Mavuluija A Yehowa Adiku Atusonsola Mu Nyuma Anyi?
1 Mu musambu wa disamuna Yehowa, mufundi wa misambu kampanda wakamba ne: “Mavuluija ebe adi kuditatshisha kuanyi.” (Mus. wa 119:99, NW) Muaku wa tshiena-Ebelu mukudimuna “mavuluija” udi umvuija ne: Yehowa udi utuvuluija tshidi mikenji yende yamba, mêyi-mapangadija, mêyi-makaji ne mêyi-matuma biende. Bituabiangata ne mushinga, nebitusonsole mu nyuma ne nebituvuije bena disanka.—Mus. wa 119:2.
2 Bu mutudi bena tshisamba tshia Yehowa, tudi tupeta mibelu ku musangu ku musangu; tukadi mene bumvue mivule ya kudiyo. Nansha mutudi tuanyisha makankamija bu nunku, tudi pa tshibidilu tuapua muoyo. (Yak. 1:25) Yehowa udi utupesha ne lutulu mavuluija a dinanga. Mupostolo Petelo mmumanyishe amue ne tshipatshila tshia ‘kutabuluja makokeshi etu a diela meji, bua tuetu kuvuluka mikenji ya Mukalenge.’—2 Pet. 3:1, 2, NW.
3 Badi batuvuluija misangu yonso bua mushinga wa dilonga dia muntu pa nkayende ne ditantshila dia bisangilu. Bualu kuenza nunku kudi ne mushinga bua kulama bukole buetu bua mu nyuma.—1 Tim. 4:15; Eb. 10:24, 25.
4 Kùdì bamue, lutatu lunene nkukumbaja mudimu wabu wa Buena-nkristo wa buambi. Bidi bilomba madikolela, muoyo mukole ne dinanukila. Nansha mudiku kulomba bivule kutudi, kuikala ‘bavuadika makasa ne bia mudimu bia lumu luimpe’ nekutuambuluishe bua ‘kuimana bashindame.’—Ef. 6:14, 15.
5 Kusadila kuetu kakuena amu ne bua kuikala kusakibue kudi dimanya dia malu-malomba a Yehowa. Mupostolo Paulo udi utuvuluija ne: mutshima ke udi ufila kenzela katudi tukengela bua ‘kujukula ne mukana bua kupeta lupandu.’ (Lomo 10:10) Bituikala ne ditabuja dikole ne batangije mutshima wetu ku mavuluija a Yehowa, netuikale mua kumanyisha ne kusamuna dîna diende.—Mus. wa 119:36; Mat. 12:34.
6 Patudi tuditatshisha bua kukumbaja midimu mimpe, tudi bushuwa tutekemena kupetelaku disanka. (Muambi 2:10) Paulo udi ubikila disanka ne: dimuma dia spiritu wa Yehowa, ne tudi ne bua kukeba mua kudiundisha tshikadilu etshi. (Gal. 5:22) Petelo wakasakidila ne: “disuminyina dionso” nedifutshibue ne mudimu mupatudi wa bipeta bilenga, ke tshidi tshipetesha disanka.—2 Pet. 1:5-8.
7 Bituapetangana ne ntatu, tuvuluke dimana tendee dia bapostolo, bakamba ne: “Katuena mua kulekela kumanyisha bitudi bamone ne bumvue.” (Malu 4:20, MMM) Tudi bakoleshibue ku muoyo patudi tuvuluka ne: ‘patuenza nunku, netudisungile tuetu ne badi bumvua mêyi etu.’—1 Tim. 4:16.
8 Katuena tufiika munda peshi tuteka njiya bualu tudi dîba dionso tupeta mavuluija. Bishilangane, tudi bamanye mushinga wawu mulengele. (Mus. wa 119:129) Mu tshikondo etshi tshikole, tudi ne dianyisha kudi Yehowa bualu udi utungunuka ne kutupesha mavuluija adi atusonsola mu nyuma ne atusaka bua kuikala ne mitalu bua midimu milenga.—2 Pet. 1:12, 13.