Tulejayi mu mushindu muimpe mukanda wa Kuikala ne muoyo wa kashidi
1 Yezu uvua mupiluke mu ditumika ne mbuelelu. Uvua mumanye tshidi tshikengela kuamba bua kujula dijinga dia kumanya bia bungi dia bamuteleji. Dimue dituku wakabuela mu diyukidilangana ne mukaji wa mu Samariya anu pa kumulomba mâyi a kunua. Bualu ebu buakakoka ntema ya mukaji au bualu ‘bena Yuda kabavua ne malanda ne bena Samariya to.’ Muyuki wakalonda pashishe wakambuluisha mukaji au pamue ne bantu bakuabu ba bungi bua kuluabu bena kuitabuja. (Yone 4:7-9, 41) Tudi mua kulongela bia bungi ku tshilejilu tshia Yezu.
2 Patudi tudilongolola bua kuleja mukanda wa Kuikala ne muoyo wa kashidi, tudiebeje nenku: ‘Mmalu kayi adi mpindieu apita kutonda bantu mu teritware wetu? Ntshiena-bualu kayi tshidi mua kukoka ntema ya mupiankunde, muntu mukulakaje, bena dibaka balume anyi bakaji? ’ Tudi mua kulongolola mbuelelu ya bungi ne kutumika ne eyi idi imueneka miakanyine pa tshikondo.
3 Bu mudi dinyanguka dia nsombelu wa mu dîku dipita kutonda bantu ba bungi, tudi mua kuamba nenku:
◼ “Disumpakana mu nsombelu wa matuku wonso didi diteka mêku mu matetshibua makole. Nkuepi kudiwu mua kupeta diambuluisha? [Lekela muntu andamune.] Bible udi bulelela mua kutuambuluisha. [Bala 2 Timote 3:16, 17.] Mifundu idi ifila mêyi-malombodi mempe adi mua kuambuluisha mêku bua kutantamena disumpakana. Tangila tshidi mukanda eu umvuija, Udi mua kuikala ne muoyo wa kashidi pa buloba bukudimuna mparadizu, mu tshikoso 3 tshia dibeji dia 238.” Tubale tshikoso 3 ne pashishe tufile mukanda.
4 Tuetu tuakula pa bualu butshidi pa ndimi ya bantu, tudi mua kuamba nenku:
◼ “Uvuaku muteleje ngumu idi itangila [kutela bualu budi bukoka ntema ya bantu mu teritware]? Udi wela meji kayi? [Mulekele andamune.] Bantu badi badiebeja kuyaya buloba ebu pa kumona malu aa, ki mmuomu’anyi? Bible wakadianjila kumanyisha se: malu a mushindu’eu neikale tshimanyinu tshia se: tukadi mu matuku a ku nshikidilu.” Pashishe tudi mua kuleja tshidi mukanda wa Kuikala ne muoyo wa kashidi wamba mu mabeji 150-3.
5 Bantu ba bungi badi banyingalala pa kumona divulangana dia buntomboji. Tudi mua kutumika ne mbuelelu wa kumpala muinshi mua katshiena-bualu ka “Crime/Sécurité”, mu dibeji dia 11 dia mukanda wa “Comment raisonner”:
◼ “Tudi tuyukidilangana ne bantu pa dipangika dia dikubibua. Dibunda dia bibawu divule didi dienzeka mu misoko yetu, matuku wonso ne ke bidi bitunyangila nsombelu. Udiku wela meji se: newikale mua kuenda mu njila butuku mu ditalala dionso anyi?” Tudi mua kubala Musambu wa 37:10, 11 ne kuela kashonyi pa masanka atutuadila Bukalenge bua Nzambi ne kutumika ne mabeji a 156-8 a mukanda wa Kuikala ne muoyo wa kashidi.
6 Tuetu basungule mbuelelu mupepele kupita, tudi mua kutumika ne umue mufuane muibidi muinshi mua katshiena-bualu ka “Avenir/Sécurité,” mu dibeji 10 dia mukanda wa “Comment raisonner”:
◼ “Tudi tukankamija bena mutumba netu bua kukonkonona nsombelu wa mpatshi utshilualua udi Bible mutulaye. [Bala Buakabuluibua 21:3, 4.] Ditekemena dia mushindu’eu didi dikusankisha anyi? [Mulekele andamune.] Nshapita wa 19 mu mukanda eu udi uleja masanka makuabu alua Bukalenge bua Nzambi kupetesha bantu bena butumike.” Pikala muntu eu muleje dijinga dia kumanya bia bungi, tumuleje mukanda wa Kuikala ne muoyo wa kashidi.
7 Dilongolola dia mbuelelu muimpe nedituambuluishe bua kupeta aba badi ne nzala ya buakane.—Mat. 5:6.