Tutumikayi bimpe ne mikanda ya kale
1 Yehowa udi utupetesha biakudia bivule bia mu nyuma bia nsongo. Mu kupita kua bidimu, tshitupa tshinene tshia biakudia ebi mbipeteke mu mushindu wa mikanda ya mabeji 192. Mu Kashipu, netufile mukanda kayi wonso wa mabeji 192 mupatula kumpala kua 1982. Tudi ne imue itshidi mimpe anyi? Tshisumbu tshidi nayi mu stoke anyi? Né bidi nanku, nebikale bimpe bua kuyibala tshiakabidi ne kusungula ngenyi ituikala mua kutumika nayi mu maleja etu.
2 Paudi uleja mukanda wa “Que ton royaume vienne!,” udi mua kutuadija diyukidilangana ne miaku eyi:
◼ “Kukadi kupite bidimu pamue ne 2 000 bidi bena nkristo basambila bua dilua dia Bukalenge bua Nzambi. Buebe wewe, Bukalenge ebu nebuenzele bantu tshinyi? [Lekela muntu andamune. Bulula mukanda mu dibeji dia 25 ne leja kazubu kadi kazangika amue mabenesha alua tshintu tshilelela muinshi mua bukokeshi bua Bukalenge.] Mukanda eu udi wakula pa bialua Bukalenge kukumbaja, ne udi umvuija mushindu uudi wewe pamue ne dîku diebe mua kupeta mabenesha aa. Biwasua kuubala, nensanke bua kukushila mukanda umue.”
3 Paudi uleja mukanda wa “Le bonheur — Comment le trouver? ” udi mua kuamba nunku:
◼ “Kudi ntatu ya bungi mu bulongolodi bua mpindieu pa nanku bantu ba bungi badi batata bua kupeta diakalenga. Udi wela meji se: kudi mushindu wa kuikala ne diakalenga nansha mudiku nsombelu ya mpindieu anyi? [Lekela muntu andamune. Bulula mukanda mu dibeji 40, ne wakule pa imue ntatu idi mua kutukuatshisha buôwa.] Bible udi utuleja mushindu wa kutantamena nsombelu eyi ne kupeta ndekelu wa bionso diakalenga dia kashidi mu bulongolodi bupiabupia bua ditalala. [Bulula mukanda mu dibeji dia 191, ne bala Yeshaya 32:17, 18.] Bible udi ufila mibelu mijalame idi mua kutuambuluisha bua kusanka bikole mu nsombelu wetu. Mukanda eu udi ukonkonona imue ya ku mibelu eyi ne udi umvuija mushindu wa kuyitumikila.”
4 Paudi utumika ne mukanda wa “La paix et la sécurité véritables: comment est-ce possible?,” neusue pamu’apa kuteta mbuelelu eu:
◼ “Bantu buonso mbasue kuikala mu bulongolodi mudi ditalala ne dikubibua bilelela biase. Diakabi, katshia katuena banji kuikala mu nsombelu ya mushindu’eu. Buebe wewe, bidi bikengela tshinyi bua ditalala ne dikubibua bilelela kumuekabi bushuwa? [Lekela muntu andamune.] Nzambi udi ne bukole budi bukengela bua kuteka ditalala pa buloba, ne mmulaye bua kuenza nunku.” Leja tshimfuanyi mu dibeji dia 98, ne pashishe ubala Mika 4:3, 4. Pikala muntu muleje disankidila, umupeshe mumvuija a pa mutu pa ditekemena dia Bukalenge. Umuleje mukanda, ne udilongolole bua kuenza dikumbula dipiadipia.
5 Neusungule pamu’apa bua kutumika ne broshire wa “Dieu se soucie-t-il vraiment de nous? ” Apu, udi mua kuamba ne:
◼ “Bavule badi badiebeja bua tshinyi Nzambi mmulekelele makenga bungi nunku. Bu mudiye wa-bukole-buonso, bua tshinyi kêna wenza tshintu nansha tshimue bua kujikija dikenga dietu? Udi wela meji kayi? [Lekela muntu andamune.] Bible udi utupesha dishindika dia se: Nzambi kêna mutulekele nansha.” Bulula broshire mu dibeji dia 27, tshikoso tshia 22, ne bala Musambu wa 37:11, 29. Koka ntema yende pa tshimfuanyi tshilenga tshidi tshileja bitudi mua kuindila bua matuku atshilualua. Pikala muntu muanyishe broshire, tumulombe bua kupingana bua kuleja mushindu udiye mua kutumika nende bua kulonga Bible.
6 Mikanda yetu mmifikishe binunu bia bantu ku dikonkonona Bible mu buondoke. Bidibu balonge mbibatuadile ditekemena dia matuku atshilualua a disanka. (Mus. wa 146:5) Tudi ne diese dia kubambuluisha.