue bua bantu bonso bapete mpunga wa kumvua mukenji wa Bukalenge. (1 Tim. 2:3, 4) Misangu ya bungi, tudi ne bua kutuadija kuyukila ne bantu bua kumona mua kubayisha.

Mushindu wa kuenza malu:

Ikala ne busunguluji. Muntu udiku umueneka muena malu mimpe ne musue kuyukila ne bantu anyi? Muaba unudi udiku mua kunuambuluisha bua nuenu kuyukila badilekelele anyi? Bamue bamanyishi batu banji kutangila muntu, bafukisha mimuemue. Muntu yeye mufukishe pende mimuemue, batu batuadija kuyukila nende.
Wewe kuyi ne dikima dia kuakula, usambile mundamunda kadi mu tshikoso.—Neh. 2:4; Bien. 4:29.
Udi mua kutuadija ne mêyi makese, pamuapa kuela muntu muoyo. Yezu kavua mutuadije ne malu a Bukalenge bua kuyukila ne mukaji wa mu Samaleya to. (Yone 4:7) Imue misangu udi mua kuela muntu kalumbandi bua kutuadija kuyukila nende, wamba ne: “Udi mukoleshe bana bebe bimpe be!” Kuela lukonko mmushindu mukuabu wa kutuadija kuyukila ne bantu. Udi mua kuebeja muntu ne: “Uvuaku mumvue ngumu dilolo anyi?”
Wewe mumane kutuadija muyuki ne muntu, ukebe mushindu wa kumuambila lumu luimpe, kadi kuyi nende lukasa to. Wenze bua muyuki wenu wikala anu bu mutu bantu bayukila. Udi mua kumuambila bualu kampanda budi mua kukoka ntema yende, bumusaka bua kuela lukonko. Tshilejilu, nuenu nuyukila malu a mu dîku, udi mua kumuambila ne: “Ndi mupete imue mibelu mimpe idi yambuluisha bua kukolesha bana bimpe.” Nuenu nuyukila bualu kampanda bua mu tshikandakanda, udi mua kuamba ne: “Mvua musanke bikole bua kubala ngumu mimpe ya mudi malu mashintuluke.” Muyuki wenu wowu mujike kadi kuyi muyishe, kuteketshi mu mikolo to.
Wikale ne trakte anyi mikanda mikuabu iudi mua kupesha muntu udi uleja dijinga.

Tshinudi mua kuenza mu ngondo eu:

Lumingu luonso, ukebe bua kutuadija kuyukila ne muntu nansha umue muikale ne tshipatshila tshia kuyisha padi mpunga umueneka.