Tulondakajayi dijinga disonsola dia kumanya bia bungi

¹ Patudi tuamba lumu luimpe ku nzubu ne ku nzubu, dîba dia kuyukidilangana ne eu udi musankididi wa mukenji ndikese. Misangu mivule, mudimu wa bulongeshi menemene udi wenzeka patudi tuenza makumbula mapiamapia ne tulombola malonga a Bible. (Mat. 28:19, 20) Bua kulongesha bimpe patudi tuenza dikumbula dipiadipia, tudi ne bua kuvuluka bualu butuvua bayukile musangu mushale, ne pashishe kudilongolola mu mushindu wa kutungunuka ne muyuki.

² Binuikale bakule pa dinyanguka dia nsombelu wa mu dîku, udi mua kutumika ne mianda ya mu nshapita wa 29 wa mukanda wa “Kuikala ne muoyo wa kashidi” ne pashishe kuamba ne:

◼ “Musangu mushale, tuvua bamona ne: mbimpe kulonda mibelu ya mu Bible bua kuikala ne nsombelu wa disanka mu dîku. Buebe wewe, ntshinyi tshidi mua kusanga mêku lelu’eu?” Lekela muntu andamune. Umuleje tshikoso tshia 27 mu dibeji dia 247 ne pashishe nubale Kolosai 3:12-14. Sakidila mêyi makese adi aleja ne: dinanga dilelela didi mua kusanga mêku. Umvuija ne: dilonga dia ku musangu ne ku musangu dia mukanda wa Kuikala na muoyo wa kashidi didi mua kumuambuluisha bua kujikija ntatu yende.

³ Binuikale bakule musangu mushale pa dinyanguka dia nsombelu pa buloba bujima, udi mua kutungunuka ne muyuki nenku:

◼ “Ndi mujadike se: newanyishe bua se: mashintuluka manene adi akengedibua bituikala basue kuikala mu ditalala dituku kampanda. Bible udi uleja ne: Satana ke mpokolo munene wa ntatu yetu. Ba bungi badi badiebeja tshidi Nzambi mulekeele nsombelu eu mutantshi mule nenku. Udi wela meji kayi pa bualu ebu?” Mulekela andamune. Bulula mukanda wa Kuikala ne muoyo wa kashidi mu mabeji 20 ne 21, tshikoso tshia 14 ne tshia 15, umvuija bua tshinyi Satana kêna muanji kubutudibua. Pashishe bala Lomo 16:20 mudibu baleje tshitudi mua kutekemena mu matuku atshilualua.

⁴ Panuikala bakule pa masanka atutuadila bukokeshi bua Bukalenge, mu dikumbula dipiadipia udi mua kuamba ne:

◼ “Bukalenge bua Nzambi nebupeteshe buloba ne bukua-bantu masanka a mpatshi. Masanka aa mmaleja bimpe mu mukanda eu, mu dibeji dia 12 ne dia 13. Ntshinyi tshidi tshikusankisha pa tshimfuanyi etshi? [Mulekela andamune.] Anji kuela meji mudi nsombelu mua kuikala mu bulongolodi bua mushindu’eu!” Bala tshikoso tshia 12. Pikala muntu eu uleja dijinga dia kumanya bia bungi, ela lukonko lua tshikoso tshia 13 ne pashishe nuyukile pa diandamuna. Umvuija ne: nshapita eu udi wandamuna ku nkonko mikuabu idi itangila masanka atuala Bukalenge, kabidi ne: netusanke bua kuyukidilangana nende musangu udi ulonda pa nkonko eyi.

⁵ Nudi mua kutuadija dilonga dia Bible pa kuamba ne:

◼ “Ku diambuluisha dia mukanda eu, bantu ba bungi mbapete mandamuna ku nkonko ivuabu badiebeja.” Bulula mukanda mu tshikebelu, ne ebeja ne: “Ntshiena-bualu kayi tshidi tshipita kukusankisha?” Mulekela andamune, ubulule mu nshapita udi mumusankishe ne nubale tshikoso tshia kumpala. Umumvuije ne: nkonko idi kuinshi kua dibeji idi ipatula patoke ngenyi ya mushinga idi mu tshikoso tshionso. Umuleje nanku pa kukonkonona tshikoso tshikuabu tshimue anyi bibidi, pashishe umvuanganayi bua wewe kualukila musangu mukuabu.

⁶ Mu dilondakaja dijinga dia kumanya bia bungi bua mukanda wa Kuikala ne muoyo wa kashidi, netuleje ne: tudi ne dijinga dia kukumbaja menemene mudimu wetu wa Nzambi. (2 Tim. 4:5) Tudi mua kuambuluisha badi batuteleja bua kupetabu muoyo wa kashidi.—Yone 17:3.