Tulejayi se: tudi tuditatshisha bua bakuabu pa kuenza makumbula mapiamapia
1 Tudi tuleja dijinga dietu dia kupetesha bantu netu mushindu wa kumvua mukenji wa Bukalenge pa kukebulula ku nzubu ne ku nzubu bantu badi ne dijinga dia kumanya bia bungi. Nunku, tutabalele bua kupinganyina bantu batuvua bashile mikanda mu Kabalashipu, bualu bidi mushindu muimpe mutambe wa kuleja se: tudi tuditatshisha bua bakuabu.
2 Né uvua mushiye mukanda wa “Que ton royaume vienne!,” udi mua kutuadija diyukidilangana mushindu’eu:
◼ “Musangu mushale utuvua bamonangane, tuvua bakule pa Bukalenge bua Nzambi ne pa biakumbajabu buetu. Bukalenge ebu bukadi pa kukudimuna buloba mparadizu. Bu mutudi katshia katuyi banji kumona mparadizu, bidi mua kutukolela bua kufuikakaja umue. Mona mudiye mua kuikala. [Leja tshimfuanyi tshia mu mabeji 4 ne 5.] Eu ke mparadizu udi mumanyisha mu Bible.” Bala Musambu wa 72:7. Padi muntu uleja dijinga dia kumanya bivule, bulula mukanda mu dibeji dia 175, mu bikoso 3 ne 4, ne zangika bitudi ne bua kuenza bituasua kuikala ne muoyo mu Mparadizu utshilualua.
3 Mona tshiudi mua kuenza biwikala mushiye mukanda wa “Bonheur”:
◼ “Tudi basue tuetu buonso kuikala ne diakalenga. Bavule mbamone se: kabiena mua kuenzeka bua kupeta diakalenga dilelela mu bulongolodi bua mpindieu ebu. Udi wela meji kayi? [Lekela muntu andamune.] Batu bamba ne: diakalenga nngikadilu wa mu tshieledi tshia lungenyi. Bikala tshieledi tshietu tshia lungenyi tshiûle tente ne dinanga bua bakuabu, ne kanemu bua Nzambi kabidi ne ditekemena dilelela bua matuku atshilualua, tudi bushuwa mua kuikala ne diakalenga nansha kuikale ntatu.” Bala Musambu wa 119:1, 2. Umvuija ne: dilonga dia Bible didi dituleja mua kunanga muntu netu, mua kunemeka Nzambi ne mua kujingulula ditekemena didi dikankamija bua matuku atshilualua.
4 Né uvua mushiye mukanda wa “La paix et la sécurité véritables: comment est-ce possible?,” udi mua kuamba mu mêyi makese ne:
◼ “Balombodi ba bulongolodi ebu mbapangile mpindieu bua kutuala ditalala ne dikubibua ebi. Amu Yehowa Nzambi nkayende ke udi ne bukokeshi. Bible udi utumvuija tshitudi ne bua kuenza. [Nuyukidile pa ngenyi ya mu bikoso 1 ne 2 mu dibeji dia 175, pashishe ubale Yeshaya 26:4.] Ndi musue kukuleja mushindu udi mukanda eu mua kukuambuluisha.”
5 Kudi muntu uuvua mushile broshire wa “Dieu se soucie-t-il vraiment de nous?,” udi mua kuamba ne:
◼ “Musangu mushale, mvua mukushile broshire umue udi ujula lukonko elu lua mushinga: ‘Nzambi udi bushuwa uditatshisha buetu anyi?’ Kunyima kua dimubala, udi mufike ku nkomenu kayi? [Lekela muntu andamune.] Uvua pamu’apa mukankamijibue ku dibala dia mvese idi imanyisha bulongolodi bupiabupia bua mparadizu, mutuikala ne ditalala. [Leja tshimfuanyi tshia mu mabeji 2 ne 3, ne zangika imue ngikadilu mimpe ya mu bulongolodi bupiabupia ebu.] Ndi mujadike se: wewe pamue ne aba baudi munange nenujinge kuikala ne muoyo mu bulongolodi bua mushindu’eu. Tangila tshidi tshikoso tshia 16, mu dibeji dia 31, tshiamba pa bualu ebu.” Bala tshikoso, ne zangika ne: kukeba Yehowa kudi kumvuija kulonga bipitshidile pa bidi bimutangile ne malongolola ende, ne bionso ebi, pa kulonga Bible, Dîyi diende.
6 Yehowa udi tshilejilu tshipuangane tshia Mulami muena ntema udi utabalela mikoko yende. (Yehez. 34:11-14) Madikolela etu menza ne muoyo umue bua kumuidikija mu mushindu eu adi tshimanyinu tshia dinanga dietu ne adi apetesha masanka kudi bantu netu.