Tulondayi dijinga dia kumanya bivule dijula kudi trakte ya Ngumu ya Bukalenge No. 34
1 Makumbula mapiamapia menza mushindu muimpe adi apetesha dikola dia muntu. Ditabuja diende didi dikola ku kakese ku kakese. Nngenyi kayi mikuatshishi idi mimpe bua kulama mu tshieledi tshia lungenyi patudi tupingana bua kukumbula bantu bavua baleje dijinga dia kumanya bivule bua trakte wa Ngumu ya Bukalenge No. 34?
2 Kutuadija mu dia 24 Tshisanga 1995, bamanyishi ba Bukalenge pamue ne miliyo itanu babanya mu bisumbu pamue ne 75 000, mbadifile pa buloba bujima mu kampanye ka pa buaku bua kuabanya trakte wa Ngumu ya Bukalenge No. 34. Kampanye aka nekatungunuke too ne pajika stoke udi nende tshisumbu tshionso. Bidi bikengela bua tuetu kupingana bua kukumbula bantu batuvua bapeshe trakte eu.
3 Mu dikumbula dipiadipia, udi mua kuleja muntu eu ne: mukenji udi mu trakte eu ng’wa matuku etu aa. Teleja bimpe padiye ukulondela mudiye mumone pa bikalaye mubale. Neumanye nunku tshiena-bualu tshia kuyukila nende musangu ulualua. Padi muntu wandamuna bimpe mu dikumbula dipiadipia, udi mua kutuadija nende dilonga dia Bible. (1 Kol. 3:6, 7) Nsapi wa dilubuluka udi amu dileja dipepele ne dilongolola bimpe.
4 Udi mua kuamba tshinyi mu dikumbula dipiadipia? Udi mua kuamba nunku: “Udi muvuluke kabiyi mpata trakte umvua mukushile musangu mushale. Ngela meji se: udi mupete mushindu wa kumubala ne kuela meji pa mukenji wende. Kuena welaku meji ne: mukenji wende ng’wa matuku etu aa ne mmukutangile pebe anyi? [Lekela muntu andamune.] Tuanji kukonkonona pamue imue ngenyi ya mu trakte eu idi itangila matuku atshilualua a mpatshi adi Nzambi mulamine bukua-bantu.” Pashishe, udi mua kukonkonona tshikoso tshimue anyi bibidi biakanyine, ne kulomba dilonga dia Bible ne muntu eu. Biapangaye kuleja disankidila, udi mua kumuleja nimero mipiamipia ya Tshibumba tshia Nsentedi anyi ya Réveillez-vous!.
5 Anu Bukalenge bua Nzambi nkayabu ke buakumbana muaba udi muntu mupangile. Tudi ne bua kuteka dieyemena dietu dionso ku Bukalenge ebu. Bituadije mpindieu, tuambuluishe bakuabu bua kupeta dimanya dijalame dia Dîyi dia Nzambi ku diambuluisha dia dilonga dia Bible ku mbelu. Tulombe muntu yonso bua kulonga Bible, bua kudisanga ku Nsangilu wa bulongolodi bupiabupia, bua kudilambula kudi Yehowa ne bua kumanyisha dîna diende. Muoyo mu matuku atshilualua bua muntu yonso mmusuikakajaku. Katulekeledi dikebulula dia bintu bia ku mubidi anyi tunyinganyinga tua mu nsombelu bua bitubudishe muoyo wa bushuwa udi Nzambi ukeba kutupesha.—Luka 21:34-36; 1 Tim. 6:19.
6 Mu katupa kîpi emu, Yehowa neumbushe makenga wonso adi azengeja bantu pa buloba. Buobu aba nebikale mu ditalala mu nsombelu ya mu mparadizu. Nebikale ne makanda a mubidi mapuangane ne nebasanke bua biakudia bivule ne bishilashilangane. Ntshikondo kayipu tshia mpatshi! Kuena ujingaku mua kupeta masanka a tshikondo atshi anyi? Bidi nanku.
7 Nunku, tuenzayi madikolela bua kutumika ne ngenyi idi mitupesha. Tubabidile dikala pamue ne bamanyishi bapiluke. Disanka dietu nedivule bituibakila pa dijinga dia kumanya bivule dia ku ntuadijilu pa kuenza makumbula mapiamapia mimpe ne pa kulombola malonga a Bible. Buonso buetu tusamune Yehowa bua dilongolola diende ditambe buimpe bua bukua-bantu.—Mus. wa 150:6.