Kampanda udiku dijinga ne diambuluisha anyi?
1 Yehowa mmulejibue kutudi bu Mutuambuluishi ne Tshisokomenu. Eyowa, tudi bamanya se: tudi mua kumubikila bua kutuambuluisha ne yeye udi utusungila. (Mus. wa 18:2; 46:1) Netuidikije bienzedi bia Yehowa bia luse pa kukuatshisha aba badi bakengela diambuluisha.
2 Ntshinyi tshidi ne bua kutusaka bua kuenza nunku? Bantu bavule batu batshinka ne: kuambuluisha muntu nkuleja dinanga ne diditatshisha bua bakuabu. Bible udi uleja kakuyi ntupakanyi se: tudi ne bua kuikala ne lungenyi elu. (Lomo 15:1) Mupostolo Paulo udi utukankamija ne: ‘katukebi bidi bitulengelela tuetu bine, kadi, tuele meji ku bidi bilengelela bakuabo.’—Fil. 2:4, Mukanda wa Mvidi Mukulu.
3 Disanka didi dipeteka mu dienza nunku didi dia bantu buonso. (Bienz. 20:35) Ku mêsu kua mupostolo Paulo, nsonga Timote uvua tshilejilu tshia pa buatshi mu ‘ditangila ne muoyo mujima malu a’ bana babu. (Fil. 2:20) Bidi disanka pa kumona lelu eu bansonga ba bungi bikale ne tshikadilu tshia muomumue mu tshisumbu! Kadi, nansha bituikala bansonga anyi katuyi, tudi buonso mua kuenza bualu kampanda patudi tumona se: kudi muntu udi ukengela diambuluisha.
4 Tukadiku badijikile tuela meji se: kudi mushindu wa kuenza bipitshidile bua kukuatshisha bamue bena mu tshisumbu anyi? Muanetu kampanda wa balume anyi wa bakaji údí mu lupitadi udi upeta anu makumbula mashadile anyi? Umue wa ku bana betu kêna kabidi ne mushindu wa kuenda, kayi ne muntu wa kumuambuluisha pa kuya kumusumbila bintu peshi pa kumuenzela midimu ya ku nzubu anyi? Ku mêsu kua Yezu, basadidi ba Yehowa badi dîku dia bambuluishanganyi. (Mâko 3:33-35) Mu mufuanu wa mikoko ne bibujibuji, wakamba ne: aba badi ku dia balume dia Mukalenge, mumue ne: badi banyishibue kudiye, mbadi bambuluisha bana babu.—Mat. 25:40.
5 Mushindu wa kufila diebe diambuluisha: Tshitudi mua kuenza ntshinyi padi muntu umueneka ukengela diambuluisha? Bua tshinyi kubenga kuangata dipangadika dia kumuenzela bualu budi mua kumusankisha? Imue misangu bana betu ba balume ne ba bakaji bakadi bakulakaje badi bakengela dikankamijibua, kadi kabayi ne wa kubakuatshisha, peshi kudi nsonga muena nkristo udi ukengela diambuluisha. Bena dibaka badi batuadijileku kulonga bulelela kutshidi matuku makese badi mua kulua mu Nzubu wa Bukalenge ne bana babo kadi mumanyishi mubalombodi mu dilonga dia Bible kayi muikaleku. Bena dibaka aba badi mua kuanyisha ne: muntu kampanda adilongolole bua kubambuluisha bua kutabalela bana babu.
6 Bu mudi dinanga dietu dia bulelela ne dia bulongolodi bua Yehowa dienda dikola, dinanga dia bana betu mu tshisumbu didi divula ne tudi tuditatshisha buabu. Mupostolo Paulo udi utukankamija bua tuetu kualabala pa bualu ebu. (2 Kol. 6:11-13) Yezu wakela kashionyi pa bualu ebu se: ku dinanga dituikala banangangane umue ne mukuabo ke kutualeja bushuwa se: tudi bayidi bende.—Yone 13:35.
7 Nenku, patudi tumona se: muntu kampanda udi ukengela diambuluisha, dinanga dia muoyo mujima ditudi tuleja kudi bana betu ne mu tshisumbu mu kabujima neditusaka bua kuangata mapangadika ne kutuala diambuluisha dietu mu mishindu mishilashilangane. (Gal. 6:9, 10) Pa kutabalelangana umue ne mukuabu mushindu’eu, tudi tushindika dinanga munkatshi muetu ne tukolesha buobumue buetu. (1 Kol. 10:24) Eyowa, netuenze tshietu tshitupa mu diambuluisha bena mu tshisumbu kabukabu.