Tudi tutua mudimu wa Bukalenge nyama ku mikolo ne lulamatu anyi?

¹ Mu biena-bualu biatshi bia malonga, Tshibumba tshia Nsentedi tshia mu dia 1 Tshisua-munene 1994 tshiakatuvuluija majitu etu mu ntendelelu mukezuke wa Yehowa. Mbimueneke ku diyukidilangana edi ne: ntendelelu wa Yehowa ne mudimu wa Bukalenge bidi ne bua kutekibua pa muaba wa kumpala mu nsombelu wetu. Mbuena kuamba se: tudi ne bua kutua nyama ku mikolo ne lulamatu mudimu udibo batupeshe ne bionso bitudi nabi.

² Pa nanku bulongolodi bua Yehowa budi bumueneka mbuangate ndongoluelu yonso mikuatshishi bua kulubuluja ntendelelu pa buloba bujima. Mmushindu kayi utudi, muntu pa nkayende anyi tshisumbu tshijima, tulubuluja ndongoluelu eyi? Bana betu ba ku Filipoi bakatushila tshilejilu tshimpe tshitambe tshia kuidikija. Mmuomu, mupostolo Paulo wakabeela ka-lumbandi bua difila tshiabo tshitupa bua kulubuluja lumu luimpe, ne wakasakidila Nzambi bua bualu ebu. Kabavua amu badifilamu nkayabo, kadi bakambuluisha Paulo ne bintu bia ku mubidi ne pamu’apa bena nkristo bakuabo, ne pa kuenza nunku bakatua buambi bua lumu luimpe mpanda ne lulamatu. Bidi nanku buetu tuetu ne bua tshisumbu tshietu anyi?—Fil. 1:3-5; 4:16-18.

³ Mu teritware wetu, bana betu ba balume ne ba bakaji badi batumika ne lulamatu ku diibaka ne ku diakajilula nzubu ya filiale. Bamue ba kudibo mbafumine ku matunga a kule bua kulubuluja mudimu eu. Kukadi ngondo ibidi, Kalasa ka Dilongesha Mudimu nkunzulule biibi ne bana betu ba balume 26 ba mu kalasa ka kumpala bakadi batumibue ku miaba idibo ne bua kusadila. Bakuabo nebikale mua kutuadija ne nebafumine mu rejon ya bungi bua kulonda dilongesha ku Kinshasa. Bidi bilomba, anu mutudi mua kubijingulula, ditula mfranga ya bungi bua kufutshila balongi ne balongeshi njila, kubaladika ne kubadiisha.

⁴ Komité ya diumvuangana ne mpitadi idi ifuma ku dienjibua ne ikadi midiakaje bua kutuambuluisha patuikala mua kuakama lutatu lua diedibua mashi. Mudimu eu kawena wenzeka kabiyi ditula mfranga. Imue misangu mutangidi wa tshijengu tshietu neatulombe bua kuambuluisha ne imue mfranga. Netuandamune bishi? Netuambe ne: badi batulomba bipitshidile anyi? Anyi netujadike mutudi tuabanya diakalenga pa kuteka pa tshibidilu ku luseke tshimue tshitupa tshia bintu bietu bia ku mubidi ne tshipatshila tshia kutua ntendelelu mulelela nyama ku mikolo ne tshia kuambuluisha aba badi bakanyine? (Tangila 1 Kolinto 16:1, 2.) Malonga a ndekelu a Kalasa ka mudimu wa Bukalenge adi pawu enzeka bua dilongesha bakulu betu ne basadidi betu ba midimu, bua kumonabu mua kutabalela anyima yetu. Tuele kabidi meji ku malongolola ne dienzeka dia mpuilu yetu ya distrike “Basamunyi bena disanka.” Tudi basue kuenza muetu muonso bua kutua bisangilu ebi nyama ku mikolo pa kufila dîba dietu, makole etu ne mpetu yetu bua bienzeke bimpe.

⁵ Yehowa udi tshilejilu tshimpe tshitambe tshia kalolo tshidiku, bualu kêna mupeshe bantu anu “muoyo, mueyelu ne bintu bionso,” (Malu Menza 17:25, MMM) kadi wakafila Muanende umuepele bua diakalenga dietu ne udi utuvuija babanji bua mishindu yonso ya kalolo. Bu mudiye Mufuki, Yehowa udi ne bintu bionso. Pa nanku, muntu udi ufila dipa diende dia ku mubidi bua kutungunuja ntendelelu mulelela udi amu upingajila Nzambi tshitupa tshia bivuaye mupete kudiye ku ntuadijilu.—2 Kol. 9:10-15; Mus. wa 50:10; 1 Kul. 29:14.

⁶ Dikuatshisha dietu ne lulamatu dia mudimu kadiena dishikila amu ne bintu bia ku mubidi. Tudi mua kufila tshintu kampanda tshia mushinga mukole kupita kabidi dipa dia mfranga anyi dia tshintu tshia ku mubidi. Tudi tudipetesha disanka divule pa kufila dîba dietu ne makokeshi etu bua kuibaka bakuabo bantu mu lungenyi ne mu nyuma. Dipa dipite bunene didi mua kupeshibua kampanda ndia kumuambuluisha bua kumvua Dîyi dia Nzambi, bualu bidi mua kumufikisha ku muoyo wa kashidi. Pa kuikala ne bionso ebi mu lungenyi ke padi ndongoluelu mikuabo yonso eyi ituafumi ku ditela miangatshibue. Tukonkonone misangu yonso Tshibumba tshia Nsentedi tshia mu dia 1 Tshisua-munene 1994 ne tueleele meji pa mushindu utudi mua kutumikila muntu pa nkayende biditshi tshituvuluija bua kuenza. Nebituambuluishe bua kumona mushindu utudi tutua mudimu wa Bukalenge nyama ku mikolo, mu tshisumbu tshietu ne pa buloba bujima.—Yone 6:26, 27; 17:3; Bienz. 20:35; Buak. 22:17.