Tuangatayi bantu netu ne mushinga— Tshitupa tshibidi

¹ Mu mishindu yonso, tudi tujinga kulama malanda mimpe ne bena mutumba mu kartié ketu. Bua nanku tudi ne bua kunemeka bidi bu biabu ne ngenyi yabu ya munda.

² Bantemu ba Yehowa mbamanyike bua ngikadilu wabu wa tshitembu. Bukalanga buetu mu nsombelu ne bena mutumba, mu kalasa, ku mudimu ne mu mpuilu yetu, budi butueleshisha ka-lumbandi kudi bantu.—Tangila Tshibumba tshia Nsentedi No. 6/89, dibeji dia 27.

³ Kabiyi mpata, nsombelu mulenga mmukonge malu mashilangane bu mudi bululame, tshisumi ku mudimu ne nsombelu wa tshitembu. Udi utangila kabidi kanemu kudi bena mutumba ne Nzubu wa Bukalenge. Nsombelu wetu wa kanemu kuondoke bua Nzambi udi mua kutundubila mu malu makuabu bituikala tulengulula bua kuangata bena mutumba netu ne mushinga. Paulo mmutukankamije bua ‘kuikala ne nsombelu muakanyine lumu luimpe.’—Fil. 1:27.

⁴ Ku musangu ne ku musangu, bena mutumba ne imue Nzubu yetu ya Bukalenge badi badiabakena padibu bamona dipanga kuangatshibua ne mushinga dia babuedi ba mu bisangilu. Bana betu ba balume ne ba bakaji kabena ne bua kudikunguija kumpala kua Nzubu wa Bukalenge ne kulepesha miyuki yabu ne mêyi adi mua kumvuika mu nzubu ya bena mutumba. Katuena ne bua kulekelela bana babuela ne bapatuka mu Nzubu wa Bukalenge pa kunyemakana nansha. Kuenza nanku kudi kupendeshisha tshisumbu. Bidi bikengedibua kunemeka tumanyinu ne mikenji yonso ya bukubi ne kuikala ne mikanda ya bumuntu patudi tuendakana mu kartié.—Lomo 13:1, 2, 5.

⁵ Bible udi utukankamija bua ‘kuenza malu wonso bua butumbi bua Nzambi,’ ebi bidi bisua kumvuija ne: tuangate badi batutangila ne mushinga. (1 Kol. 10:31-33) Bituikala ‘tutabalela kabidi malu adi bua disanka dia bakuabu,’ katuakubuela ne bupungakane mu lupangu lua bende nansha. (Fil. 2:4) Netuenze kabidi madikolela bua kubenga kutamuna bena mutumba mu kartié.

⁶ Kuangata kuetu kua bantu netu ne mushinga, munda ne pambelu pa tshisumbu, kudi kuleja tshitudi natshi mu mutshima. Bitudi tuamba ne tuenza bidi ne bua kujadika ne: ‘tudi banange muntu netu mutudi badinange tuetu bine.’—Mat. 7:12; 22:39.