“Nuashala Batuishile Mêsu”
1 Pakamba Yezu mêyi adi mafunda mu Matayo 26:38-41, uvua pakupetangana ne ntatu mikole mitambe mu matuku a muoyo wende wa bu-muntu. Bivua ne bua kumueneka bia mushinga mukole mu miyuki ya bukua-bantu. Lupandu lua bukua-bantu buonso luvua lubuejibua mu tshilumbu. Bayidi ba Yezu bavua ne bua ‘kushala batuishila mêsu.’
2 Lelu’eu tudi pabuipi ne dilua dia Yezu bua kukumbaja mudimu wende udi ne bitupa bibidi bu musungidi ne mubutudi. Bu mutudi bena nkristo bakenketshi badi bamanye dipidila dia bikondo, katuena tujinga kuvunga maboko bua kuindila dipandishibua nansha. Tudi bamanye se: tudi ne bua kuikala dîba dionso badiakaje. Bidi bikengela ne: tutungunuke ne ‘kusadila bikole ne kutshinta’ mu mudimu wa Yehowa. (1 Tim. 4:10) Tudi mua kuamba tshinyi buetu tuetu muntu pa nkayende? Tudi tushala batuishile mêsu anyi?
3 Tudikonkonone: Yezu wakafila kabidi didimuija edi: “Nudilame nuenu bine.” (Luka 21:34, 35, NW) Tudi ne bua kuikala badimuke, ne bikale “bantu bakena kubandibua ne kabayi ne bualu . . . munkatshi mua tshipungu tshikonyangala ne tshia tshishiku.” (Fil. 2:15, NW) Tudi dituku dionso ne nsombelu wa Buena-nkristo, pa kuidikija tshilejilu tshia Yezu ne kulonda mêyi-maludiki a mu Dîyi dia Nzambi anyi? Tudi ne bua kulekela nsombelu kayi yonso ukena wa Buena-nkristo ne wa mu bulongolodi ebu “budi ku bukokeshi bua mubi.” (1 Yone 5:19, NW; Lomo 13:11-14) Patudi tudikonkonona ku diambuluisha dia Mifundu, tudi bushuwa batuishile mêsu bu muakatulomba Yezu anyi?
4 Bakulu badi ne bua kukumbaja ne tshisumi majitu abu mu tshisumbu, bamanye se: nebabadile Nzambi malu bua mushindu udibu bakuba tshisumbu. (Eb. 13:17) Bamfumu ba mêku badi ne bujitu bua pa buabu bua kulombola dîku mu njila ya Yehowa. (Gen. 18:19; Yosh. 24:15; tangila 1 Timote 3:4, 5.) Bidi kabidi ne mushinga bua tuetu buonso kulonda dîyi-dituma dia mu Bible dia se: tunangangane bamue ne bakuabo. Ntshimanyinu tshidi tshisunguluja Buena-nkristo bua bushuwa.—Yone 13:35.
5 Tutabalele bua kudimuija bantu netu: Kushala batuishile mêsu kudi kumvuija malu mavule, ki ng’amu kuikala badimuke nansha. Tudi bapeshibue mudimu wa kuenza bayidi. (Mat. 28:19, 20) Dinanga bua muntu netu didi ne bua kutusaka bua kumudimuija bua kupandukaye ku kabutu ka bulongolodi ebu. Bujitu ebu mbuambika muena nkristo yonso. Ntshitupa tshia mushinga tshia ntendelelu wetu. (Lomo 10:9, 10; 1 Kol. 9:16) Misangu mivule tudi tupetangana ne kalèngù peshi buluishi bua patoke patudi tuenza mudimu eu wa muoyo. Tudi ne bua kutungunuka nansha bikala bantu bavule kabayi bangata didimuija dietu ne mushinga. (Yehez. 33:8, 9) Dinanga dilelela bua Nzambi ne bua muntu netu neditusake bua kunanukila.
6 Ki ntshikondo tshia kudiumvua bakumbane nansha. Katuena ne bua kulekelela disumpakana dia mu nsombelu wa matuku wonso ditubueja mu ditanaji peshi didifila mu masanka a bulongolodi ebu difika ku dikala buteyi nansha. (Luka 21:34, 35) Lelu’eu ke tshikondo tshipita bikuabu tshia kuikala bamanye se: tudi mu matuku a malu makole. Tshikondo tshialua Yezu kukumbaja dilumbuluisha pa ndongoluelu eu mubi wa malu tshikadi tshisemena. Anu aba badi batabale, badimuke ne batuishile mêsu ke bapanduka. Bituatumikila mêyi-mashidimunyi a Yezu ne ‘kupanduka mu malu aa wonso alua,’ kabiyi mpata netuleje dianyisha dietu kudi Yehowa.—Luka 21:36.