Tusekelelanganayi mu bisangilu
1 Yezu Kristo, Tshitembelu tshietu, uvua wakidilangana bimpe. Ne muoyo mulenga, wakenza dibikila edi: “Vuayi kundi meme, nuenu bonso badi bakenga, bazengele ne bujitu, meme nennukankamike.” (Mat. 11:28, MMM) Eyowa, Yezu Kristo uvua mpokolo wa dikankamija bua buonso bavua balua kudiye. Nansha bena mpekato bamanyike bavua bakokibua kudiye. Muyuki udi mu Markuse 2:15 (MMM), udi ulonda ne: “Pavua Yezu ku mesa mu nzubu mua Levi, balambuishi ba bitadi ba bungi ne bena mibi bavua kabidi nende ku mesa aku, pamue ne balongi bende, bualu bantu ba bungi bavua bamulonda.”—Tangila kabidi Luka 7:36-38.
2 Mu Lomo 15:7 (NW) tudi tusangana mubelu eu: “Nanku nuakidilangane bu muvua Kristo mutuakidile, bua butumbi bua Nzambi.” Amu bu Yezu, patudi tuakidila mu tshisumbu aba buonso badi bakebulula bulelela, kabiyi kutangila tshisa tshiabo, ntendelelu wabo, nsombelu wabo anyi dimanya diabo dia mukanda, tudi tutumbisha Nzambi. Tudi tupesha batudi tuakidila mmuenenu mujalame pa bidi bitangila Yehowa Nzambi.
3 Amu bu Yezu, tudi basue kusekelela ne musangelu bantu badi balua bua musangu wa kumpala ku Nzubu wa Bukalenge ne batukumbudi betu. Bikadi bikufikile bua kuebeja mumanyishi mukuabo ne: “Eu nnganyi? Udi pende Ntemu anyi?” Kabienaku bimpe bua kusemena kudiye ne kumuebeja anyi? Abi kabiena bikole bituavuluka se: tshidi ne mushinga ntshia kusankidila muntu netu.—Bienz. 20:35.
4 Mushindu wa kuleja disankidila bua bapiabapia: Udimanyishe, pashishe wele muenyi imue nkonko ya dileja dinanga: Udi musombela kuepi? Ukadiku mulue ku Nzubu wa Bukalenge anyi? Udi mulueku bishi? Pa kusankidila bapiabapia nunku, bana betu ba balume ne ba bakaji bakapeta munkatshi mua bateleji ku Nzubu wa Bukalenge, bantu bavua kabayi banji kulonga Bible, ne bakatuadija nabo malonga a Bible.
5 Bituapetesha bapiabapia mushindu wa kuakula, nebadiumvue bakidibue bimpe ne nebajingulule mutudi tuditatshisha buabo ne muoyo mujima. Tudi mua kubumvuija tshipatshila tshia bisangilu bietu bishilashilangane ne mushindu udibi bienzeka. Tuakule pa mushindu udi mikanda yetu ifundibua ne mutudi tuenza mudimu wetu. Dibasankidila dietu dilelela didi mua kubafikisha ku ditendelela Nzambi, pa kuamba ne: “Nzambi udi munkatshi muenu bulelela.”—1 Kol. 14:25, NW.
6 Bua ditamuka, bitu bikolela bamue bua kusemena kudi muenyi bua kumuakuisha. Kadi tuvuluke se: tudi ne bua kuidikija Kristo pa kuikala mpokolo wa dikankamija bua bakuabo. Bituasua bulelela kuidikija Kristo, Yehowa neatupeteshe dikuatshisha dia spiritu wende. Pabi, “Nzambi kêna mutupeshe spiritu wa buôwa, kadi spiritu wa bukole, wa dinanga ne wa mmuenenu muakane.” Eyowa, spiritu wa Nzambi udi mua kutupetesha bukole ne dinanga bua kudianjila kuela tshiidia bua kuyukila ne muenyi.—2 Tim. 1:7, NW.
7 Nunku, tuidikijayi Kristo pa kusekelela bimpe bapiabapia badi balua mu bisangilu bietu. Tubambuluishe bua badiumvue bimpe padibo munkatshi muetu. Pa kuenza nunku, netutumbishe Yehowa udi, ku butuangaji bua Muanende, wakidila buonso badi balua bua kumutendelela ku ‘mukuna wende wa tshijila.’—Yesh. 56:6, 7.